കണ്ണൂർ കൂത്തുപറമ്പിന് സമീപം പുറക്കളത്ത് വിരണ്ടോടിയ കാട്ടുപോത്ത് ബൈക്ക് ഷോറൂമിനുള്ളിലേക്ക് പാഞ്ഞുകയറി വൻ നാശനഷ്ടങ്ങള് വരുത്തി. പുറക്കളത്തെ ഹീറോ ഹോണ്ട ബൈക്ക് ഷോറൂമിലാണ് ഇന്ന് രാവിലെ അപ്രതീക്ഷിതമായി കാട്ടുപോത്തിന്റെ ആക്രമണമുണ്ടായത്. ഷോറൂമിലെ ജീവനക്കാരും പരിസരവാസികളും തലനാരിഴയ്ക്കാണ് പരിക്കേല്ക്കാതെ രക്ഷപ്പെട്ടത്.
ഷോറൂം തകർത്ത് കാട്ടുപോത്ത്
രാവിലെ പതിവുപോലെ ഷോറൂം തുറന്നു പ്രവർത്തിക്കുന്നതിനിടെയാണ് ജനവാസമേഖലയിലൂടെ ഓടിയെത്തിയ കാട്ടുപോത്ത് ഷോറൂമിനുള്ളിലേക്ക് ഇടിച്ചുകയറിയത്. ഷോറൂമിന്റെ മുൻവശത്തെ കൂറ്റൻ ഗ്ലാസുകള് തകർത്താണ് പോത്ത് അകത്തേക്ക് പ്രവേശിച്ചത്. ഷോറൂമിനകത്തെ വിലപിടിപ്പുള്ള ഫർണിച്ചറുകളും ഓഫീസ് ഉപകരണങ്ങളും കാട്ടുപോത്ത് കുത്തിമറിച്ചു. പെട്ടെന്നുണ്ടായ ആക്രമണത്തില് ഭയന്നുവിറച്ച ജീവനക്കാർ ഓടിമാറിയതിനാല് വലിയ അപകടം ഒഴിവായി.
ഷോറൂമിനുള്ളില് പരിഭ്രാന്തി പരത്തിയ കാട്ടുപോത്ത് പിന്നീട് പുറത്തേക്ക് വരാൻ ശ്രമിച്ചെങ്കിലും വീണ്ടും അക്രമാസക്തനായി. തുടർന്ന് സ്ഥലത്തുണ്ടായിരുന്ന നാട്ടുകാരും ഡ്രൈവർമാരും ചേർന്ന് ബഹളം വെച്ചതോടെയാണ് കാട്ടുപോത്ത് ഷോറൂമില് നിന്നും പുറത്തിറങ്ങി സമീപത്തെ പറമ്പിലേക്ക് ഓടിപ്പോയത്.
