ഇന്ദിരാഗാന്ധി അന്താരാഷ്ട്ര വിമാനത്താവളത്തിൽ ഇന്നലെ ആഞ്ഞുവീശിയ അതിശക്തമായ കാറ്റിലും മഴയിലും ഗ്രൗണ്ട് സപ്പോർട്ട് ഉപകരണങ്ങൾ ഇടിച്ചതിനെ തുടർന്ന് മൂന്ന് എയർ ഇന്ത്യാ വിമാനങ്ങൾക്ക് കേടുപാടുകൾ സംഭവിച്ചു. ടെർമിനൽ രണ്ടിന് സമീപമുള്ള വിമാന പാർക്കിംഗ് ബേകളിൽ ഞായറാഴ്ച വൈകുന്നേരം 4.40-ഓടെയാണ് അപ്രതീക്ഷിതമായ കാലാവസ്ഥാ വ്യതിയാനത്തെത്തുടർന്ന് അപകടമുണ്ടായത്.
ശക്തമായ കാറ്റും മഴയും മൂലം എയർ ഇന്ത്യ, ഇൻഡിഗോ ഗ്രൗണ്ട് ഹാൻഡ്ലിംഗ്, എഞ്ചിനീയറിംഗ് ടീമുകളുടെ പടി ഗോവണികളും ട്രെസ്റ്റലുകളും തകർന്നു. കാറ്റിൽ നിയന്ത്രണം വിട്ട ഗ്രൗണ്ട് ഉപകരണങ്ങൾ പാർക്ക് ചെയ്തിരുന്ന വിമാനങ്ങളിൽ ഇടിക്കുകയായിരുന്നു.
അപകടത്തിന് ശേഷം കേടായ ഉപകരണങ്ങളും വിമാനവും ഉദ്യോഗസ്ഥർ പരിശോധിക്കുന്ന ദൃശ്യങ്ങൾ പുറത്തുവന്നു. കൊടുങ്കാറ്റിൽ സ്റ്റെപ്പ്ലാഡർ വിമാനത്തിന് നേരെ ഉരുണ്ടുനീങ്ങുന്നതും, അതിനെ നിയന്ത്രിക്കാനായി ഉദ്യോഗസ്ഥർ ഓടുന്നതും സമൂഹ മാധ്യമങ്ങളിൽ വൈറലായ വീഡിയോയിൽ കാണാം.
വിശദമായ പരിശോധനയ്ക്കായി മൂന്ന് എയർ ഇന്ത്യാ എയർബസ് എ320 വിമാനങ്ങളെ ഉടൻ തന്നെ സർവീസിൽ നിന്ന് പിൻവലിച്ചെന്ന് എയർ ഇന്ത്യ അറിയിച്ചു. ഇതിൽ രണ്ട് വിമാനങ്ങൾ ഏതാനും ദിവസങ്ങൾക്കുള്ളിൽ പ്രവർത്തനക്ഷമമാകാൻ സാധ്യതയുണ്ട്. എന്നാൽ ഒരു വിമാനത്തിന് കാര്യമായ കേടുപാടുകൾ സംഭവിച്ചതിനാൽ അത് വീണ്ടും പ്രവർത്തനക്ഷമമാക്കാൻ കൂടുതൽ സമയം വേണ്ടിവരുമെന്നാണ് റിപ്പോർട്ടുകൾ വ്യക്തമാക്കുന്നത്.
എയർ ട്രാഫിക് കൺട്രോൾ, വിമാനത്താവള ഓപ്പറേറ്റർക്കോ വിമാനക്കമ്പനികൾക്കോ മുൻകൂട്ടി കാലാവസ്ഥാ മുന്നറിയിപ്പ് നൽകിയിട്ടില്ലെന്ന് ഡിഐഎഎൽ ഒരു പ്രസ്താവനയിൽ അറിയിച്ചു. ഇത്തരം മുന്നറിയിപ്പുകൾ ലഭിച്ചിരുന്നെങ്കിൽ ഉപകരണങ്ങൾ സുരക്ഷിതമാക്കാനും ആവശ്യമായ മുൻകരുതലുകൾ സ്വീകരിക്കാനും സാധിക്കുമായിരുന്നുവെന്ന് വിമാനക്കമ്പനികളും ഗ്രൗണ്ട് ഹാൻഡ്ലിംഗ് ഏജൻസികളും വ്യക്തമാക്കി.
