യുദ്ധങ്ങളും സംഘർഷങ്ങളും നിറഞ്ഞ ലോകത്തും മനുഷ്യജീവിതം രക്ഷിക്കാൻ പ്രതിജ്ഞാബദ്ധരായ ആഫ്രിക്കൻ ഡോക്ടർമാർ ഇസ്രായേലിൽ മികച്ച പരിശീലനം നേടി തിരികെയെത്തുന്നു. ‘സേവ് എ ചൈൽഡ്സ് ഹാർട്ട്’ (SACH) എന്ന സന്നദ്ധസംഘടന വഴി ഇതുവരെ 165 ലധികം ഡോക്ടർമാരും നഴ്സുമാരുമാണ് പരിശീലനം പൂർത്തിയാക്കി സ്വന്തം നാട്ടിലേക്കു മടങ്ങിയെത്തുന്നത്. 1995 മുതൽ ഈ സംഘടന ലോകമെമ്പാടുമുള്ള എണ്ണായിരത്തിലധികം കുട്ടികൾക്ക് ഹൃദയചികിത്സ നൽകിവരുന്നു.
ദുരന്തങ്ങളെ അതിജീവിച്ച ഡോക്ടർമാർ
റുവാണ്ടൻ വംശഹത്യയിൽ കുടുംബത്തെ നഷ്ടപ്പെട്ട ഡോ. ലിസ് മുംപോറേസ് (37), ഇസ്രായേലിലെ വുൾഫ്സൺ മെഡിക്കൽ സെന്ററിലെ ശിശുക്കളുടെ തീവ്രപരിചരണ വിഭാഗത്തിലെ (ICU) രണ്ടുവർഷത്തെ പരിശീലനം പൂർത്തിയാക്കി മടങ്ങിയത് ഈയടുത്താണ്. 1994 ലെ വംശഹത്യയുടെ ഭീകരത ഓർത്തെടുത്ത അവർ, ഇസ്രായേലിൽ താൻ കണ്ടതും അനുഭവിച്ചതുമായ മാനുഷികമൂല്യങ്ങളെക്കുറിച്ചു പറയുന്നു. “ഒരു കുഞ്ഞിന്റെ കാര്യത്തിലും പ്രതീക്ഷ കൈവിടരുത്” എന്ന പാഠമാണ് ആശുപത്രിയിൽ നിന്ന് തനിക്കു ലഭിച്ച ഏറ്റവും വലിയ അറിവെന്ന് അവർ പറയുന്നു. റുവാണ്ടയിലെ ആദ്യത്തെ പീഡിയാട്രിക് ഐസിയു വിദഗ്ധയായി കിംഗ് ഫൈസൽ ഹോസ്പിറ്റലിൽ സേവനം ആരംഭിക്കാൻ ഒരുങ്ങുകയാണ് ഡോ. ലിസ്.
എത്യോപ്യയിൽ നിന്നുള്ള ഡോ. ഫിറ്റ്സം അർഗാവ് അബെബെ അഞ്ചുവർഷമാണ് പീഡിയാട്രിക് കാർഡിയോളജിയിൽ വൈദഗ്ധ്യം നേടിയശേഷം നാട്ടിലേക്കു മടങ്ങുന്നത്. യുദ്ധകാലത്തെ പ്രയാസങ്ങൾക്കിടയിലും ഇസ്രായേലിലെ ആളുകൾ അനുഭവിക്കുന്ന കാരുണ്യവും ജീവൻ രക്ഷിക്കാനുള്ള ആവേശവുമാണ് തന്നെ മുന്നോട്ടുനയിച്ചതെന്ന് അദ്ദേഹം പറഞ്ഞു. “ഇവിടെ നിന്ന് ഞാൻ ഒരു സർജനായി മാത്രമല്ല, ഒരു വ്യക്തിയായും രൂപപ്പെട്ടു. ഞാൻ ഇവിടെ പഠിച്ചതെല്ലാം ഇനി ഏറ്റവും ആവശ്യമുള്ളവർക്ക് തിരികെ നൽകും” – അദ്ദേഹം പറഞ്ഞു.
ആഫ്രിക്കൻ രാജ്യങ്ങൾക്ക് വലിയ കൈത്താങ്ങ്
സബ്-സഹാറൻ ആഫ്രിക്കൻ രാജ്യങ്ങളായ ടാൻസാനിയ, സാംബിയ, എത്യോപ്യ, റുവാണ്ട എന്നിവിടങ്ങളിൽ നിന്നുള്ള ഡോക്ടർമാർക്കാണ് പ്രധാനമായും ഹൃദയസംബന്ധമായ ചികിത്സയ്ക്കുള്ള പരിശീലനം നൽകുന്നത്. എത്യോപ്യയിലെ ആദ്യത്തെ പീഡിയാട്രിക് കാർഡിയാക് സർജനായ ഡോ. യയേഹിരാദ് എം എജിഗുവും ഇസ്രായേലിൽ പരിശീലനം പൂർത്തിയാക്കിയതാണ്. അദ്ദേഹം ഇപ്പോൾ റുവാണ്ടയിൽ ശിശുക്കളുടെ ഹൃദയശസ്ത്രക്രിയയ്ക്ക് നേതൃത്വം നൽകുന്നു.
2028 ഓടെ റുവാണ്ടയിൽ പ്രാദേശിക ഡോക്ടർമാർക്ക് കുട്ടികളുടെ ഹൃദയശസ്ത്രക്രിയകൾ സ്വന്തമായി ചെയ്യാൻ കഴിയുന്ന ഒരു ലക്ഷ്യത്തിലേക്ക് എത്തിക്കാൻ ഈ പരിശീലനം സഹായിക്കുന്നുണ്ട്. “30 വർഷം മുമ്പുള്ള റുവാണ്ടയുമായി താരതമ്യം ചെയ്യുമ്പോൾ ഇപ്പോഴത്തെ വളർച്ച അതിശയിപ്പിക്കുന്നതാണ്. ഇസ്രായേലിൽ നിന്ന് ഞങ്ങൾ പഠിച്ച കാര്യങ്ങൾ ഭാവാത്മകമായ വലിയൊരു പ്രഭാവം സൃഷ്ടിക്കുന്നു” – ഡോ. എജിഗു പറഞ്ഞു.
