ചെലവ് കുറഞ്ഞ വിദേശ ഉൽപ്പന്നങ്ങൾ യു.എസ്. ഉത്പാദകരെ ദോഷകരമായി ബാധിക്കുന്നു എന്ന കർഷകരുടെ പരാതികൾ ഉയർന്നതിന് പിന്നാലെ, കനേഡിയൻ വളം, ഇന്ത്യൻ അരി എന്നിവയുൾപ്പെടെയുള്ള കാർഷിക ഇറക്കുമതിക്ക് പുതിയ താരിഫ് ഏർപ്പെടുത്താൻ തൻ്റെ ഭരണകൂടം തയ്യാറാണെന്ന് യു.എസ്. പ്രസിഡൻ്റ് ഡൊണാൾഡ് ട്രംപ് സൂചന നൽകി.
അമേരിക്കൻ കർഷകർക്കായി 12 ബില്യൺ ഡോളറിൻ്റെ രക്ഷാ പാക്കേജ് പുറത്തിറക്കുന്നതിനായി വൈറ്റ് ഹൗസിൽ നടന്ന റൗണ്ട് ടേബിൾ മീറ്റിംഗിൽ സംസാരിക്കുകയായിരുന്നു ട്രംപ്. രാജ്യങ്ങൾ കുറഞ്ഞ വിലയ്ക്ക് അരി അമേരിക്കൻ വിപണിയിലേക്ക് ഡംപ് ചെയ്യുന്നു എന്ന ആരോപണത്തിൽ സർക്കാർ അന്വേഷണം നടത്തുമെന്നും അദ്ദേഹം പറഞ്ഞു.
സബ്സിഡി നൽകുന്ന അരിയുടെ ഇറക്കുമതി യു.എസ്. വിപണിയെ തകർക്കുകയും ആഭ്യന്തര വില കുറയ്ക്കുകയും ചെയ്യുന്നതായി കർഷകർ ട്രംപിനോട് പരാതിപ്പെട്ടു. അവർ ‘ചതിക്കുകയാണെന്നും’ ഉടൻ താരിഫ് ഏർപ്പെടുത്തുമെന്നും ട്രംപ് മറുപടി നൽകി. കാനഡയിൽ നിന്ന് ഇറക്കുമതി ചെയ്യുന്ന വളമായിരിക്കും അടുത്ത നടപടിയെന്നും യു.എസ്. ഉത്പാദനം വർദ്ധിപ്പിക്കുന്നതിന് കനത്ത തീരുവകൾ പരിഗണനയിലുണ്ടെന്നും അദ്ദേഹം സൂചന നൽകി.
താരിഫ് ഏർപ്പെടുത്തേണ്ട രാജ്യങ്ങളെക്കുറിച്ച് ട്രംപ്
ലൂസിയാന ആസ്ഥാനമായുള്ള കെന്നഡി റൈസ് മില്ലിൻ്റെ സി.ഇ.ഒ. മെറിൽ കെന്നഡി, ഇന്ത്യ, തായ്ലൻഡ്, ചൈന എന്നിവയാണ് പ്രധാന കുറ്റക്കാരെന്നും ചൈനീസ് അരി പ്രധാന ഭൂപ്രദേശത്തേക്കല്ല പ്യൂർട്ടോ റിക്കോയിലേക്കാണ് പോകുന്നതെന്നും ട്രംപിനോട് പറഞ്ഞു. “വർഷങ്ങളായി ഞങ്ങൾ പ്യൂർട്ടോ റിക്കോയിലേക്ക് അരി കയറ്റുമതി ചെയ്തിട്ടില്ല,” എന്ന് പറഞ്ഞ കെന്നഡി, “ഞങ്ങൾ തെക്കൻ സംസ്ഥാനക്കാർ ശരിക്കും ബുദ്ധിമുട്ടുകയാണ്” എന്നും കൂട്ടിച്ചേർത്തു.
“താരിഫുകൾ ഫലപ്രദമാണ്, പക്ഷേ ഞങ്ങൾക്ക് ഇരട്ടി ശക്തിയിൽ ഇത് വേണം,” മെറിൽ കെന്നഡി പറഞ്ഞു.
“നിങ്ങൾക്ക് കൂടുതൽ വേണോ?” ട്രംപ് അത്ഭുതത്തോടെ ചോദിച്ചു.
“അവർ ഡംപ് ചെയ്യാൻ പാടില്ല,” റൗണ്ട് ടേബിളിൽ ഒത്തുകൂടിയ കർഷകരോടായി അദ്ദേഹം പറഞ്ഞു. തുടർന്ന് അന്യായമായ മത്സരത്തിന് കാരണമാകുന്ന രാജ്യങ്ങളുടെ പേര് എഴുതിയെടുക്കാൻ ട്രഷറി സെക്രട്ടറി സ്കോട്ട് ബെസൻ്റിനോട് ട്രംപ് ആവശ്യപ്പെട്ടു.
ഇന്ത്യ എങ്ങനെയാണ് നിയമവിരുദ്ധ സബ്സിഡികൾ നൽകി അരി വ്യവസായത്തെ താങ്ങിനിർത്തുന്നതെന്ന് കെന്നഡി വിശദീകരിക്കാൻ തുടങ്ങിയപ്പോൾ, അദ്ദേഹം പൂർത്തിയാക്കുന്നതിന് മുമ്പ് ട്രംപ് ഇടപെട്ടു. “നിങ്ങൾക്ക് കഴിയുമെങ്കിൽ രാജ്യങ്ങൾ ഏതാണെന്ന് എന്നോട് പറയൂ? പറയുക. ഇന്ത്യ, മറ്റാര്? സ്കോട്ട്, അത് എഴുതിയെടുക്കൂ,” യു.എസ്. പ്രസിഡൻ്റ് പറഞ്ഞു.
