ഡൽഹിയിലെ ഇന്ദിരാഗാന്ധി അന്താരാഷ്ട്ര വിമാനത്താവളത്തിൽ കഴിഞ്ഞ ദിവസം ഗുരുതരമായ സുരക്ഷാ ആശങ്കയുണ്ടാക്കിയ സംഭവം റിപ്പോർട്ട് ചെയ്തു. കാബൂളിൽ നിന്ന് വന്ന അരിയാന അഫ്‌ഗാൻ എയർലൈൻസിന്റെ ഒരു വിമാനമാണ് ലാൻഡിങ് റൺവേ മാറി ഇറങ്ങിയത്. ഞായറാഴ്ച, (നവംബർ 23) ഉച്ചതിരിഞ്ഞാണ് വിമാനത്താവളത്തിൽ പരിഭ്രാന്തി പരത്തിയ സംഭവം അരങ്ങേറിയത്. അരിയാന അഫ്‌ഗാൻ എയർലൈൻസിന്റെ എയർബസ് എ310 ശ്രേണിയിലുള്ള വിമാനമാണ് സുരക്ഷാ മാനദണ്ഡങ്ങൾ തെറ്റിച്ചത്.
വിമാനം ഇറങ്ങുന്നതിനായി എയർ ട്രാഫിക് കൺട്രോൾ അധികൃതർ പൈലറ്റിന് നൽകിയ നിർദ്ദേശമനുസരിച്ച് റൺവേ 29 എൽ (29L) ലാണ് ലാൻഡിങ് നടത്തേണ്ടിയിരുന്നത്. എന്നാൽ, പൈലറ്റിന് റൺവേ മാറിപ്പോകുകയും വിമാനം പറന്നുയരാനായി (ടേക്ക് ഓഫ്) ഉപയോഗിക്കുന്ന റൺവേ 29 ആറിൽ (29R) താഴെയിറക്കുകയും ചെയ്യുകയായിരുന്നു.
റൺവേ മാറിയതിലൂടെ ഗുരുതരമായ വിമാന അപകട സാധ്യതയാണ് ഡൽഹി വിമാനത്താവളത്തിൽ ഉണ്ടായത്. റൺവേ 29 ആർ സാധാരണയായി ഉപയോഗിക്കുന്നത് പറന്നുയരാനുള്ള വിമാനങ്ങൾക്ക് വേണ്ടിയാണ്. ലാൻഡിങ് സമയത്ത് റൺവേയിൽ പറന്നുയരാനായി തയ്യാറെടുക്കുകയോ അല്ലെങ്കിൽ കാത്തുനിൽക്കുകയോ ചെയ്യുന്ന മറ്റ് വിമാനങ്ങൾ ഇല്ലാതിരുന്നത് മാത്രമാണ് വൻ ദുരന്തം ഒഴിവാകാൻ കാരണം. അപകടകരമായ ഈ പിഴവ് വിമാനത്താവളത്തിലെ സുരക്ഷാ ക്രമീകരണങ്ങളെയും പൈലറ്റിന്റെ ശ്രദ്ധക്കുറവിനെയും സംബന്ധിച്ച് വലിയ ചോദ്യങ്ങൾ ഉയർത്തുന്നുണ്ട്.
സുരക്ഷാ വീഴ്ചയുമായി ബന്ധപ്പെട്ട് വിമാനത്താവള അധികൃതർ ഉടനടി നടപടികൾ സ്വീകരിച്ചു. സംഭവത്തെക്കുറിച്ച് വിശദമായ അന്വേഷണത്തിന് ഉത്തരവിട്ടിട്ടുണ്ട്. പൈലറ്റിന് വന്ന പിഴവാണോ അതോ എയർ ട്രാഫിക് കൺട്രോളിൽ നിന്നുള്ള ആശയവിനിമയത്തിലെ പോരായ്മയാണോ റൺവേ മാറിയിറങ്ങാൻ കാരണമായതെന്നാണ് പ്രധാനമായും പരിശോധിക്കുന്നത്. ഇത്തരം ഗുരുതരമായ സുരക്ഷാ വീഴ്ചകൾ ആവർത്തിക്കാതിരിക്കാൻ ശക്തമായ നടപടികൾ സ്വീകരിക്കുമെന്നാണ് വിമാനത്താവള അധികൃതർ അറിയിച്ചിരിക്കുന്നത്.
