ഡെമോക്രാറ്റിക് റിപ്പബ്ലിക്ക് ഓഫ് കോംഗോയിലുണ്ടായ ഭീകരാക്രമണത്തിൽ 25 പേർ കൊല്ലപ്പെട്ടു. ഐസിസ് ബന്ധമുള്ള എഡിഎഫ് എന്ന സായുധസംഘമാണ് ഈ ക്രൂരതയ്ക്കു പിന്നിലെന്ന് മനുഷ്യാവകാശ സംഘടനകൾ അറിയിച്ചു. ജനുവരി 25 ഞായറാഴ്ച പുലർച്ചെ നാലുമണിയോടെ ജനങ്ങൾ ഉറങ്ങിക്കിടക്കുമ്പോഴാണ് അപ്രതീക്ഷിതമായ ഈ ആക്രമണം ഉണ്ടായത്.
അതീവദാരുണമായ രീതിയിലാണ് ഭീകരർ ഈ കൊലപാതകങ്ങൾ നടത്തിയത്. ഒരു വീടിന് തീയിട്ടതിനെത്തുടർന്ന് ഉള്ളിലുണ്ടായിരുന്ന 15 പുരുഷന്മാർ വെന്തുമരിച്ചു. മറ്റുള്ളവരെ വെടിവച്ചും മാരകായുധങ്ങൾ ഉപയോഗിച്ചുമാണ് ഇവർ കൊലപ്പെടുത്തിയത്.
കഴിഞ്ഞ കുറച്ചു മാസങ്ങളായി ഈ മേഖലയിൽ ഭീകരർ നിരന്തരം ആക്രമണങ്ങൾ നടത്തിവരികയാണ്. സാധാരണക്കാരെ ലക്ഷ്യംവച്ചുള്ള ഇത്തരം അക്രമങ്ങൾ തടയാൻ സൈന്യം ശ്രമിക്കുന്നുണ്ടെങ്കിലും മരണം തുടരുന്നത് വലിയ ആശങ്കയുണ്ടാക്കുന്നു. സമാധാനത്തോടെ ജീവിക്കാൻ കഴിയാത്ത അവസ്ഥയിലാണ് ഇവിടുത്തെ ജനങ്ങൾ ഇപ്പോൾ കഴിയുന്നത്.
