ഇറാനെതിരെയുള്ള സൈനിക നടപടി കൃത്യമായ പദ്ധതി പ്രകാരം പുരോഗമിക്കുകയാണെന്ന് അമേരിക്കൻ സെൻട്രൽ കമാൻഡ് (CENTCOM) അറിയിച്ചു. നിശ്ചയിച്ച ലക്ഷ്യങ്ങൾ കൈവരിക്കുന്നതിൽ സൈന്യം വലിയ വിജയം നേടിയതായും സെൻട്രം ചീഫ് അഡ്മിറൽ ബ്രാഡ് കൂപ്പർ വ്യക്തമാക്കി. ഇറാന്റെ പക്കലുള്ള മിസൈലുകളും ഡ്രോണുകളും ഭൂരിഭാഗവും നശിപ്പിച്ചതായാണ് അമേരിക്ക അവകാശപ്പെടുന്നത്.
ഓപ്പറേഷൻ എപിക് ഫ്യൂറി വഴി ഇറാന്റെ നാവികസേനയെ പൂർണ്ണമായും നിഷ്ക്രിയമാക്കാൻ സാധിച്ചുവെന്നും സെൻട്രം അറിയിച്ചു. ഇറാന്റെ പക്കലുണ്ടായിരുന്ന വലിയ യുദ്ധക്കപ്പലുകളിൽ 92 ശതമാനവും തകർക്കപ്പെട്ടു. ഇതോടെ കടൽമാർഗ്ഗമുള്ള ഇറാന്റെ ഭീഷണി ഏകദേശം അവസാനിച്ച മട്ടാണെന്നും സൈനിക വക്താക്കൾ വിലയിരുത്തുന്നു.
ഇറാൻ ഇപ്പോൾ ജനവാസ മേഖലകളിൽ നിന്ന് മിസൈലുകൾ തൊടുത്തുവിടുന്നത് നിരാശ മൂലമാണെന്ന് അഡ്മിറൽ ബ്രാഡ് കൂപ്പർ പറഞ്ഞു. സാധാരണക്കാരുടെ സുരക്ഷ ഇറാൻ ഭരണകൂടം പരിഗണിക്കുന്നില്ലെന്നും അദ്ദേഹം കുറ്റപ്പെടുത്തി. യുദ്ധം അവസാനിപ്പിക്കാൻ ഇറാൻ ഉടൻ തയ്യാറാകണമെന്നാണ് അമേരിക്കയുടെ ആവശ്യം. സൈനിക നടപടി പ്രതീക്ഷിച്ചതിലും വേഗത്തിലാണ് മുന്നോട്ട് പോകുന്നതെന്ന് അമേരിക്കൻ വക്താക്കൾ അറിയിച്ചു. വരും ദിവസങ്ങളിൽ ഇറാന്റെ മിസൈൽ ഉൽപ്പാദന കേന്ദ്രങ്ങൾ ലക്ഷ്യമിട്ടുള്ള ആക്രമണങ്ങൾ വർദ്ധിപ്പിക്കും. ഭാവിയിൽ ഇത്തരം ഭീഷണികൾ ഉയരാതിരിക്കാനാണ് അമേരിക്ക ലക്ഷ്യമിടുന്നത്.
മേഖലയിൽ സമാധാനം പുനഃസ്ഥാപിക്കാൻ പ്രസിഡന്റ് ഡൊണാൾഡ് ട്രംപ് പ്രതിജ്ഞാബദ്ധനാണെന്ന് വൈറ്റ് ഹൗസ് വ്യക്തമാക്കി. എന്നാൽ ഇറാൻ ചർച്ചകൾക്ക് തയ്യാറാകാത്ത പക്ഷം ആക്രമണം കൂടുതൽ കടുപ്പിക്കാനാണ് തീരുമാനം. ഇതിന്റെ ഭാഗമായി കൂടുതൽ അമേരിക്കൻ സൈനികരെ മിഡിൽ ഈസ്റ്റിലേക്ക് അയക്കുന്നുണ്ട്.
അമേരിക്കയുടെയും സഖ്യകക്ഷികളുടെയും സംയുക്ത നീക്കം പശ്ചിമേഷ്യയിൽ വലിയ മാറ്റങ്ങൾ ഉണ്ടാക്കുന്നുണ്ട്. ഇറാന്റെ ആണവ കേന്ദ്രങ്ങൾ ലക്ഷ്യമിട്ടുള്ള നീക്കങ്ങളും സജീവമാണ്. ഇറാന്റെ സൈനിക ശേഷി പൂർണ്ണമായും ഇല്ലാതാക്കുക എന്നതാണ് അമേരിക്കയുടെ അന്തിമ ലക്ഷ്യം. യുദ്ധം മൂലം ആഗോള തലത്തിൽ എണ്ണവിലയിൽ വലിയ വർദ്ധനവ് രേഖപ്പെടുത്തിയിട്ടുണ്ട്. ഹോർമുസ് കടലിടുക്കിലൂടെയുള്ള ഗതാഗതം പുനഃസ്ഥാപിക്കാൻ അമേരിക്കൻ നാവികസേന ശ്രമം തുടരുകയാണ്. ഇറാന്റെ ഭാഗത്ത് നിന്നുള്ള പ്രകോപനം അവസാനിച്ചാൽ മാത്രമേ സമാധാനം പുനഃസ്ഥാപിക്കാൻ കഴിയൂ എന്ന് ട്രംപ് ഭരണകൂടം ആവർത്തിച്ചു.
