കൊച്ചി: വെള്ളത്താൽ ചുറ്റപ്പെട്ട വളന്തകാട് ദീപിലെ വീട്ടിൽ പ്രായമായ അമ്മയ്ക്കും സ്കൂൾ വിദ്യാർഥിയായ മകനുമൊപ്പം കഴിയുന്ന സ്മിതയ്ക്ക് കെെത്താങ്ങായി വേൾഡ് മലയാളി കൗൺസിൽ. സ്വന്തം വള്ളം എന്ന സ്മിതയുടെ സ്വപ്നമാണ് ഡബ്ല്യുഎംസി തിരുകൊച്ചി പ്രൊവിൻസ് യാഥാർഥ്യമാക്കിയത്.
വളന്തകാട്ടിലെ സ്മിതയുടെ വീട്ടിൽ നടന്ന ചടങ്ങിൽ തിരുകൊച്ചി പ്രൊവിൻസ് പ്രസിഡന്‍റ് ജോൺസൺ സി. അബ്രഹാം അധ്യക്ഷത വഹിച്ചു. ചടങ്ങിൽ ചെയർമാൻ ജോസഫ് മാത്യു സ്വാഗതം പറഞ്ഞു. ഡബ്ല്യുഎംസി ഗ്ലോബൽ പ്രസിഡന്‍റ് ഡോ. ബാബു സ്റ്റീഫനും ഗ്ലോബൽ സെക്രട്ടറി ജനറൽ ഷാജി മാത്യുവും ചേർന്ന് വള്ളം സ്മിതയ്ക്ക് കൈമാറി.
സ്മിതയുടെ കുടുംബത്തിനാവശ്യമായ ലൈഫ് ജാക്കറ്റുകൾ പരിസ്ഥിതി പ്രവർത്തകൻ സി.ആർ. നീലകണ്ഠൻ കൈമാറി. മകനാവശ്യമായ പഠനോപകരണങ്ങൾ വനിതാ ഫോറം ഗ്ലോബൽ ചെയർപേഴ്സൺ സലീന മോഹൻ നൽകി.
ചടങ്ങിൽ ഡബ്ല്യുഎംസി ഗ്ലോബൽ വൈസ് പ്രസിഡന്‍റ് ജോഷി പന്നാരാകുന്നേൽ, മിഡിൽ ഈസ്റ്റ് സെക്രട്ടറി അരുൺ ജോർജ്, സ്വിറ്റ്‌സർലൻഡ് പ്രൊവിൻസ് പ്രസിഡന്‍റ് ജോബിൻസൺ, അഡ്വൈസറി ബോർഡ് ചെയർമാൻ സുരേന്ദ്രൻ ഐപിഎസ്, എറണാകുളം ചാപ്റ്റർ പ്രസിഡന്‍റ് എൻ.എൻ. സുനിൽ, കഴക്കൂട്ടം ചാപ്റ്റർ പ്രസിഡന്‍റ് സുരേഷ് കുമാർ, ബിനു അലക്സ്, ലാലി ജോഫിൻ തുടങ്ങിയവർ ആശംസകൾ അർപ്പിച്ചു.
