തമിഴകത്തിന്റെ പ്രിയപ്പെട്ട താരങ്ങളിൽ ഒരാളാണ് അജിത്ത്. ഒരു ഫുൾ-ടൈം റേസിംഗ് ഡ്രൈവർ കൂടിയാണ് അജിത്. അടുത്തിടെ ഒരു അഭിമുഖത്തിൽ തന്റെ കരിയർ, പ്രശസ്തി, പ്രത്യാഘാതങ്ങൾ, കുടുംബം എന്നിവയെക്കുറിച്ച് അജിത് പറഞ്ഞ കാര്യങ്ങളാണ് ശ്രദ്ധ നേടുന്നത്. തന്റെ കരിയറിനോടും അതു തന്ന പ്രശസ്തിയോടും താൻ നന്ദിയുള്ളവനാണെങ്കിലും, അതിന് വലിയ ത്യാഗം ആവശ്യമാണെന്ന് അജിത് പറഞ്ഞു. ഹോളിവുഡ് റിപ്പോർട്ടർ ഇന്ത്യക്ക് നൽകിയ അഭിമുഖത്തിലാണ് അജിത് മനസ്സുതുറന്നത്.
സിനിമയിലെ തന്റെ തുടക്കക്കാലം അജിത് ഓർത്തെടുത്തു, ഒരുകാലത്ത് തനിക്ക് ശരിയായ രീതിയിൽ തമിഴ് സംസാരിക്കാൻ പോലും കഴിഞ്ഞിരുന്നില്ലെന്ന് അജിത് പറഞ്ഞു.
എനിക്ക് ഭാഷ ശരിയായി സംസാരിക്കാൻ കഴിഞ്ഞിരുന്നില്ല. എന്റെ തമിഴ് സംസാരശൈലി വേറെയായിരുന്നു. പക്ഷേ പിന്നീട് ഞാനത് ശരിയാക്കിയെടുത്തു,” അജിത് ഓർക്കുന്നു. പേര് മാറ്റാൻ ആളുകൾ തന്നോട് ആവശ്യപ്പെട്ടിരുന്നു എന്നും അജിത് വെളിപ്പെടുത്തി. “തുടക്കത്തിൽ എന്റെ പേര് മാറ്റാൻ എന്നോട് പലരും ആവശ്യപ്പെട്ടിരുന്നു. കാരണം അതൊരു സാധാരണ പേരായി അവർക്ക് തോന്നി. പക്ഷേ, എനിക്ക് മറ്റൊരു പേരും വേണ്ടെന്ന് ഞാൻ നിർബന്ധം പിടിച്ചു.”
ശരിയായ ടീമിനെ ഉണ്ടാക്കിയതും വിജയിക്കാനുള്ള ആഗ്രഹവും തന്റെ അഭിനയ- റേസിംഗ് കരിയറുകൾക്ക് ഒരുപോലെ പ്രധാനമാണെന്ന് അജിത് പറയുന്നു. “ചെയ്യുന്ന എല്ലാ കാര്യങ്ങളിലും ഞാനെന്റെ ഹൃദയവും ആത്മാവും നൽകുന്നു. ധാരാളം വെല്ലുവിളികൾ ഉണ്ടായിരുന്നു. ഞാൻ എല്ലാം തരണം ചെയ്തു. റേസിംഗിന്റെ കാര്യത്തിലാണെങ്കിൽ പോലും. ഒരു കരിയർ പടുത്തുയർത്താൻ ആഗ്രഹിക്കുന്ന 19 വയസ്സുകാരനെപ്പോലെ ഞാൻ കഠിനാധ്വാനം ചെയ്യുന്നുണ്ടാകാം. നിങ്ങൾ ശരിയായ ടീമിനെ ഒരുമിപ്പിക്കേണ്ടതുണ്ട്. ഞാൻ പ്രവർത്തിക്കുന്ന സംവിധായകർ, നിർമ്മാതാക്കൾ, സാങ്കേതിക വിദഗ്ധർ എന്നിവരെയെല്ലാം ലഭിച്ചതിൽ ഞാൻ വളരെ ഭാഗ്യവാനാണ്. അവരിൽ നിന്ന് ഞാൻ ഒരുപാട് പഠിക്കുന്നു.”
സിനിമകളിൽ വർക്ക് ചെയ്യുന്നതിനിടെ ഉണ്ടായ അപകടങ്ങളിലും മറ്റുമായി താൻ 29 ശസ്ത്രക്രിയകൾക്ക് വിധേയനായിട്ടുണ്ടെന്നും അജിത് വെളിപ്പെടുത്തി. തന്റെ എല്ലാ വിജയത്തിനും അജിത് ഭാര്യ ശാലിനിയോടാണ് കടപ്പെട്ടിരിക്കുന്നത്.
