ബെയ്ജിങ്: ചൈനയിലെ ഏറ്റവും പ്രശസ്തമായ മത-സാംസ്കാരിക കേന്ദ്രമാണ് ഷാവോലിൻ ടെമ്പിൾ. ചൈനയുടെ ചരിത്രത്തിന്റെ നാഴികക്കല്ലുകളിൽ ഏറ്റവും പ്രധാനപ്പെട്ടത് എന്നുതന്നെ പറയാം. 1,500 വർഷം പഴക്കമുള്ള ചൈനയിലെ ഷാവോലിൻ ടെമ്പിളിൻ്റെ നിലവിലെ അധിപനെതിരെ അന്വേഷണം പ്രഖ്യാപിച്ചിരിക്കുകയാണ് ചൈനയിലെ ഔദ്യോഗിക അന്വേഷണ ഏജൻസികൾ. ആശ്രമത്തെ ഒരു ആഗോള വാണിജ്യ ബ്രാൻഡാക്കി മാറ്റിയതിന്റെ പേരിൽ ‘സിഇഒ സന്യാസി’ എന്ന് വിശേഷിപ്പിക്കപ്പെടുന്ന ഷി യോങ്സിൻ (59) എന്ന സന്യാസിക്കെതിരെ ലൈംഗികാപവാദം മുതൽ സാമ്പത്തിക തിരിമറി വരെയുള്ള കുറ്റങ്ങളാണ് ആരോപിക്കപ്പെട്ടിരിക്കുന്നത്.
ചൈനയിലെ ടെമ്പിളിലെ പ്രധാന പുരോഹിതനായ ഷിയെ ചുറ്റിപ്പറ്റി വർഷങ്ങളായി നിരവധി വിവാദങ്ങൾ നിലവിലുണ്ട്. ബുദ്ധമത നിയമങ്ങളുടെ ലംഘനം, സാമ്പത്തിക ക്രമക്കേടുകൾ എന്നിവ കൂടാതെ, ഒട്ടേറെ സ്ത്രീകളുമായി ദീർഘകാലമായി ഷി ‘അവിഹിത ബന്ധങ്ങൾ’ പുലർത്തിപ്പോരുന്നു എന്നുമാണ് ആരോപണം. ടെമ്പിളിനായുള്ള പ്രോജക്റ്റ് ഫണ്ടുകൾ വകമാറ്റുകയും, ദുരുപയോഗം ചെയ്യുകയും, ടെമ്പിളിൻ്റെ സ്വത്തുക്കൾ ദുർവിനിയോഗം ചെയ്തതായും, ഈ പ്രവർത്തികളിലെല്ലാം ഷിയെ സംശയിക്കുന്നതായും ടെമ്പിളിൻ്റെ ഔദ്യോഗിക വീചാറ്റ് അക്കൗണ്ട് പുറത്തിറക്കിയ പ്രസ്താവനയിൽ പറയുന്നു.
ബുദ്ധമതത്തിൽ സന്യാസികൾക്ക് ബ്രഹ്മചര്യവ്രതം നിർബന്ധമാണ്. ഒട്ടേറെ സ്ത്രീകളുമായി ബന്ധം പുലർത്തുക മാത്രമല്ല, അവരിലെല്ലാം കുറഞ്ഞത് ഒരു കുട്ടിക്കെങ്കിലും ഷി ജന്മം നൽകിയിട്ടുണ്ടെന്നും റിപ്പോർട്ടുകളുണ്ട്. ഒന്നിലധികം വകുപ്പുകളുടെ സംയുക്ത അന്വേഷണമാണ് ഇപ്പോൾ ഷിക്കെതിരെ നടക്കുന്നത്. അതേസമയം, ഷിയുടെ സന്യാസ പദവിക്ക് ഔദ്യോഗിക അംഗീകാരം നൽകുന്ന രേഖ റദ്ദാക്കിയതായി ചൈനയിലെ ബുദ്ധമത അസോസിയേഷൻ തിങ്കളാഴ്ച പ്രഖ്യാപിച്ചു. ഷിയുടെ സന്യാസപട്ടം റദ്ദാക്കിയതായുള്ള ഈ വാർത്ത അദ്ദേഹത്തിനെതിരായ ആരോപണങ്ങളുടെ ഗൗരവം വ്യക്തമാക്കുന്നു.
