കേന്ദ്ര ധനമന്ത്രി നിർമ്മല സീതാരാമൻ അവതരിപ്പിച്ച 2026-ലെ ബജറ്റ് പ്രസംഗം രാജ്യം വലിയ പ്രതീക്ഷയോടെയാണ് കാതോർത്തത്. ആദായനികുതി സ്ലാബുകളിൽ മാറ്റമില്ലാത്തത് സാധാരണക്കാരെ നിരാശരാക്കിയെങ്കിലും, സൂക്ഷ്മമായി പരിശോധിച്ചാൽ നമ്മുടെ സാമ്പത്തിക ജീവിതത്തെ മാറ്റിമറിക്കാൻ പോകുന്ന അഞ്ച് പ്രധാന പ്രഖ്യാപനങ്ങൾ ഈ ബജറ്റിലുണ്ട്. ടൂറിസം, ആയുർവേദം, ഹൈസ്പീഡ് കോറിഡോറുകൾ എന്നിവയ്ക്ക് മുൻഗണന നൽകുന്നതിനോടൊപ്പം തന്നെ നിക്ഷേപകർക്കും വിദേശത്ത് പണം അയക്കുന്നവർക്കും ഗൗരവകരമായ ചില മാറ്റങ്ങൾ ധനമന്ത്രി മുന്നോട്ടുവെച്ചിട്ടുണ്ട്. ഏപ്രിൽ ഒന്ന് മുതൽ പ്രാബല്യത്തിൽ വരുന്ന ഈ മാറ്റങ്ങൾ ഓരോ വ്യക്തിയും അറിഞ്ഞിരിക്കേണ്ടത് അത്യന്താപേക്ഷിതമാണ്.

നിക്ഷേപ നിയമങ്ങൾ

സ്വർണ നിക്ഷേപകർക്കിടയിൽ ഏറെ പ്രചാരമുള്ള സോവറിൻ ഗോൾഡ് ബോണ്ടുകളുടെ (SGB) നികുതി ആനുകൂല്യങ്ങളിൽ വലിയ മാറ്റമാണ് സർക്കാർ വരുത്തിയിരിക്കുന്നത്. ഇതുവരെ സെക്കൻഡറി മാർക്കറ്റിൽ നിന്ന് വാങ്ങുന്ന ബോണ്ടുകൾക്കും കാലാവധി പൂർത്തിയാകുമ്പോൾ മൂലധന നേട്ട നികുതി (Capital Gain Tax) ഇളവ് ലഭിച്ചിരുന്നു. എന്നാൽ 2026 ഏപ്രിൽ ഒന്ന് മുതൽ ഈ ആനുകൂല്യം ലഭിക്കില്ല. 

ആർബിഐയുടെ പ്രൈമറി ഇഷ്യൂ വഴി നേരിട്ട് ബോണ്ട് വാങ്ങുന്നവർക്ക് മാത്രമേ ഇനി നികുതിയിളവ് ലഭ്യമാകൂ. സ്റ്റോക്ക് എക്സ്ചേഞ്ചുകൾ വഴി ബോണ്ട് വാങ്ങി ലാഭം കൊയ്യാമെന്ന് കരുതുന്നവർക്ക് ഇനി മുതൽ നികുതി ബാധ്യത നേരിടേണ്ടി വരുമെന്ന് ചുരുക്കം.

വിപണി മാറ്റങ്ങൾ

ഓഹരി വിപണിയിലെ ഊഹക്കച്ചവടങ്ങൾക്കും ഫ്യൂച്ചേഴ്സ് ആൻഡ് ഓപ്ഷൻസ് (F&O) വ്യാപാരത്തിനും കടുത്ത നിയന്ത്രണങ്ങൾ ഏർപ്പെടുത്താനാണ് സർക്കാർ ലക്ഷ്യമിടുന്നത്. ഇതിന്റെ ഭാഗമായി സെക്യൂരിറ്റീസ് ട്രാൻസാക്ഷൻ ടാക്സ് (STT) കുത്തനെ വർദ്ധിപ്പിച്ചു. ഫ്യൂച്ചേഴ്സ് വ്യാപാരത്തിലെ ടാക്സ് 0.02 ശതമാനത്തിൽ നിന്ന് 0.05 ശതമാനമായും ഓപ്ഷൻസിലെ ടാക്സ് 0.10 ശതമാനത്തിൽ നിന്ന് 0.15 ശതമാനമായും ഉയർത്തി. 

നിക്ഷേപകർക്ക് ഓരോ ഇടപാടിലും വരുന്ന ചിലവ് വർദ്ധിപ്പിക്കാനും അനാവശ്യമായ റിസ്ക് എടുക്കലുകൾ കുറയ്ക്കാനും ഈ നീക്കം കാരണമാകും. ചെറുകിട നിക്ഷേപകർ ഡെറിവേറ്റീവ് വിപണിയിൽ പണം നഷ്ടപ്പെടുത്തുന്നത് തടയാൻ സെബിയുടെ മുന്നറിയിപ്പുകൾക്ക് പിന്നാലെയാണ് ഈ നടപടി.

