ലോകമെമ്പാടുമുള്ള ചലച്ചിത്ര പ്രതിഭകളെയും പ്രേക്ഷകരെയും ഒരേ വേദിയിലേക്ക് എത്തിച്ചുകൊണ്ട് 56-ാമത് അന്താരാഷ്ട്ര ചലച്ചിത്രമേളയ്ക്ക് വ്യാഴാഴ്ച, നവംബർ 20-ന് തിരി തെളിയും. നവംബർ 20 മുതൽ 28 വരെയാണ് ഗോവയിൽ സിനിമയുടെ ഈ മഹാമേള നടക്കുക.
ചലച്ചിത്രോത്സവത്തിന്റെ ഔദ്യോഗിക ഉദ്ഘാടന ചിത്രമായി തിരഞ്ഞെടുത്തിരിക്കുന്നത് ബ്രസീലിൽ നിന്നുള്ള ‘ദ ബ്ലൂ ട്രെയിൽ’ ആണ്. ഗബ്രിയേൽ മസ്‌കാരോ സംവിധാനം ചെയ്ത ഈ ചിത്രം ലോകമെമ്പാടുമുള്ള ചലച്ചിത്ര വേദികളിൽ ശ്രദ്ധ നേടിയിട്ടുള്ളതാണ്. ബർലിൻ അന്താരാഷ്ട്ര മേളയിൽ അടക്കം ‘ദ ബ്ലൂ ട്രെയിൽ’ പുരസ്‌കാരങ്ങൾ കരസ്ഥമാക്കിയിരുന്നു. മേളയിൽ ലോകശ്രദ്ധ ആകർഷിക്കുന്ന ചിത്രങ്ങൾക്ക് പുറമെ, ഈ വർഷം ജപ്പാനെയാണ് ‘കൺട്രി ഓഫ് ഫോക്കസ്’ ആയി തിരഞ്ഞെടുത്തിരിക്കുന്നത്.
ഇത്തവണത്തെ ചലച്ചിത്രമേളയിൽ മലയാള സിനിമയുടെ ശക്തമായ സാന്നിധ്യം ശ്രദ്ധേയമാണ്. ഇന്ത്യൻ സിനിമയിലെ മികച്ച ചിത്രങ്ങൾ പ്രദർശിപ്പിക്കുന്ന ‘ഇന്ത്യൻ പനോരമ’ വിഭാഗത്തിൽ മൂന്ന് പ്രധാന മലയാള ചിത്രങ്ങൾ ഇടം നേടി. സൂപ്പർസ്റ്റാർ മോഹൻലാലിനെ നായകനാക്കി തരുൺ മൂർത്തി സംവിധാനം ചെയ്ത ‘തുടരും’, യുവതാരം ടൊവിനോ തോമസിന്റെ ബഹുഭാഷാ ചിത്രമായ ‘അജയൻ്റെ രണ്ടാം മോഷണം!’ (എ.ആർ.എം.), ആസിഫ് അലി നായകനായി എത്തിയ ‘സർക്കീട്ട്’ എന്നിവയാണ് മേളയിൽ പ്രദർശിപ്പിക്കുന്ന മലയാള ചിത്രങ്ങൾ.
സിനിമയുടെ വൈവിധ്യം വിളിച്ചോതുന്ന ചിത്രങ്ങളാണ് ഇത്തവണ മേളയിൽ അണിനിരക്കുക. 81 രാജ്യങ്ങളിൽ നിന്നായി 240-ൽ അധികം സിനിമകൾ വിവിധ വിഭാഗങ്ങളിൽ പ്രദർശനത്തിനെത്തും. 7500-ഓളം പ്രതിനിധികളാണ് ചലച്ചിത്രമേളയിൽ പങ്കെടുക്കുന്നതിനായി നിലവിൽ രജിസ്റ്റർ ചെയ്‌തിട്ടുള്ളത്. കൂടാതെ, വനിതകൾ നിർമ്മിച്ച 50 ചിത്രങ്ങൾ, ഓസ്‌കാർ എൻട്രി ലഭിച്ച 21 ചിത്രങ്ങൾ, പുതുമുഖ സംവിധായകർ നിർമ്മിച്ച 50 ചിത്രങ്ങൾ എന്നിവയും മേളയുടെ ആകർഷണങ്ങളിൽ പ്രധാനമാണ്.
ഇന്ത്യൻ സിനിമയ്ക്ക് നൽകിയ മഹത്തായ സംഭാവനകൾ പരിഗണിച്ച് തമിഴ് സൂപ്പർസ്റ്റാർ രജനീകാന്തിനെ മേളയിൽ വെച്ച് ആദരിക്കും. സിനിമയിൽ 50 വർഷം പൂർത്തിയാക്കുന്ന സാഹചര്യത്തിലാണ് താരത്തിന് ഈ പ്രത്യേക ആദരം നൽകുന്നത്. മേളയുടെ സമാപനസമ്മേളനത്തിൽ വെച്ചാണ് ഈ ആദരമർപ്പിക്കുന്ന ചടങ്ങ് നടക്കുക. ഇന്ത്യൻ സിനിമയിലെ സമഗ്ര സംഭാവനകൾക്കുള്ള അംഗീകാരമായിരിക്കും ഇത്.
