തിരുവനന്തപുരം: ആഗോളതലത്തിൽ ഫലപ്രദവും നൂതനവുമായ സൈബർ സുരക്ഷാ പരിഹാരങ്ങൾ നൽകുന്നതിന്റെ ഭാഗമായി ടെക്നോപാർക്കിലെ പ്രമുഖ ഇന്നൊവേഷൻ ടെക്നോളജി സേവന ദാതാവായ റിഫ്ളക്ഷൻസ് ഇൻഫോ സിസ്റ്റംസ് ഗാർഡ്ആർക്സ് എന്ന സബ്സിഡിയറി ആരംഭിച്ചു.
സങ്കീർണമായ സൈബർ സുരക്ഷാ വൈദഗ്ധ്യത്തെ ജനറേറ്റീവ് എഐ ഏജിന്റിക് എഐ എന്നിവയുമായി ഗാർഡ്ആർക്സ് സംയോജിപ്പിക്കുന്നു. ഇത് കൂടുതൽ മികച്ചതും വേഗമേറിയതും സാഹചര്യങ്ങൾക്കനുസരിച്ചു മാറുന്നതുമായ പ്രതിരോധ സംവിധാനങ്ങൾ നിർമിക്കാനും സൈബർ സുരക്ഷാ ഭീഷണികൾ തടയാനും വൻകിട സംരംഭങ്ങളെയും മിഡ്മാർക്കറ്റ് സ്ഥാപനങ്ങളെയും സഹായിക്കുന്നു.
സൈബർ സുരക്ഷയുമായി ബന്ധപ്പെട്ട നൂതന പരിഹാരങ്ങൾ വികസിപ്പിക്കുന്നതിനായി ഡിജിറ്റൽ യൂണിവേഴ്സിറ്റി കേരളയുടെ സൈബർ സെക്യൂരിറ്റി വിഭാഗവുമായി ഗാർഡ്ആർക്സ് ചേർന്നു പ്രവർത്തിക്കും.
ദ്രുതഗതിയിൽ വളരുന്ന സാങ്കേതിക സംരംഭങ്ങളുടെ റാങ്കിംഗ് നടത്തുന്ന ഡെലോയിറ്റ് ഇന്ത്യ ഫാസ്റ്റ് 50 പട്ടികയിലുള്ള റിഫ്ളക്ഷൻസ് ഇൻഫോ സിസ്റ്റംസ് ലോകത്തിലെ മുൻനിര ബ്രാൻഡുകളുടെ ടെക്നോളജി ട്രാൻസ്ഫർമേഷൻ പങ്കാളിയാകുന്ന എഐ അധിഷ്ഠിത ഡിജിറ്റൽ എൻജിനിയറിംഗ് സ്ഥാപനമാണ്.
2008ൽ സ്ഥാപിതമായ റിഫ്ളക്ഷൻസ് ഇപ്പോൾ യുഎസ്, ബഹ്റൈൻ, ഖത്തർ, സൗദി അറേബ്യ, യുഎഇ, ഓസ്ട്രേലിയ, ന്യൂസിലൻഡ്, ബ്രസീൽ എന്നിവിടങ്ങളിൽ അഞ്ഞൂറിലധികം വ്യവസായ വിദഗ്ധരുടെയും സാങ്കേതിക സംരംഭകരുടെയും സംഘത്തിനൊപ്പം പ്രവർത്തിക്കുന്നു.
