ഉത്തർപ്രദേശിലെ സോൻഭദ്ര ജില്ലയിൽ ഭർത്താവ് മുത്തലാഖ് ചൊല്ലി വീട്ടിൽ നിന്ന് പുറത്താക്കിയെന്ന പരാതിയിൽ എട്ട് പേർക്കെതിരെ കേസ് രജിസ്റ്റർ ചെയ്‌തു. അൻപാറ സ്വദേശിയായ ആയിഷ പർവീൺ ആണ് ഭർത്താവിനും കുടുംബാംഗങ്ങൾക്കുമെതിരെ പരാതി നൽകിയിട്ടുള്ളതെന്ന് പോലീസ് വ്യക്തമാക്കി.
പരാതിപ്രകാരം, ആയിഷയുടെ ഭർത്താവ് ഫൈസൽ അഹമ്മദ്, അമ്മായിയമ്മ സൽമ ബീഗം, സഹോദരീഭർത്താവ്, സഹോദരി എന്നിവരുൾപ്പെടെ എട്ട് പേർക്കെതിരെയാണ് കേസ് എടുത്തിട്ടുള്ളത്. 2022 ജൂലൈ 14-നാണ് അൻപാറ സ്വദേശിയായ ഫൈസൽ അഹമ്മദും ആയിഷയും തമ്മിലുള്ള വിവാഹം നടന്നത്.
വിവാഹ സമയത്ത് ആയിഷയുടെ കുടുംബം 3.5 ലക്ഷം രൂപ പണമായും ആഭരണങ്ങളായും നൽകിയിരുന്നുവെന്നും പരാതിയിൽ പറയുന്നു. എന്നാൽ, വിവാഹത്തിന് ശേഷം ഫൈസലും അമ്മ സൽമ ബീഗവും മറ്റ് കുടുംബാംഗങ്ങളും ചേർന്ന് കൂടുതൽ സ്ത്രീധനം ആവശ്യപ്പെട്ട് ഉപദ്രവിക്കാൻ തുടങ്ങിയെന്ന് ആയിഷ പോലീസിൽ നൽകിയ പരാതിയിൽ ചൂണ്ടിക്കാട്ടി.
സ്ത്രീധനത്തിന്റെ പേരിൽ ഭർത്താവും കുടുംബവും ചേർന്ന് തന്നെ ആക്രമിച്ചുവെന്നും തുടർന്ന് മുത്തലാഖ് ചൊല്ലി വീട്ടിൽനിന്ന് പുറത്താക്കിയെന്നുമാണ് യുവതിയുടെ പ്രധാന ആരോപണം. നിലവിൽ അവർ ബല്ലിയയിൽ സ്വന്തം അമ്മയോടൊപ്പമാണ് താമസിക്കുന്നത്. വീട്ടിൽ നിന്ന് പുറത്താക്കിയ ശേഷം 2023 ഒക്ടോബർ 30-ന് ഭർത്താവ് സോൻഭദ്ര ജില്ലയിലെ ദുധിയിൽ നിന്നുള്ള മറ്റൊരാളെ വിവാഹം ചെയ്‌തുവെന്നും ആയിഷ പരാതിയിൽ ആരോപിച്ചിട്ടുണ്ട്. യുവതിയുടെ പരാതിയുടെ അടിസ്ഥാനത്തിൽ എട്ട് പേർക്കെതിരെയും കേസ് രജിസ്റ്റർ ചെയ്‌ത് അന്വേഷണം ആരംഭിച്ചതായി പോലീസ് അറിയിച്ചു.
