ആഗോള ഊർജ്ജ വിപണിയെയും പതിറ്റാണ്ടുകളായുള്ള വ്യാപാര സമവാക്യങ്ങളെയും അട്ടിമറിച്ചുകൊണ്ട്, ലോകത്തിലെ ഏറ്റവും വലിയ അസംസ്കൃത എണ്ണ കയറ്റുമതി രാജ്യമായി (World’s Largest Oil Exporter) അമേരിക്ക മാറിയതായി പുതിയ അന്താരാഷ്ട്ര റിപ്പോർട്ടുകൾ. പശ്ചിമേഷ്യയിൽ വാഷിംഗ്ടണും ഇറാനും തമ്മിൽ തുടരുന്ന കടുത്ത സൈനിക യുദ്ധത്തിന്റെ പശ്ചാത്തലത്തിലാണ് ദശാബ്ദങ്ങളായി സൗദി അറേബ്യയും റഷ്യയും ആധിപത്യം പുലർത്തിയിരുന്ന എണ്ണ വിപണിയിൽ അമേരിക്ക ഒന്നാം സ്ഥാനം പിടിച്ചടക്കിയത്.
മുൻപ് മിഡിൽ ഈസ്റ്റിൽ നിന്നുള്ള എണ്ണ ഇറക്കുമതിയെ മാത്രം പൂർണ്ണമായി ആശ്രയിച്ചിരുന്ന ഒരു രാജ്യം ഇപ്പോൾ ആഗോള വിപണിയുടെ തലപ്പത്ത് എത്തിയത് വലിയൊരു നയതന്ത്ര-സാമ്പത്തിക വഴിത്തിരിവായാണ് വിലയിരുത്തപ്പെടുന്നത്. ഷിപ്പ് ട്രാക്കിംഗ് സേവനമായ ‘വോർട്ടെക്സ’ (Vortexta) പുറത്തുവിട്ട ഏറ്റവും പുതിയ മെയ് മാസത്തിലെ കണക്കുകൾ പ്രകാരം, അമേരിക്കയുടെ ക്രൂഡ് ഓയിലും ഇന്ധന കയറ്റുമതിയും പ്രതിദിനം 10.5 ദശലക്ഷം (1.05 കോടി) ബാരലായി കുതിച്ചുയർന്നു. തുടർച്ചയായ മൂന്നാം മാസമാണ് അമേരിക്ക ഈ ഒന്നാം സ്ഥാനം നിലനിർത്തുന്നത്.
അമേരിക്കൻ വിപണിയിലെ റെക്കോർഡ് ഷെയ്ൽ (Shale) ഉത്പാദനവും ആഭ്യന്തര വില നിയന്ത്രിക്കാനായി തങ്ങളുടെ തന്ത്രപ്രധാന കരുതൽ ശേഖരം (SPR) വൻതോതിൽ പുറത്തുവിട്ടതുമാണ് യുഎസിനെ ഈ നേട്ടത്തിന് അർഹമാക്കിയത്. അതേസമയം, ഫെബ്രുവരി മുതൽ പുകയുന്ന യുഎസ്-ഇറാൻ യുദ്ധവും ഹോർമുസ് കടലിടുക്കിന്റെ ഭാഗികമായ അടച്ചുപൂട്ടലും കാരണം സൗദി അറേബ്യയുടെ എണ്ണ വിതരണം പ്രതിദിനം 5.9 ദശലക്ഷം ബാരലിലേക്ക് കുത്തനെ ഇടിഞ്ഞു. ഉക്രൈന്റെ ഡ്രോൺ ആക്രമണങ്ങളും പാശ്ചാത്യ രാജ്യങ്ങളുടെ ഉപരോധങ്ങളും നേരിടുന്ന റഷ്യയുടെ കയറ്റുമതി 7 ദശലക്ഷം ബാരലായി ചുരുങ്ങുകയും ചെയ്തു.
എണ്ണ വിപണിയിലെ ഈ യുഎസ് മുന്നേറ്റം, ഒപെക് (OPEC) കൂട്ടായ്മയ്ക്ക് ആഗോള വിപണിയിലെ വില നിശ്ചയിക്കുന്നതിൽ ഉണ്ടായിരുന്ന പരമാധികാരത്തെ വലിയ രീതിയിൽ ദുർബലപ്പെടുത്തും. സാമ്പത്തിക-സൈനിക മേധാവിത്വത്തിന് പുറമെ ലോകത്തെ ഏറ്റവും വലിയ ഊർജ്ജ വിതരണക്കാരാവുക വഴി അന്താരാഷ്ട്ര തലത്തിൽ തങ്ങളുടെ സഖ്യകക്ഷികൾക്കും ശത്രുക്കൾക്കും മേൽ വലിയൊരു നയതന്ത്ര സ്വാധീനം ചെലുത്താൻ പുതിയ യുഎസ് പ്രസിഡന്റ് ഡൊണാൾഡ് ട്രംപിന്റെ ഭരണകൂടത്തിന് സാധിക്കുമെന്നാണ് പ്രതിരോധ വിദഗ്ദ്ധർ ചൂണ്ടിക്കാണിക്കുന്നത്.