സ്വത്ത് ഇടപാടുകൾ

പ്രവാസികളിൽ (NRI) നിന്ന് ഇന്ത്യയിൽ സ്വത്ത് വാങ്ങുന്നവർ നേരിട്ടിരുന്ന സങ്കീർണമായ നിയമനടപടികൾ ലഘൂകരിക്കാൻ പുതിയ ബജറ്റിൽ നിർദ്ദേശമുണ്ട്. മുൻപ് എൻആർഐകളിൽ നിന്ന് വസ്തു വാങ്ങുമ്പോൾ ടിഡിഎസ് (TDS) അടയ്ക്കുന്നതിനായി വാങ്ങുന്നയാൾ പ്രത്യേകമായി ടാൻ (TAN) നമ്പർ എടുക്കേണ്ടി വരുമായിരുന്നു. 

എന്നാൽ പുതിയ നിയമപ്രകാരം ടാൻ നമ്പറിന്റെ ആവശ്യമില്ല. സാധാരണ ഇന്ത്യൻ പൗരന്മാരിൽ നിന്ന് സ്വത്ത് വാങ്ങുമ്പോൾ പാൻ  കാർഡ് ഉപയോഗിക്കുന്നത് പോലെ തന്നെ ഇനി പ്രവാസികളുമായുള്ള ഇടപാടുകളും നടത്താം. ഇത് റിയൽ എസ്റ്റേറ്റ് മേഖലയിലെ പേപ്പർ ജോലികൾ കുറയ്ക്കുകയും ഇടപാടുകൾ വേഗത്തിലാക്കുകയും ചെയ്യും.

ക്രിപ്റ്റോ നിയന്ത്രണം

ക്രിപ്റ്റോ കറൻസി നിക്ഷേപങ്ങളെ കൂടുതൽ കർശനമായി നിരീക്ഷിക്കാനാണ് സർക്കാർ തീരുമാനം. ഡിജിറ്റൽ അസറ്റുകളെ സംബന്ധിച്ച വിവരങ്ങൾ നികുതി അധികൃതർക്ക് നൽകാതിരിക്കുകയോ തെറ്റായ വിവരങ്ങൾ നൽകുകയോ ചെയ്താൽ കനത്ത പിഴ ഈടാക്കും. 2026 ഏപ്രിൽ ഒന്ന് മുതൽ ക്രിപ്റ്റോ ഇടപാടുകൾ വെളിപ്പെടുത്താത്ത പക്ഷം ഓരോ ദിവസവും 200 രൂപ വീതം പിഴ നൽകേണ്ടി വരും. തെറ്റായ വിവരങ്ങൾ നൽകുന്നവർക്ക് 50,000 രൂപ വരെ പിഴ ചുമത്താനും നിയമം വിഭാവനം ചെയ്യുന്നു. ക്രിപ്റ്റോ വിപണിയെ സുതാര്യമാക്കാനും കള്ളപ്പണം വെളുപ്പിക്കുന്നത് തടയാനും ലക്ഷ്യമിട്ടാണ് ഈ മാറ്റം.

വിദേശ സഹായം

വിദേശത്ത് ഉപരിപഠനം നടത്തുന്ന വിദ്യാർത്ഥികൾക്കും ചികിത്സ തേടുന്നവർക്കും വലിയ ആശ്വാസം നൽകുന്ന പ്രഖ്യാപനവും ബജറ്റിലുണ്ട്. ലിബറലൈസ്ഡ് റെമിറ്റൻസ് സ്കീം (LRS) പ്രകാരം വിദേശത്തേക്ക് പണം അയക്കുമ്പോൾ ഈടാക്കുന്ന ടാക്സ് കളക്റ്റഡ് അറ്റ് സോഴ്സ് (TCS) അഞ്ച് ശതമാനത്തിൽ നിന്ന് രണ്ട് ശതമാനമായി കുറച്ചു. പത്ത് ലക്ഷം രൂപയ്ക്ക് മുകളിലുള്ള കൈമാറ്റങ്ങൾക്കാണ് ഈ ഇളവ് ബാധകമാവുക. 

ഇത് വിദേശ പഠനത്തിന് പോകുന്ന ലക്ഷക്കണക്കിന് ഇന്ത്യൻ വിദ്യാർത്ഥികളുടെ കുടുംബങ്ങൾക്ക് സാമ്പത്തിക ഭാരം കുറയ്ക്കാൻ സഹായിക്കും. ഈ തുക പിന്നീട് ആദായനികുതി റിട്ടേൺ ഫയൽ ചെയ്യുമ്പോൾ നികുതി ബാധ്യതയുമായി ക്രമീകരിക്കാൻ സാധിക്കുമെന്നതും ശ്രദ്ധേയമാണ്.