ദുബായി: പശ്ചിമേഷ്യൻ മേഖലയിൽ ആക്രമണം തുടർന്ന് ഇറാൻ. ദുബായി വിമാനത്താവളത്തിന് നേരെ നടത്തിയ ഡ്രോൺ ആക്രമണത്തിൽ തീപിടിത്തമുണ്ടായതായി റിപ്പോർട്ടുകൾ പുറത്തുവരുന്നു. ഡ്രോൺ അവശിഷ്ടങ്ങൾ പതിച്ചാണ് തീപിടിത്തമുണ്ടായത്.
വിമാനത്താവളത്തിലെ എണ്ണടാങ്കിനാണ് തീപിടിച്ചത്. തീ കെടുത്താനും സുരക്ഷ ഉറപ്പാക്കാനുമുള്ള നടപടി പുരോഗമിക്കുന്നുവെന്ന് അധികൃതർ അറിയിച്ചു. സംഭവത്തിൽ ആർക്കും പരിക്കില്ലെന്നും അധികൃതര് വ്യക്തമാക്കുന്നു.
അതേസമയം സൗദി അറേബ്യയ്ക്ക് നേരെ കഴിഞ്ഞ രാത്രിയും ആക്രമണമുണ്ടായതായി റിപ്പോർട്ടുകളുണ്ട്. കിഴക്കൻ പ്രവിശ്യക്ക് നേരെ വന്ന 37 ഡ്രോണുകൾ പ്രതിരോധ സേന തകർത്തതായാണ് പുറത്തുവരുന്ന വിവരം.
ഇറാൻ ഉടൻ ആക്രമണം അവസാനിപ്പിക്കണമെന്ന് ആവശ്യപ്പെട്ട് യുഎഇയും സൗദി അറേബ്യയും രംഗത്തെത്തിയിട്ടുണ്ട്. ഇതുസംബന്ധിച്ച് യുഎഇ പ്രസിഡന്റും സൗദി കിരീടാവകാശിയും തമ്മിൽ ഫോണിൽ ചർച്ച നടത്തി.
