ഫിഫ ലോകകപ്പ് ചരിത്രത്തിൽ പെനാൽറ്റി ഷൂട്ടൗട്ടുകൾ ഒഴികെ ഏറ്റവും കൂടുതൽ പെനാൽറ്റി ഗോളുകൾ നേടുന്ന താരം എന്ന റെക്കോർഡ് ഇനി ഇംഗ്ലണ്ട് നായകൻ ഹാരി കെയ്ന് സ്വന്തം. ജൂൺ 17 ബുധനാഴ്ച നടന്ന മത്സരത്തോടെയാണ് ലണ്ടനിൽ നിന്നുള്ള ഈ മുപ്പത്തിരണ്ടുകാരൻ ചരിത്രത്താളുകളിൽ തന്റെ പേര് ചേർത്തത്. ഫിഫ ലോകകപ്പ് 2026-ലെ ഗ്രൂപ്പ് എൽ മത്സരത്തിൽ ക്രൊയേഷ്യക്കെതിരെ പെനാൽറ്റി സ്പോട്ടിൽ നിന്ന് ഹാരി കെയ്ൻ ഗോൾ നേടിയതോടെയാണ് റെക്കോഡ് പിറന്നത്. ലോകകപ്പ് ചരിത്രത്തിൽ ഹാരി കെയ്ൻ നേടുന്ന അഞ്ചാമത്തെ പെനാൽറ്റി ഗോളായിരുന്നു ഇത്. ഇതോടെ എക്കാലത്തെയും മികച്ച താരങ്ങളുടെ പട്ടികയിൽ എല്ലാവരെയും മറികടന്ന് കെയ്ൻ ഒന്നാമതെത്തി.
2018 ജൂൺ 24-ന് നിഷ്നി നോവ്ഗൊറോഡ് സ്റ്റേഡിയത്തിൽ നടന്ന റഷ്യൻ ലോകകപ്പിലെ ഗ്രൂപ്പ് ഘട്ട മത്സരത്തിൽ പനാമയ്ക്കെതിരെ രണ്ട് പെനാൽറ്റി ഗോളുകൾ ഹാരി കെയ്ൻ നേടിയിരുന്നു. തുടർന്ന് ജൂലൈ 3-ന് മോസ്കോയിലെ ഒട്ക്രിറ്റീവ് അരീനയിൽ കൊളംബിയക്കെതിരെ നടന്ന പ്രീ-ക്വാർട്ടർ പോരാട്ടത്തിലും അദ്ദേഹം മറ്റൊരു പെനാൽറ്റി വലയിലെത്തിച്ചു. കെയ്ന്റെ നാലാമത്തെ ലോകകപ്പ് പെനാൽറ്റി ഗോൾ പിറന്നത് 2022 ഡിസംബർ 10-ന് അൽ ഖോറിലെ അൽ ബൈത് സ്റ്റേഡിയത്തിൽ ഫ്രാൻസിനെതിരെ നടന്ന ക്വാർട്ടർ ഫൈനൽ മത്സരത്തിലായിരുന്നു. ഇപ്പോൾ 2026 ലോകകപ്പിൽ ക്രൊയേഷ്യക്കെതിരെ നേടിയ ഏറ്റവും പുതിയ പെനാൽറ്റിയോടെ അദ്ദേഹത്തിന്റെ ആകെ പെനാൽറ്റി ഗോളുകളുടെ എണ്ണം അഞ്ചായി ഉയർന്നു. ഷൂട്ടൗട്ടുകൾ ഒഴിവാക്കിയുള്ള കണക്കാണിത്.
ഫിഫ ലോകകപ്പ് ചരിത്രത്തിൽ ഏറ്റവും കൂടുതൽ പെനാൽറ്റി ഗോളുകൾ നേടിയ കളിക്കാരുടെ പട്ടികയിൽ ഹാരി കെയ്ന് തൊട്ടുപിന്നിൽ ഗബ്രിയേൽ ബാറ്റിസ്റ്റ്യൂട്ട, യുസേബിയോ, റോബ് റെൻസൻബ്രിങ്ക്, ലയണൽ മെസ്സി എന്നിവരാണുള്ളത്. ഈ നാല് കളിക്കാരും ലോകകപ്പ് മത്സരങ്ങളിൽ പെനാൽറ്റി സ്പോട്ടിൽ നിന്ന് നാല് ഗോളുകൾ വീതമാണ് നേടിയിട്ടുള്ളത്. ഈ പുതിയ നേട്ടത്തോടെ ലോകകപ്പിൽ ഹാരി കെയ്ന്റെ ആകെ ഗോളുകളുടെ എണ്ണം പത്തായി ഉയർന്നു. ഇതോടെ ലോകകപ്പ് ചരിത്രത്തിൽ ഇംഗ്ലണ്ട് ടീമിനായി ഏറ്റവും കൂടുതൽ ഗോളുകൾ നേടുന്ന താരം എന്ന റെക്കോർഡിനൊപ്പമെത്താനും ഹാരി കെയ്ന് സാധിച്ചു.
