ഇന്ത്യയിലെ ഗ്രാമീണ മേഖലകളിൽ പൈപ്പ് വഴി വിതരണം ചെയ്യുന്ന കുടിവെള്ളത്തിന്റെ ഗുണനിലവാരത്തിൽ വലിയ പോരായ്മകൾ നിലനിൽക്കുന്നതായി റിപ്പോർട്ട്. ജല ജീവൻ മിഷൻ 2024-ൽ നടത്തിയ പരിശോധനകളുടെ അടിസ്ഥാനത്തിൽ പുറത്തുവന്ന കണക്കുകൾ പ്രകാരം, രാജ്യത്തുടനീളം ശേഖരിച്ച ടാപ്പ് വെള്ളത്തിന്റെ സാമ്പിളുകളിൽ 25 ശതമാനവും മൈക്രോബയോളജിക്കൽ ഗുണനിലവാര പരിശോധനകളിൽ പരാജയപ്പെട്ടു. രാജ്യത്തെ 75 ശതമാനത്തോളം വീടുകളിലും പൈപ്പിലൂടെ ലഭിക്കുന്ന വെള്ളം യാതൊരുവിധ ശുദ്ധീകരണ പ്രക്രിയകൾക്കും വിധേയമാക്കാതെയാണ് കുടിക്കാൻ ഉപയോഗിക്കുന്നത് എന്നത് സ്ഥിതി കൂടുതൽ ഗൗരവകരമാക്കുന്നു. പൈപ്പ് കണക്ഷനുകളുടെ എണ്ണം വർധിക്കുമ്പോഴും ജലത്തിന്റെ ശുദ്ധി ഉറപ്പുവരുത്തുന്നതിൽ വലിയ വിടവ് നിലനിൽക്കുന്നതായാണ് ഈ പഠനം ചൂണ്ടിക്കാട്ടുന്നത്.
ദേശീയ തലത്തിൽ വീടുകളിൽ നിന്നുള്ള സാമ്പിളുകളിൽ 24 ശതമാനവും മലിനമാണെന്ന് കണ്ടെത്തിയപ്പോൾ, പൊതുസ്ഥാപനങ്ങളിലെ സ്ഥിതി ഇതിലും പരിതാപകരമാണ്. സ്കൂളുകളിൽ നിന്ന് ശേഖരിച്ച സാമ്പിളുകളിൽ 26.7 ശതമാനവും അങ്കണവാടികളിൽ 27.5 ശതമാനവും ആരോഗ്യ കേന്ദ്രങ്ങളിൽ 28 ശതമാനവും പരിശോധനകളിൽ പരാജയപ്പെട്ടു. കുട്ടികളും രോഗികളും ഉപയോഗിക്കുന്ന വെള്ളത്തിൽ കാൽഭാഗത്തിലധികം മാലിന്യമുണ്ടെന്ന കണ്ടെത്തൽ വലിയ ആരോഗ്യ ഭീഷണിയാണ് ഉയർത്തുന്നത്. ഉത്തർപ്രദേശ്, പശ്ചിമ ബംഗാൾ തുടങ്ങിയ സംസ്ഥാനങ്ങളിൽ വിതരണം ചെയ്യുന്ന വെള്ളത്തിൽ ബാക്ടീരിയകളുടെ സാന്നിധ്യവും അനുവദനീയമായ അളവിൽ കൂടുതൽ രാസവസ്തുക്കളും കണ്ടെത്തിയിട്ടുണ്ട്. പലയിടങ്ങളിലും ജലസ്രോതസ്സുകളിലെ മലിനീകരണവും പൈപ്പ് ലൈനുകളിലെ ചോർച്ചയുമാണ് പ്രധാന പ്രശ്നമായി മാറുന്നത്.
