അഫ്ഗാനിസ്ഥാനിലെ കിഴക്കന് പ്രവിശ്യകളില് ചൊവ്വാഴ്ച പാക്കിസ്ഥാന് നടത്തിയ വ്യോമാക്രമണത്തിന് തക്ക സമയത്ത് ഉചിതമായി മറുപടി നല്കുമെന്ന് താലിബാന്. അഫ്ഗാനിസ്ഥാനിലെ പാക്ടിക, ഖോസ്ക്, കുനാര് പ്രവിശ്യകളില് പാകിസ്ഥാന് സേന നടത്തിയ വ്യോമാക്രമണങ്ങള്, അഫ്ഗാനിസ്ഥാന്റെ പരമാധികാരത്തിന്മേലുള്ള കടന്നാക്രമണമാണെന്ന് താലിബാന് വക്താവ് സബീഹുള്ള മുജാഹിദ് സമൂഹ മാധ്യമത്തില് പോസ്റ്റ് ചെയ്ത പ്രസ്താവനയില് പറഞ്ഞു.
ആക്രമണത്തെ ഇസ്ലാമിക് എമിറേറ്റ് ശക്തമായി അപലപിക്കുന്നു. തങ്ങളുടെ വ്യോമാതിര്ത്തിയും ഭൂപ്രദേശവും ജനങ്ങളെയും സംരക്ഷിക്കേണ്ടത് തങ്ങളുടെ അവകാശമാണെന്നും സബീഹുള്ള പ്രസ്താവനയില് പറഞ്ഞു. അഫ്ഗാനില് ചൊവ്വാഴ്ച പുലര്ച്ചെ മൂന്നോടെ പാക്കിസ്ഥാന് നടത്തിയ ബോംബാക്രമത്തില് ഒന്പത് കുട്ടികളും ഒരു സ്ത്രീയും കൊല്ലപ്പെട്ടെന്ന് താലിബാന് വക്താവ് സ്ഥിരീകരിച്ചു.
