ഇന്ത്യയിൽ ഏകദേശം നാലിലൊരാൾക്ക് അമിതഭാരമോ, അമിതവണ്ണമോ ഉണ്ടെന്ന് ഒരു പുതിയ റിപ്പോർട്ടിൽ പറയുന്നു. കഴിഞ്ഞ 30 വർഷത്തിനിടയിൽ ഈ നിരക്ക് അഞ്ചിരട്ടിയോളം വർധിച്ചതായി ടോണി ബ്ലെയർ ഇൻസ്റ്റിറ്റ്യൂട്ട് ഫോർ ഗ്ലോബൽ ചേഞ്ച് പുറത്തിറക്കിയ പഠനം ചൂണ്ടിക്കാട്ടുന്നു. നഗരങ്ങളിലും ഗ്രാമങ്ങളിലും ഒരുപോലെ അമിതവണ്ണം മൂലമുള്ള രോഗങ്ങൾ വളരെ വേഗത്തിൽ കൂടുകയാണ്.
ദേശീയ കുടുംബാരോഗ്യ സർവേയുടെ കണക്കുകൾ ഉദ്ധരിച്ചുള്ള റിപ്പോർട്ടിലാണ് ഇത് പറയുന്നത്. ഡൽഹിയിൽ 41% സ്ത്രീകൾക്ക് അമിതവണ്ണമുള്ളപ്പോൾ മേഘാലയയിൽ ഇത് 12% മാത്രമാണ്. മുംബൈ പോലുള്ള നഗരങ്ങളിലെ കുട്ടികളിലും അമിതവണ്ണത്തിന്റെ നിരക്ക് ഉയർന്ന തോതിലാണ്.
അമിതവണ്ണം മൂലം ഓരോ വർഷവും ഇന്ത്യയ്ക്ക് 2.4 ബില്യൺ ഡോളറാണ് ആരോഗ്യ പരിരക്ഷയ്ക്കായി ചെലവ് വരുന്നത്. ഇത് രാജ്യത്തിന്റെ ജിഡിപിയിൽ ഏകദേശം ഒരു ശതമാനത്തോളം സാമ്പത്തികനഷ്ടം ഉണ്ടാക്കുന്നു. അതേസമയം, ആരോഗ്യസംരക്ഷണം രാജ്യത്തിന്റെ വളർച്ചാതന്ത്രത്തിന്റെ പ്രധാന ഭാഗമാക്കണമെന്നാണ് വിദഗ്ധർ അഭിപ്രായപ്പെടുന്നത്.
