ഇറാനെ ശിലായുഗത്തിലേക്ക് മടക്കുമെന്ന കടുത്ത മുന്നറിയിപ്പുമായി ഇസ്രായേല് പ്രതിരോധ മന്ത്രി ഇസ്രായേല് കാറ്റ്സ് രംഗത്തെത്തി. ഇറാൻ്റെ ഊർജ്ജ, വൈദ്യുതി നിലയങ്ങൾ ലക്ഷ്യമിട്ട് ആക്രമണം നടത്തുമെന്നും രാജ്യത്തിൻ്റെ സാമ്പത്തിക അടിസ്ഥാന സൗകര്യങ്ങൾ പൂർണ്ണമായും തകർക്കുമെന്നും അദ്ദേഹം പറഞ്ഞു. പശ്ചിമേഷ്യയിൽ യുദ്ധഭീതി അതീവ ഗുരുതരമായി തുടരുന്ന സാഹചര്യത്തിലാണ് ഇസ്രായേലിൻ്റെ ഭാഗത്തുനിന്നുള്ള ഈ പ്രകോപനപരമായ പ്രസ്താവന. അൽ ജസീറയാണ് ഇസ്രായേല് പ്രതിരോധ മന്ത്രിയെ ഉദ്ധരിച്ച് ഈ വാർത്ത പുറത്തുവിട്ടത്.
ഇറാൻ്റെ സാമ്പത്തിക അടിത്തറ തകർക്കുക എന്ന ലക്ഷ്യത്തോടെയാണ് ഇസ്രായേല് പുതിയ സൈനിക തന്ത്രങ്ങൾ മെനയുന്നത്. ഊർജ്ജ ഉൽപ്പാദന കേന്ദ്രങ്ങളും വൈദ്യുതി നിലയങ്ങളും തകർക്കുന്നതിലൂടെ ഇറാനെ പൂർണ്ണമായും നിശ്ചലമാക്കാൻ കഴിയുമെന്നാണ് ഇസ്രായേലിൻ്റെ കണക്കുകൂട്ടൽ. ഇതിനകം തന്നെ വിവിധ മേഖലകളിൽ സംഘർഷം നിലനിൽക്കുന്ന പശ്ചിമേഷ്യയിൽ, കാറ്റ്സിൻ്റെ ഈ പ്രസ്താവന പുതിയ യുദ്ധമുഖം തുറക്കുമോ എന്ന ആശങ്കയിലാണ് ലോകരാജ്യങ്ങൾ. ഹോർമുസ് കടലിടുക്കിൻ്റെ നിയന്ത്രണത്തെ ചൊല്ലിയുള്ള അമേരിക്ക-ഇറാൻ തർക്കങ്ങൾക്കിടയിലാണ് ഇസ്രായേലിൻ്റെ ഈ കടന്നാക്രമണം.
ഇറാനെതിരെ ഇത്തരമൊരു കടുത്ത നീക്കം നടത്തിയാൽ അത് മേഖലയിൽ വലിയ പ്രത്യാഘാതങ്ങൾ ഉണ്ടാക്കുമെന്ന് രാഷ്ട്രീയ നിരീക്ഷകർ മുന്നറിയിപ്പ് നൽകുന്നു. ഊർജ്ജ മേഖലയെ ലക്ഷ്യമിട്ടുള്ള ആക്രമണങ്ങൾ ഇറാനിലെ സാധാരണ ജനജീവിതത്തെ സാരമായി ബാധിക്കും. ഇസ്രായേലിൻ്റെ ഭീഷണിക്ക് ഇറാൻ എത്തരത്തിൽ മറുപടി നൽകുമെന്നാണ് അന്താരാഷ്ട്ര സമൂഹം ഉറ്റുനോക്കുന്നത്. നേരത്തെ ഇസ്രായേല് നടത്തിയ സൈനിക നീക്കങ്ങൾക്ക് ഇറാൻ തിരിച്ചടി നൽകിയിരുന്നു. പുതിയ സാഹചര്യത്തിൽ യുദ്ധഭീതി ഒഴിവാക്കാൻ നയതന്ത്ര ശ്രമങ്ങൾ ഊർജ്ജിതമാക്കണമെന്ന് വിവിധ സംഘടനകൾ ആവശ്യപ്പെട്ടു.
