മുംബൈ: മഹാരാഷ്ട്രയിലെ റയ്ഗാഡിൽ ഇർഷാൽഗാഡ് കോട്ടയിലെയ്ക്ക് ട്രക്കിംഗിന് പോയ യുവാവ് 400 അടി താഴ്ചയിലേയ്ക്ക് വീണ് മരിച്ചു. ഭീവണ്ടി സ്വദേശി ആകാശ് രാജേന്ദ്ര വാഗ്മോഡെ (26) യാണ് മരിച്ചത്.
ഒരു സ്വകാര്യ സ്ഥാപനത്തിൽ ജോലി ചെയ്തു വരികയായിരുന്നു ആകാശ്. ട്രക്കിംഗിനായി മലയടിവാരത്തിൽ തന്റെ ഇരുചക്രവാഹനം നിർത്തിയിട്ട ശേഷം അദ്ദേഹം മല കയറാനായി പോവുകയും യാത്രക്കിടെ കാൽ വഴുതി താഴേയ്ക്ക് വീഴുകയുമായിരുന്നു.
ലോണാവാലിയിൽ നിന്നുള്ള പ്രത്യേക സംഘത്തെ തിരച്ചിലിനായി നിയോഗിച്ചുവെങ്കിലും പരാജയപ്പെട്ടതിനെ തുടർന്ന് പോലീസും മറ്റ് രക്ഷാപ്രവർത്തകരും ചേർന്ന് 12 മണിക്കൂർ നീണ്ട പരിശ്രമത്തിനൊടുവിലാണ് മൃതദേഹം പുറത്തെടുത്തത്. സംഭവത്തിൽ പോലീസ് മേൽ നടപടികൾ സ്വീകരിച്ചിട്ടുണ്ട്.
