ലോകത്തെ മികച്ച വിമാനത്താവളങ്ങളെ കണ്ടെത്താനായി സ്കൈട്രാക്സ് (Skytrax) നടത്തിയ 2026-ലെ വേൾഡ് എയർപോർട്ട് അവാർഡുകളിൽ മികച്ച നേട്ടം കൈവരിച്ച് ഡൽഹിയിലെ ഇന്ദിരാഗാന്ധി അന്താരാഷ്ട്ര വിമാനത്താവളം. ഇന്ത്യയിലെയും ദക്ഷിണേഷ്യയിലെയും മികച്ച വിമാനത്താവളത്തിനുള്ള പുരസ്കാരം ഡൽഹി നിലനിർത്തി. ലോകത്തെ മികച്ച 30 വിമാനത്താവളങ്ങളുടെ പട്ടികയിൽ ഇടംപിടിച്ച ഏക ഇന്ത്യൻ വിമാനത്താവളവും ഡൽഹിയാണ്. കഴിഞ്ഞ വർഷം 32-ാം സ്ഥാനത്തായിരുന്ന ഡൽഹി ഇത്തവണ 28-ാം സ്ഥാനത്തേക്ക് ഉയർന്നു.
പ്രതിവർഷം 70 ദശലക്ഷത്തിലധികം യാത്രക്കാരെ കൈകാര്യം ചെയ്യുന്ന വിമാനത്താവളങ്ങളുടെ വിഭാഗത്തിൽ ഡൽഹി വലിയ മുന്നേറ്റമാണ് നടത്തിയത്. കഴിഞ്ഞ വർഷം എട്ടാം സ്ഥാനത്തായിരുന്ന ഈ വിഭാഗത്തിൽ ഇത്തവണ മൂന്നാം സ്ഥാനത്തെത്താൻ ഡൽഹിക്ക് സാധിച്ചു. ജിഎംആർ എയർപോർട്ട്സ് ലിമിറ്റഡിന്റെ നേതൃത്വത്തിലുള്ള ഡൽഹി ഇന്റർനാഷണൽ എയർപോർട്ട് ലിമിറ്റഡ് (DIAL) ആണ് വിമാനത്താവളത്തിന്റെ പ്രവർത്തനം നിയന്ത്രിക്കുന്നത്. 2019 മുതൽ തുടർച്ചയായി എട്ടാം വർഷമാണ് ദക്ഷിണേഷ്യയിലെ മികച്ച വിമാനത്താവളമെന്ന ബഹുമതി ഡൽഹി സ്വന്തമാക്കുന്നത്.
