ഹൈദരാബാദ്: ബിജെപിയുമായി ബിആർഎസ് സഖ്യമുണ്ടാക്കാനോ അല്ലെങ്കിൽ പാർട്ടിയിൽ ലയിക്കാനോ ബിആർഎസ് നേതാവ് കെ.ടി. രാമറാവു തയ്യാറായിരുന്നതായി ബിജെപി എംപിയുടെ അവകാശവാദം. സഹോദരി കെ. കവിതക്കെതിരായ ഇഡി, സിബിഐ അന്വേഷണം അവസാനിപ്പിച്ചാൽ ബിജെപിയുമായി സഖ്യമുണ്ടാക്കാനോ പാർട്ടിയിൽ ലയിക്കാനോ തയ്യാറാണെന്നാണ് ബിആർസ് വർക്കിങ് പ്രസിഡന്റായ കെ.ടി. രാമറാവു നൽകിയ വാഗ്ദാനമെന്നാണ് ബിജെപി എംപി സി.എം. രമേഷ് ആരോപിച്ചത്. ഇതുമായി ബന്ധപ്പെട്ട് കെ.ടി. രാമറാവുവിനെ ബിജെപി എംപി വെല്ലുവിളിക്കുകയും ചെയ്തിട്ടുണ്ട്.
ഡൽഹിയിൽ തന്റെ വീട്ടിലെത്തിയത് കെടിആർ മറന്നുപോയോ എന്നായിരുന്നു ബിജെപി എംപി രമേഷിന്റെ ചോദ്യം. ”അതെല്ലാം സിസിടിവിയിൽ റെക്കോഡായിട്ടുണ്ട്. എനിക്കത് മാധ്യമങ്ങളുമായി പങ്കുവെയ്ക്കാനും കഴിയും. കവിതയ്ക്കും മറ്റുള്ളവർക്കും എതിരായ ഇഡി, സിബിഐ അന്വേഷണം അവസാനിപ്പിക്കാൻ ആവശ്യപ്പെട്ടില്ലേ? ആഭ്യന്തരമന്ത്രിയുമായി സംസാരിക്കാൻ ആവശ്യപ്പെട്ടില്ലേ? അന്വേഷണം അവസാനിപ്പിക്കുകയാണെങ്കിൽ ബിആർഎസ് ബിജെപിയിൽ ലയിക്കാമെന്ന് പറഞ്ഞില്ലേ?”, രമേഷ് ചോദിച്ചു.
അതേസമയം, ബിജെപി എംപിയുടെ ആരോപണങ്ങളും അവകാശവാദങ്ങളും കെ.ടി. രാമറാവു നിഷേധിച്ചു. ബിആർഎസ് ഒരിക്കലും മറ്റൊരു പാർട്ടിയുമായി ലയിക്കില്ല. തെലങ്കാനയ്ക്ക് വേണ്ടി ജന്മംനൽകിയ പാർട്ടിയാണിത്. സംസ്ഥാനത്തിന്റെ ക്ഷേമത്തിന് വേണ്ടി തുടർന്നും ഈ പാർട്ടി പ്രവർത്തിക്കും. ഇത്തരം അഭ്യൂഹങ്ങൾ പ്രചരിപ്പിക്കുന്നതിന് പിന്നിൽ കോൺഗ്രസും ബിജെപിയുമാണ്. അവരുടെ അഴിമതി ഇടപാടുകൾ പുറത്തുവന്നപ്പോൾ അതിൽനിന്ന് ശ്രദ്ധതിരിക്കാനാണ് ഇത്തരം അഭ്യൂഹങ്ങൾ പ്രചരിപ്പിക്കുന്നതെന്നും അദ്ദേഹം ആരോപിച്ചു.
