2026-ൽ അമേരിക്കയിൽ നടക്കാനിരിക്കുന്ന ഫിഫ ലോകകപ്പിനെത്തുന്ന ഫുട്ബോൾ പ്രേമികൾക്ക് തിരിച്ചടിയായി പ്രസിഡന്റ് ഡൊണാൾഡ് ട്രംപിന്റെ പുതിയ വിസ നിയന്ത്രണങ്ങൾ. ലോകത്തെ 75 രാജ്യങ്ങളിൽ നിന്നുള്ളവർക്ക് ഇമ്മിഗ്രന്റ് വിസകൾ മരവിപ്പിക്കാൻ ട്രംപ് ഭരണകൂടം എടുത്ത തീരുമാനം ടൂർണമെന്റിനെ ബാധിക്കുമോ എന്ന ആശങ്കയാണ് ഇപ്പോൾ ഉയരുന്നത്. വിസ നടപടികളിലെ കർശന പരിശോധനകൾ ലോകകപ്പ് കാണാൻ എത്തുന്നവരെയും പ്രതിസന്ധിയിലാക്കിയേക്കാം.
അനധികൃത കുടിയേറ്റം തടയാനും രാജ്യത്തെ സുരക്ഷാ സംവിധാനങ്ങൾ ശക്തിപ്പെടുത്താനുമാണ് ഇത്തരമൊരു നടപടിയെന്ന് അമേരിക്കൻ ഭരണകൂടം ആവർത്തിച്ച് വ്യക്തമാക്കുന്നു. എന്നാൽ ലോകത്തിലെ ഏറ്റവും വലിയ കായിക മാമാങ്കത്തിന് ആതിഥേയത്വം വഹിക്കുന്ന രാജ്യം ഇത്തരം നിയന്ത്രണങ്ങൾ ഏർപ്പെടുത്തുന്നത് ടിക്കറ്റ് വിൽപ്പനയെയും ടൂറിസം മേഖലയെയും ബാധിച്ചേക്കും. വിസ ലഭിക്കുന്നതിലെ കാലതാമസം പല രാജ്യങ്ങളിൽ നിന്നുള്ള ആരാധകർക്കും യാത്ര തടസ്സപ്പെടുത്താൻ കാരണമാകും.
ലോകകപ്പിനായി അമേരിക്കയിലേക്ക് യാത്ര തിരിക്കാൻ ഒരുങ്ങുന്നവർ വിസ നടപടികൾ മുൻകൂട്ടി പൂർത്തിയാക്കാൻ ശ്രമിക്കണമെന്നാണ് വിദഗ്ധർ നൽകുന്ന ഉപദേശം. നിലവിലെ നയങ്ങൾ പ്രകാരം വിസ അപേക്ഷകളിൽ കൂടുതൽ കർശനമായ പരിശോധനകൾ കൗൺസിലർ ഓഫീസർമാർ നടത്തുന്നുണ്ട്. റഷ്യ, ഇറാൻ, തായ്ലൻഡ് ഉൾപ്പെടെയുള്ള രാജ്യങ്ങളിൽ നിന്നുള്ളവർക്ക് വിസ ലഭിക്കുക എന്നത് ഇനി കൂടുതൽ വെല്ലുവിളിയാകും.
ഫിഫ അധികൃതർ അമേരിക്കൻ സർക്കാരുമായി വിസ വിഷയത്തിൽ ചർച്ചകൾ നടത്തുന്നുണ്ടെന്നാണ് സൂചന. ആരാധകർക്കും ടീം അംഗങ്ങൾക്കും തടസ്സമില്ലാതെ രാജ്യത്ത് പ്രവേശിക്കാനുള്ള സാഹചര്യം ഒരുക്കണമെന്ന് അവർ ആവശ്യപ്പെടുന്നുണ്ട്. എന്നാൽ ദേശീയ സുരക്ഷയുടെ കാര്യത്തിൽ വിട്ടുവീഴ്ചയില്ലെന്ന കർശന നിലപാടിലാണ് ട്രംപ് ഭരണകൂടം ഇപ്പോഴും തുടരുന്നത്.
ഇന്ത്യ ഉൾപ്പെടെയുള്ള രാജ്യങ്ങളിൽ നിന്നുള്ള ഫുട്ബോൾ ആരാധകർക്കും ഈ വിസ നിയന്ത്രണങ്ങൾ ഒരു വലിയ ആശങ്കയായി മാറിക്കഴിഞ്ഞു. അമേരിക്കയിൽ നടക്കുന്ന മത്സരങ്ങൾ നേരിട്ട് കാണാൻ ലക്ഷ്യമിട്ടിരുന്ന പലർക്കും പുതിയ വിസ നയം ഒരു തടസ്സമായി മാറിയേക്കാം. വരും ദിവസങ്ങളിൽ വിനോദസഞ്ചാരികൾക്കും സ്പോർട്സ് വിസകൾക്കും കൂടുതൽ ഇളവുകൾ നൽകുമോ എന്നാണ് കായിക ലോകം ഉറ്റുനോക്കുന്നത്.
ലോകകപ്പ് മുന്നൊരുക്കങ്ങൾ തകൃതിയായി നടക്കുമ്പോഴും വിസ പ്രശ്നം ടൂർണമെന്റിന്റെ വിജയത്തെ ബാധിക്കുമോ എന്ന സംശയം ബാക്കിയാണ്. രാജ്യത്തെ പൊതുജനാരോഗ്യ സംവിധാനങ്ങളെ ആശ്രയിക്കാത്തവർക്ക് മാത്രമേ വിസ അനുവദിക്കൂ എന്ന പുതിയ നിയമം സാധാരണക്കാരായ ആരാധകർക്ക് തിരിച്ചടിയായേക്കാം. അന്താരാഷ്ട്ര തലത്തിൽ ഈ വിസ നിയന്ത്രണങ്ങൾക്കെതിരെ വലിയ തോതിലുള്ള ചർച്ചകളാണ് ഇപ്പോൾ നടക്കുന്നത്.
