യാത്രയ്ക്കിടെ ഒരു ഗർഭിണിയായ സ്ത്രീക്ക് പ്രസവവേദന അനുഭവപ്പെടുകയും, തുടർന്ന് ഓടുന്ന ട്രെയിൻ കോച്ചിൽ വെച്ച് തന്നെ ആരോഗ്യമുള്ള ഒരു പെൺകുഞ്ഞിന് ജന്മം നൽകുകയും ചെയ്ത അസാധാരണ സംഭവം സമൂഹ മാധ്യമങ്ങളിൽ ചർച്ചാവിഷയമാകുന്നു.
തിരക്കേറിയ ട്രെയിനിൽ വൈദ്യസഹായം ലഭ്യമല്ലാത്ത ഒരു സാഹചര്യത്തിൽ പോലും, കൂടെ യാത്ര ചെയ്തിരുന്ന ഒരു കൂട്ടം സ്ത്രീകളുടെ ധീരമായ സഹായത്തോടെയാണ് അമ്മ ഈ പ്രതിബന്ധങ്ങളെ തരണം ചെയ്തത്. ഈ സംഭവത്തിന്റെ ഏതാനും നിമിഷങ്ങൾ മാത്രം ദൈർഘ്യമുള്ള വീഡിയോ ദൃശ്യം സമൂഹ മാധ്യമങ്ങളിൽ പങ്കുവെക്കപ്പെട്ടപ്പോൾ ഇതിനോടകം എട്ടര ലക്ഷത്തോളം പേരാണ് കണ്ടത്. ഏത് ട്രെയിൻ, സമയം, സ്ഥലം തുടങ്ങിയ വ്യക്തമായ വിവരങ്ങൾ ലഭ്യമല്ലെങ്കിലും ഈ വീഡിയോ സമൂഹ മാധ്യമ ഉപയോക്താക്കളുടെ ശ്രദ്ധ പിടിച്ചുപറ്റി. ‘ഒരു ഡോക്ടറുമില്ലാതെ ട്രെയിനിൽ ഒരു കുഞ്ഞിന് ജന്മം നൽകുന്നത് ഒരു അത്ഭുതമാണ്.
ഗർഭിണിയായ ഒരു സ്ത്രീയെ സഹായിച്ച് ഒരു കുഞ്ഞ് രാജ്ഞിയെ പ്രസവിച്ച ഇന്ത്യക്കാരുടെ നന്മ’ എന്ന അടിക്കുറിപ്പോടെയാണ് ഈ ദൃശ്യം ഇൻസ്റ്റാഗ്രാം എന്ന സമൂഹ മാധ്യമ പ്ലാറ്റ്‌ഫോമിൽ പങ്കുവെക്കപ്പെട്ടത്. ദൃശ്യങ്ങളിൽ, ഓടുന്ന ട്രെയിനിനുള്ളിൽ യാത്രക്കാരായ സ്ത്രീകൾ കൈകളിൽ മാറിമാറി പിടിച്ചിരിക്കുന്ന തുണിയിൽ പൊതിഞ്ഞ ഒരു നവജാത ശിശുവിനെ കാണാൻ കഴിയും. കുഞ്ഞ് കണ്ണ് തുറക്കാൻ പാടുപെടുന്ന ദൃശ്യങ്ങളും ക്ലിപ്പിൽ ഉണ്ട്.
ഒരു യാത്രക്കാരി കൈകളിൽ എടുത്തുയർത്തി, നവജാത ശിശുവിനെ അമ്മയ്ക്ക് അഭിമാനത്തോടെ കാണിച്ചു കൊടുക്കുന്നതോടെയാണ് ഈ ദൃശ്യം ആരംഭിക്കുന്നത്. കോച്ചിലുണ്ടായിരുന്ന മുഴുവൻ യാത്രക്കാരും വലിയ സന്തോഷത്തോടെ ഈ നിമിഷത്തെ ആഘോഷിക്കുകയും ചിലർ കുട്ടിയുടെ ഫോട്ടോ എടുക്കുകയും ചെയ്യുന്നു. മറ്റ് ചില യാത്രക്കാർ കുട്ടിയെ വാത്സല്യത്തോടെ കൈകളിൽ ഏറ്റുവാങ്ങുന്നതും വീഡിയോ ദൃശ്യങ്ങളിൽ കാണാം.
ഈ സംഭവത്തിന് പിന്നാലെ നിരവധി പേരാണ് ഇന്ത്യൻ സ്ത്രീകളുടെ ധീരതയെയും പരസ്പര സഹായ മനസ്ഥിതിയെയും പ്രശംസിച്ചുകൊണ്ട് കുറിപ്പുകൾ പങ്കുവെച്ചത്. ‘പണച്ചിലവോ തുന്നലുകളോ ഇല്ലാതെ അവൾ ഈ ഭൂമുഖത്തെത്തി.
അതും ഓടിക്കൊണ്ടിരിക്കുന്ന ട്രെയിനിലായിരുന്നു’ എന്ന് ഒരു കാഴ്ചക്കാരൻ അഭിപ്രായപ്പെട്ടു. ‘സ്ത്രീകൾ മാത്രമല്ല, അവളുടെ കരച്ചിലിനായി കാതോർത്ത് മാറിനിന്ന പുരുഷന്മാരും കുട്ടികളും പ്രശ്നങ്ങളൊന്നുമില്ലാതെ കുട്ടിയുടെ ജനനത്തിനായി അവരുടെതായ രീതിയിൽ പ്രാർത്ഥിച്ചിരിക്കണം’ എന്ന് മറ്റൊരാൾ ഇന്ത്യൻ യാത്രക്കാരുടെ സ്നേഹത്തെ പ്രകീർത്തിച്ചു.
അതേസമയം, ചില ഉപയോക്താക്കൾ സംഭവത്തിന്റെ സുരക്ഷാപരമായ ചില ആശങ്കകൾ പങ്കുവെച്ചു. ഇന്ത്യൻ ട്രെയിനുകളിലെ വൃത്തിഹീനമായ സാഹചര്യങ്ങളിൽ ഒരു പ്രസവം നടക്കുമ്പോൾ അമ്മയ്ക്കോ കുഞ്ഞിനോ അണുബാധ ഉണ്ടാകാനുള്ള സാധ്യതയെക്കുറിച്ചും എന്തെങ്കിലും അപകടം സംഭവിച്ചിരുന്നെങ്കിൽ ആരാണ് അതിന്റെ ഉത്തരവാദിത്വം ഏറ്റെടുക്കുകയെന്നതിനെക്കുറിച്ചും ചിലർ സംശയങ്ങൾ ഉന്നയിച്ചു.
ഗർഭാവസ്ഥയുടെ അവസാന ഘട്ടങ്ങളിൽ, പ്രത്യേകിച്ച് 30 ആഴ്ചകൾക്ക് ശേഷം ഡോക്ടർമാർ പൊതുവെ യാത്രകൾ ഒഴിവാക്കണമെന്ന് ഗർഭിണികളോട് നിർദ്ദേശിക്കാറുണ്ടെന്ന് ഒരു ഉപയോക്താവ് ചൂണ്ടിക്കാട്ടി. ദീർഘദൂര യാത്രകൾ അമ്മയ്ക്കും കുഞ്ഞിനും ഗുരുതരമായ അപകടസാധ്യതകൾ സൃഷ്ടിക്കാൻ സാധ്യതയുണ്ടെന്നും ചിലർ ഓർമ്മിപ്പിച്ചു.