‘ഷി യോങ്സിന്റെ പ്രവൃത്തികൾ അങ്ങേയറ്റം നിന്ദ്യമാണ്. ഇത് ബുദ്ധമത സമൂഹത്തിന്റെ പ്രശസ്തിക്ക് ഗുരുതരമായി കളങ്കം ചാർത്തുകയും സന്യാസിമാരുടെ പ്രതിച്ഛായക്ക് കോട്ടം തട്ടിക്കുകയും ചെയ്യുന്നു. ഷിക്കെതിരായ കേസ് നിയമപ്രകാരം കൈകാര്യം ചെയ്യാനുള്ള തീരുമാനത്തെ തങ്ങൾ ശക്തമായി പിന്തുണയ്ക്കുകയും അംഗീകരിക്കുകയും ചെയ്യുന്നു’ എന്നാണ് ഷിയുടെ പേരിൽ ആരോപിക്കപ്പെട്ട പ്രവൃത്തികളെ അപലപിച്ചുകൊണ്ട് അസോസിയേഷൻ നടത്തിയ പ്രസ്താവനയിൽ വ്യക്തമാക്കിയത്. അതേസമയം, ഈ ആരോപണങ്ങളോടൊന്നും ഷി ഇതുവരെയും പ്രതികരിച്ചിട്ടില്ല.
വടക്കൻ ഹെനാനിലെ ഒരു നഗരമായ സിൻസിയാങ്ങിൽവെച്ച് ഷിയെ പോലീസ് കസ്റ്റഡിയിലെടുത്തതായി ചില ചൈനീസ് മാധ്യമങ്ങൾ റിപ്പോർട്ട് ചെയ്തിരുന്നു. ഇത് ശരിയാണോ എന്ന കാര്യത്തിൽ സ്ഥിരീകരണം ഉണ്ടായിട്ടില്ല. അതേസമയം, ദിവസേന പോസ്റ്റുകൾ വന്നിരുന്ന, 870,000-ൽ അധികം ഫോളോവേഴ്സുള്ള അദ്ദേഹത്തിന്റെ വെയ്ബോ അക്കൗണ്ട് കഴിഞ്ഞ വ്യാഴാഴ്ച മുതൽ നിശ്ചലമാണ്. അതുകൊണ്ടുതന്നെ സാമൂഹ്യമാധ്യമങ്ങളിൽ അഭ്യൂഹങ്ങൾ വർധിക്കുകയാണ്. തന്റെ കാമുകിമാരും കുട്ടികളുമായി ഷി അമേരിക്കയിലേക്ക് രക്ഷപ്പെടാൻ ശ്രമിച്ചു എന്നുവരെ പ്രചാരണം നടന്നിരുന്നു. എന്നാൽ ഈ വാർത്ത അധികൃതർ തള്ളിക്കളഞ്ഞു.
ചൈനയിലെ ഏറ്റവും പ്രശസ്തരായ സന്യാസിമാരിൽ ഒരാളാണ് ഷി യോങ്സിൻ. 1965-ൽ അൻഹുയി പ്രവിശ്യയിലെ യിങ്ഷാങ്ങിൽ ജനിച്ച ഷിയുടെ യഥാർത്ഥ പേര് ലിയു യിങ്ചെങ് എന്നാണ്. 1981-ലാണ് അദ്ദേഹം ആദ്യമായി ചൈനയിലെ ഷാവോലിൻ ടെമ്പിളിൽ എത്തുന്നത്. ടെമ്പിളിന്റെ 29-ാം തലമുറയിലെ അധിപനായ ഷി സിങ്ഷെങ്ങിന്റെ ശിഷ്യനായി. 1987-ൽ ഗുരുവിന്റെ മരണശേഷം ടെമ്പിളിന്റെ നടത്തിപ്പ് ചുമതല ഏറ്റെടുത്തു. 1999-ഓടെ, അദ്ദേഹം ഔദ്യോഗികമായി ടെമ്പിളിൻ്റെ അധിപനായി നിയമിതനായി.
