പശ്ചിമേഷ്യയിൽ ഇറാനും ഇസ്രായേല്-അമേരിക്ക സഖ്യവും തമ്മിലുള്ള യുദ്ധം അഞ്ചാം വാരത്തിലേക്ക് കടക്കുമ്പോൾ നിർണ്ണായക വെളിപ്പെടുത്തലുമായി ഇസ്രായേല് പ്രധാനമന്ത്രി ബെഞ്ചമിൻ നെതന്യാഹു. ഇറാന്റെ ഭരണകൂടത്തെയും അവരുടെ സൈനിക ശക്തിയെയും ലക്ഷ്യം വെച്ച് ഇസ്രായേല് നടത്തുന്ന ആക്രമണങ്ങൾ ഇരട്ടിയാക്കിയിട്ടുണ്ടെന്ന് അദ്ദേഹം വ്യക്തമാക്കി. ഇറാന്റെ നിഴൽ സൈന്യങ്ങളെയും സഖ്യകക്ഷികളെയും അതിശക്തമായി ആക്രമിക്കാൻ ഇസ്രായേലിന് കഴിഞ്ഞിട്ടുണ്ടെന്നും നിലവിൽ നിലനിൽപ്പിനായുള്ള കഠിനമായ പോരാട്ടത്തിലാണ് ഇറാൻ ഭരണകൂടമെന്നും നെതന്യാഹു അവകാശപ്പെട്ടു.
ഇറാന്റെ ആയുധപ്പുരകളും മിസൈൽ വിക്ഷേപണ കേന്ദ്രങ്ങളും തകർക്കുന്നതിനായി ഇസ്രായേല് വ്യോമസേനയും നാവികസേനയും അതിശക്തമായ നീക്കങ്ങളാണ് നടത്തുന്നത്. ‘ഞങ്ങൾ ഇറാനെയും അവരുടെ കരങ്ങളെയും കഠിനമായി തകർത്തു. നിലനിൽപ്പിനായുള്ള യുദ്ധത്തിൽ അവർ ഇപ്പോൾ തളർന്നിരിക്കുകയാണ്. ആക്രമണങ്ങളുടെ തീവ്രത ഇസ്രായേല് വർധിപ്പിച്ചിരിക്കുന്നു,’ നെതന്യാഹു പറഞ്ഞു. ഇറാന്റെ വ്യവസായ മേഖലകളെയും എണ്ണക്കയറ്റുമതി കേന്ദ്രങ്ങളെയും ലക്ഷ്യം വെച്ചുള്ള ആക്രമണങ്ങൾ ആഗോള വിപണിയെയും ബാധിച്ചിട്ടുണ്ട്. ഇറാന്റെ മിസൈൽ കരുത്ത് വലിയ തോതിൽ കുറഞ്ഞതായി ഇസ്രായേലി സൈനിക വൃത്തങ്ങൾ സൂചിപ്പിക്കുന്നു.
ലബനാനിലെ ഹിസ്ബുല്ലയെയും യമനിലെ ഹൂതികളെയും ഇറാനിൽ നിന്ന് ഒറ്റപ്പെടുത്താനുള്ള നീക്കങ്ങളാണ് ഇപ്പോൾ സജീവമായി നടക്കുന്നത്. ഇറാന്റെ ‘അച്ചുതണ്ട് ശക്തികൾ’ (Axis of resistance) തകർന്നുകൊണ്ടിരിക്കുകയാണെന്ന് നെതന്യാഹു അവകാശപ്പെട്ടു. അമേരിക്കൻ പ്രസിഡൻ്റ് ട്രംപ് ഈ നീക്കങ്ങൾക്ക് പൂർണ്ണ പിന്തുണ നൽകുന്നതായും യുഎസ്-ഇസ്രായേല് സംയുക്ത സേനകൾ ഇറാനെതിരെ പുതിയ യുദ്ധമുഖങ്ങൾ തുറക്കുന്നതായും റിപ്പോർട്ടുകളുണ്ട്. ഇറാനിലെ ഇന്റർനെറ്റ് സ്തംഭനവും ആഭ്യന്തര പ്രക്ഷോഭങ്ങളും ഭരണകൂടത്തിന് കൂടുതൽ വെല്ലുവിളി സൃഷ്ടിക്കുകയാണ്.
