എംപ്ലോയീസ് പ്രൊവിഡന്റ് ഫണ്ട് ഓർഗനൈസേഷൻ (EPFO) തങ്ങളുടെ ഏഴ് കോടിയോളം വരുന്ന അംഗങ്ങൾക്കായി ക്ലെയിം സെറ്റിൽമെന്റ് നടപടികൾ കൂടുതൽ ലളിതമാക്കുന്നു. ഇതിന്റെ ഭാഗമായി ഫൈനൽ പിഎഫ് ഫണ്ട് സെറ്റിൽമെന്റ് ഓട്ടോമേറ്റഡ് (Automated) ആക്കാനുള്ള തയ്യാറെടുപ്പുകൾ നടക്കുകയാണ്. ഇത് നടപ്പിലാകുന്നതോടെ ജോലി വിട്ടതിനുശേഷം പിഎഫ് തുക ബാങ്ക് അക്കൗണ്ടുകളിലേക്ക് വേഗത്തിൽ കൈമാറാൻ സാധിക്കും.
നിലവിൽ അഞ്ച് ലക്ഷം രൂപ വരെയുള്ള ഭാഗികമായോ അഡ്വാൻസ് ആയോ ഉള്ള ക്ലെയിമുകൾ മാത്രമാണ് ഓട്ടോമാറ്റിക് രീതിയിൽ സെറ്റിൽ ചെയ്യുന്നത്. ഇതിനായി മൂന്ന് ദിവസത്തെ സമയപരിധിയാണ് നിശ്ചയിച്ചിരിക്കുന്നത്. പുതിയ മാറ്റം വരുന്നതോടെ മുഴുവൻ പിഎഫ് തുകയും പിൻവലിക്കാൻ അംഗങ്ങൾ ഇനി ദീർഘകാലം കാത്തിരിക്കേണ്ടി വരില്ല.
