തിരുവനന്തപുരം ഗ്രീന്ഫീല്ഡ് സ്റ്റേഡിയത്തില് ആരംഭിച്ച കേരള ക്രിക്കറ്റ് ലീഗിലെ (Kerala Cricket League) ആദ്യ പോരാട്ടത്തില് ആലപ്പി റിപ്പ്ള്സ് (Alleppey Ripples) അഞ്ച് വിക്കറ്റിന് തൃശൂര് ടൈറ്റന്സിനെ (Thrissur Titans) തോല്പ്പിച്ചു. തൃശൂര് 20 ഓവറില് 8 വിക്കറ്റ് നഷ്ടത്തില് 161 റണ്സെടുത്തപ്പോള് ആലപ്പി 18.3 ഓവറില് അഞ്ച് വിക്കറ്റ് നഷ്ടത്തില് ലക്ഷ്യം മറികടന്നു. 47 പന്തില് 92 റണ്സെടുത്ത മുന് ആര്സിബി താരം മുഹമ്മദ് അസ്ഹറുദ്ദീനാണ് ആലപ്പിയുടെ വിജയശില്പി.
20 ഓവറില് 162 റണ്സ് വിജയലക്ഷ്യവുമായി ബാറ്റിങിന് ഇറങ്ങിയ ആലപ്പിക്ക് വേണ്ടി ക്യാപ്റ്റനും വിക്കറ്റ് കീപ്പര് ബാറ്ററുമായ മുഹമ്മദ് അസ്ഹറുദ്ദീനും കൃഷ്ണപ്രസാദുമാണ് ഇന്നിങ്സ് ഓപണ് ചെയ്തത്. കൃഷ്ണപ്രസാദ് ഒരു റണ്സുമായി മിഥുന്റെ പന്തില് ക്ലീന് ബൗള്ഡായി. വണ്ഡൗണായെത്തിയ അക്ഷയ് ശിവ് മൂന്ന് റണ്സ് മാത്രമാണ് നേടിയത്.
എന്നാല് മൂന്നാം വിക്കറ്റില് അസ്ഹറുദ്ദീനും വിനൂപ് മനോഹരനും ഒന്നിച്ചതോടെ ആലപ്പിക്ക് കാര്യങ്ങള് എളുപ്പമായി. 51 പന്തില് 84 റണ്സ് നേടിയ ശേഷമാണ് സഖ്യം വേര്പിരിഞ്ഞത്. 27 പന്തില് 30 റണ്സുമായാണ് വിനൂപ് മടങ്ങിയത്.
നാലാമതായി അസ്ഹറുദ്ദീന് പുറത്താവുമ്പോള് സ്കോര് ബോര്ഡ് 139ലെത്തുകയും വിജയം ഉറപ്പാവുകയും ചെയ്തിരുന്നു. 47 പന്തില് ഒമ്പത് സിക്സറുകളുടെയും മൂന്ന് ഫോറുകളുടെയും സഹായത്തോടെയാണ് അസ്ഹറുദ്ദീന് 92 റണ്സ് നേടിയത്. വിനോദ് സ്വന്തം പന്തില് പിടികൂടിയതോടെ അസ്ഹറുദ്ദീന് എട്ട് റണ്സ് അകലെ സെഞ്ചുറി നഷ്ടമാവുകയായിരുന്നു. ആല്ഫി ഫ്രാന്സിസ് 12 റണ്സിന് പുറത്തായെങ്കിലും അക്ഷയ് പുറത്താവാതെ 18 റണ്സ് നേടിയതോടെ ആദ്യ വിജയം ആലപ്പിക്ക് സ്വന്തമായി.
നേരത്തേ, ടോസ് നേടിയ ആലപ്പി റിപ്പ്ള്സ് ഫീല്ഡിങ് തെരഞ്ഞെടുക്കുകയായിരുന്നു. ആദ്യം ബാറ്റിങിന് ഇറങ്ങിയ തൃശൂരിന് വേണ്ടി അക്ഷയ് മനോഹര് ആണ് കൂടുതല് റണ്സ് നേടിയത്. 44 പന്തില് 5 സിക്സുകള് സഹിതം അക്ഷയ് 57 റണ്സ് നേടി. വിഷ്ണു വിനോദ് (22), അഹമദ് ഇമ്രാന് (23), അര്ജുന് വേണുഗോപാല് (20) എന്നിവരും തിളങ്ങി.
ബൗളിങില് ആനന്ദ് ജോസഫ് ആണ് ആലപ്പിക്കായി മികച്ച പ്രകടനം കാഴ്ചവച്ചത്. നാല് ഓവറില് 32 റണ്സിന് ആനന്ദ് ജോസഫ് മൂന്ന് വിക്കറ്റുകള് വീഴ്ത്തി. ഫാസില് ഫനൂസ് മൂന്ന് ഓവറില് രണ്ട് വിക്കറ്റുകള് നേടി. ആല്ഫി ഫ്രാന്സിസ്, അക്ഷയ് ചന്ദ്രന്, പി വിഘ്നേഷ് എന്നിവര് ഓരോ വിക്കറ്റെടുത്തു.
ഈ മത്സരത്തിന് ശേഷം കേരള ക്രിക്കറ്റ് ലീഗിന്റെ വര്ണാഭമായ ഉദ്ഘാടന ചടങ്ങുകള്ക്ക് തുടക്കമായി. 60ഓളം കലാകാരന്മാര് ചേര്ന്നൊരുക്കുന്ന ദൃശ്യവിരുന്നാണ് ഇതില് പ്രധാനം. ലീഗിന്റെ ബ്രാന്ഡ് അംബാസഡര് കൂടിയായ നടന് മോഹന്ലാല് ഉദ്ഘാടനം ചെയ്യും. ഇന്നത്തെ രണ്ടാം മല്സരം ട്രിവാന്ഡ്രം റോയല്സും കൊച്ചി ബ്ലൂ ടൈഗേഴ്സും തമ്മിലാണ്.
