വിമാനയാത്ര നടത്തുന്നവർ വസ്ത്രധാരണത്തിൽ കൂടുതൽ ശ്രദ്ധിക്കണമെന്ന് യുഎസ് ഗതാഗത സെക്രട്ടറി ഷോൺ ഡഫി ആവശ്യപ്പെട്ടു. ഔദ്യോഗികമായ വസ്ത്രങ്ങൾ ധരിക്കാനാണ് അദ്ദേഹം യാത്രക്കാരോട് അഭ്യർഥിച്ചത്. വിമാനയാത്രയിൽ പൈജാമ ഒഴിവാക്കി ജീൻസ് ധരിക്കുന്നതാണ് ഉചിതം എന്നും അദ്ദേഹം പറഞ്ഞു. ഇത് വിമാനത്താവളങ്ങളിൽ ആളുകളെ മികച്ച രീതിയിൽ പെരുമാറാൻ സഹായിക്കുമെന്നാണ് ഗതാഗത സെക്രട്ടറിയുടെ വാദം.
തിങ്കളാഴ്ച ന്യൂജേഴ്സിയിലെ ന്യൂവാർക്ക് വിമാനത്താവളത്തിൽ സംസാരിക്കുകയായിരുന്നു ഷോൺ ഡഫി. ‘കുറച്ച് ബഹുമാനത്തോടെ’ വസ്ത്രം ധരിക്കാൻ അദ്ദേഹം യാത്രക്കാരെ പ്രോത്സാഹിപ്പിച്ചു. ‘ഒരു ജോഡി ജീൻസും മാന്യമായ ഷർട്ടും ആകട്ടെ, കുറച്ചുകൂടി നന്നായി വസ്ത്രം ധരിക്കാൻ ഞാൻ ആളുകളെ പ്രോത്സാഹിപ്പിക്കും.
അത് കുറച്ചുകൂടി നന്നായി പെരുമാറാൻ നമ്മെ പ്രോത്സാഹിപ്പിക്കുന്നു. വിമാനത്താവളത്തിലേക്ക് വരുമ്പോൾ സ്ലിപ്പറുകളും പൈജാമയും ധരിക്കാതിരിക്കാൻ ശ്രമിക്കാം. ഈ തീരുമാനം പോസിറ്റീവാണെന്ന് ഞാൻ കരുതുന്നു,’ അദ്ദേഹം പറഞ്ഞു. ആളുകൾ വിമാനത്തിൽ പറക്കുമ്പോൾ ഉറങ്ങാൻ പോകുന്നതുപോലെ വസ്ത്രം ധരിക്കുന്നു എന്ന് മുമ്പ് ഒരു അഭിമുഖത്തിൽ അദ്ദേഹം ആരോപിച്ചിരുന്നു.
യാത്ര ചെയ്യുമ്പോൾ പാലിക്കേണ്ട മര്യാദകളെക്കുറിച്ചും വിമാനത്താവളങ്ങളിലെ പെരുമാറ്റരീതിയെക്കുറിച്ചും ഒരു ‘സിവിലിറ്റി കാമ്പയിൻ’ നടത്താൻ താൻ ആഹ്വാനം ചെയ്തതായും ഗതാഗത സെക്രട്ടറി അറിയിച്ചു. ‘യാത്രയുടെ സുവർണ്ണകാലം നിങ്ങളിൽ നിന്ന് ആരംഭിക്കുന്നു’ എന്ന പേരിൽ നവംബർ 19-ന് ആരംഭിച്ച ഈ കാമ്പയിൻ, യാത്ര ചെയ്യുമ്പോൾ ശരിയായി വസ്ത്രം ധരിക്കാനും മാന്യമായി പെരുമാറാനും യാത്രക്കാരെ പ്രേരിപ്പിക്കുന്നതിന് വേണ്ടിയാണ് രൂപകൽപ്പന ചെയ്തിരിക്കുന്നത്.
യാത്രക്കാർ ലഗേജ് ഓവർഹെഡ് ബിന്നുകളിൽ അതായത് മുകളിലെ ലഗേജ് അറകളിൽ വെക്കാൻ ബുദ്ധിമുട്ടുന്ന സഹയാത്രികരെ സഹായിക്കണം എന്നും ഡഫി അഭ്യർഥിച്ചു. വിമാന യാത്രയിൽ മര്യാദയും നിലവാരവും പുനഃസ്ഥാപിക്കുക എന്നതാണ് ഈ കാമ്പയിന്റെ ലക്ഷ്യം എന്ന് ഗതാഗത വകുപ്പ് വ്യക്തമാക്കി.
ഇത് വിമാനയാത്രക്കാരായ പൊതുജനങ്ങൾക്ക് യാത്രാനുഭവം മികച്ചതാക്കുക മാത്രമല്ല, യാത്രക്കാർ, ഗേറ്റ് തൊഴിലാളികൾ, ഫ്ലൈറ്റ് അറ്റൻഡന്റുകൾ, പൈലറ്റുമാർ എന്നിവരുടെ സുരക്ഷ ഉറപ്പാക്കുകയും ചെയ്യും. അമേരിക്കക്കാർ താങ്സ്ഗിവിംഗ് അവധിക്കായി തയ്യാറെടുക്കുന്നതിന് മുന്നോടിയായാണ് ഈ കാമ്പയിൻ എന്നതും ശ്രദ്ധേയമാണ്. 15 വർഷത്തിനിടയിലെ ഏറ്റവും തിരക്കേറിയ വിമാന യാത്രയായിരിക്കും ഈ താങ്സ്ഗിവിംഗ് അവധിക്ക് ഉണ്ടാകുകയെന്ന് എഫ്എഎ പ്രതീക്ഷിക്കുന്നുണ്ട്.
