ബീഹാർ എൻഡിഎ നിയമസഭാ കക്ഷി നേതാവായി നിതീഷ് കുമാറിനെ തിരഞ്ഞെടുടുത്തു. മുഖ്യമന്ത്രിയായി നാളെ അദ്ദേഹം സത്യപ്രതിജ്ഞ ചെയ്യും. ഇതോടെ ബീഹാർ മുഖ്യമന്ത്രിയായുള്ള നിതീഷിന്റെ പത്താം വരവിനാണ് കളമൊരുങ്ങിയിരിക്കുന്നത്.
75 വയസ്സുകാരനായ നിതീഷ് കുമാർ ഇന്ന് വൈകുന്നേരം ഗവർണർ ആരിഫ് മുഹമ്മദ് ഖാനെ സന്ദർശിച്ച് അടുത്ത സർക്കാർ രൂപീകരിക്കാനുള്ള അവകാശവാദം ഉന്നയിക്കും. എൻഡിഎയുടെ എല്ലാ ഘടകകക്ഷികളുടെയും പിന്തുണക്കത്ത് സഹിതമായിരിക്കും അദ്ദേഹം ഗവർണറെ കാണുക. നാളെ പറ്റ്നയിലെ ചരിത്രപ്രസിദ്ധമായ ഗാന്ധി മൈതാനിയിൽ വെച്ചായിരിക്കും സത്യപ്രതിജ്ഞാ ചടങ്ങ്. ഇതിനു മുന്നോടിയായി നിലവിലെ നിയമസഭ ഇന്ന് പിരിച്ചുവിടും.
ബീഹാറിലെ ആകെയുള്ള 243 നിയമസഭാ സീറ്റുകളിൽ 202 സീറ്റുകൾ നേടിയാണ് എൻഡിഎ ശക്തമായ ഭൂരിപക്ഷത്തോടെ അധികാരത്തിൽ തിരിച്ചെത്തിയത്. തിരഞ്ഞെടുപ്പിൽ ബിജെപി 89 സീറ്റുകളും ജെഡിയു 85 സീറ്റുകളും എൽജെപി 19 സീറ്റുകളും എച്ച്എഎം 5 സീറ്റുകളും ആർഎൽഎം 4 സീറ്റുകളും നേടിയിരുന്നു
തിരഞ്ഞെടുപ്പിന് തൊട്ടുമുമ്പായി നിതീഷ് കുമാർ സർക്കാർ നിരവധി പദ്ധതികൾ നടപ്പിലാക്കിയിരുന്നു. ജീവിക, ആശ, അങ്കണവാടി ജീവനക്കാർക്കുള്ള സാമൂഹിക സുരക്ഷാ പെൻഷനുകളും സ്റ്റൈപ്പൻഡുകളും വർദ്ധിപ്പിച്ചത് ഇതിൽ പ്രധാനമാണ്. നിതീഷ് കുമാർ സർക്കാരിന്റെ സുപ്രധാന പദ്ധതിയായ ‘മുഖ്യമന്ത്രി മഹിളാ റോജ്ഗർ യോജന’ വഴി ഒരു കോടിയിലധികം സ്ത്രീകൾക്ക് 10,000 രൂപ വീതം നൽകിയിരുന്നു.