ഹെനാൻ പ്രവിശ്യയിലെ സോങ്ഷാൻ പർവതനിരകളിൽ സ്ഥിതി ചെയ്യുന്ന ചൈനയിലെ ഷാവോലിൻ ടെമ്പിൾ ഒരു ആരാധനാലയം മാത്രമല്ല, ചാൻ (സെൻ) ബുദ്ധമതത്തിന്റെയും ഷാവോലിൻ കുങ് ഫൂവിന്റെയും ജന്മസ്ഥലം കൂടിയാണ്. യുനെസ്കോയുടെ ലോക പൈതൃകകേന്ദ്രം കൂടിയാണ് ഈ ടെമ്പിൾ. ടെമ്പിളിന്റെ ഇന്നോളമുള്ള അധിപന്മാരിൽ എംബിഎ ബിരുദം നേടിയിട്ടുള്ള ആദ്യത്തെ ആളാണ് ഷി. ഈ യോഗ്യത പിന്നീട് ടെമ്പിൾനടത്തിപ്പിലുള്ള അദ്ദേഹത്തിന്റെ സമീപനത്തെ രൂപപ്പെടുത്തി. അദ്ദേഹത്തിന്റെ നേതൃത്വത്തിൽ ഷാവോലിൻ, ചരിത്രപരമായ ഒരു ആശ്രമം എന്നതിൽനിന്നും ഒരു ലോകോത്തര ബ്രാൻഡ് എന്ന ഖ്യാതി നേടി.
സിനിമകൾ, കാർട്ടൂണുകൾ, വീഡിയോ ഗെയിമുകൾ എന്നിവയിൽ ഉപയോഗിക്കുന്നതിനായി അദ്ദേഹം ഷാവോലിൻ എന്ന പേരിന് ലൈസൻസ് നൽകി. ഇതുകൂടാതെ റിയൽ എസ്റ്റേറ്റ്, പ്രസിദ്ധീകരണം, പരമ്പരാഗത വൈദ്യം, ആഗോള ടൂറിസം എന്നിവയിൽ വ്യാപിച്ചുകിടക്കുന്ന ഒരു ബിസിനസ് ശൃംഖലയും കെട്ടിപ്പടുത്തു. അങ്ങനെ, ആശ്രമത്തെ ഒരു ആഗോള വാണിജ്യ ബ്രാൻഡാക്കി മാറ്റിയതിന്റെ പേരിലാണ് ഷി ‘സിഇഒ സന്യാസി’ എന്ന് വിശേഷിപ്പിക്കപ്പെട്ട് തുടങ്ങിയത്. ആശ്രമത്തെ ആധുനികവൽക്കരിക്കാനുള്ള ഈ ശ്രമം അദ്ദേഹത്തെ ലോകത്തിന്റെ കണ്ണിൽ ഒരു പ്രമുഖ വ്യക്തിയാക്കി മാറ്റി എന്നതിനൊപ്പം തന്നെ വിമർശനങ്ങൾക്കും പാത്രമാക്കി.
ടെമ്പിളിൻ്റെ പവിത്രമായ പൈതൃകത്തെ വാണിജ്യവൽക്കരിക്കുന്നു എന്നാണ് ഷി നേരിട്ട പ്രധാന വിമർശനം. മിക്കപ്പോഴും വിദേശരാജ്യങ്ങളിൽ സന്ദർശനം നടത്തുകയും, കയ്യിൽ ഒരു ഐഫോണുമായി എലിസബത്ത് രാജ്ഞി II, നെൽസൺ മണ്ടേല, ഹെന്റി കിസിംഗർ, ആപ്പിൾ സിഇഒ ടിം കുക്ക് തുടങ്ങിയ പ്രമുഖർക്കൊപ്പം ഫോട്ടോകളിലും വാർത്തകളിലും ഷി പ്രത്യക്ഷപ്പെട്ടു. ഇതെല്ലാം, ‘സിഇഒ സന്യാസി’ എന്ന പേരിൽ ഷിയുടെ ഖ്യാതി വർദ്ധിപ്പിക്കുക മാത്രമാണ് ചെയ്തത്. സന്യാസിമാരും പൗരന്മാരാണെന്നും തങ്ങളുടെ കർത്തവ്യങ്ങൾ പൂർത്തീകരിക്കുന്നതിന് ലഭിക്കുന്ന പാരിതോഷികങ്ങൾ വേണ്ടായെന്ന് വെക്കേണ്ടതില്ല എന്നുമായിരുന്നു അദ്ദേഹത്തിന്റെ വാദം.
