ചെങ്കോട്ടയിൽ നടന്ന സ്വാതന്ത്ര്യദിനാഘോഷങ്ങളിൽ പങ്കെടുക്കാതെ ലോക്‌സഭയിലെ പ്രതിപക്ഷ നേതാവ് രാഹുൽ ഗാന്ധിയും കോൺഗ്രസ് അധ്യക്ഷൻ മല്ലികാർജുൻ ഖർഗെയും. ഇരുവരുടെയും അസാന്നിധ്യം വലിയ രാഷ്ട്രീയ ചർച്ചകൾക്ക് വഴി തുറന്നിരിക്കുകയാണ്. രാഹുൽ ഗാന്ധി ഡൽഹിയിലെ ഇന്ദിരാഭവനിലും മല്ലികാർജുൻ ഖർഗെ കോൺഗ്രസ് ആസ്ഥാനത്തും നടന്ന പാർട്ടി ആഘോഷങ്ങളിൽ സജീവമായി പങ്കെടുത്തു. സോഷ്യൽ മീഡിയയിലൂടെ ഇരുവരും ജനങ്ങൾക്ക് സ്വാതന്ത്ര്യദിനാശംസകൾ നേരുകയും ചെയ്തു.
നേതാക്കളുടെ ഈ നടപടിയെ ബി.ജെ.പി. ശക്തമായി വിമർശിച്ചു. രാഹുൽ ഗാന്ധിയുടെയും ഖർഗെയുടെയും നടപടി ലജ്ജാകരമാണെന്നും അവർക്ക് സങ്കുചിത മനോഭാവമാണെന്നും ബി.ജെ.പി. കുറ്റപ്പെടുത്തി. അതേസമയം, നേതാക്കൾ ഔദ്യോഗികമായി ഒരു വിശദീകരണവും നൽകിയിട്ടില്ലെങ്കിലും, കഴിഞ്ഞ വർഷം ചെങ്കോട്ടയിലെ ഇരിപ്പിട ക്രമീകരണത്തിൽ രാഹുൽ ഗാന്ധിക്ക് ഉണ്ടായ അതൃപ്തിയാണ് ഇതിന് കാരണമെന്നാണ് റിപ്പോർട്ടുകൾ.
കഴിഞ്ഞ വർഷം ഒളിമ്പിക് താരങ്ങൾക്ക് ഇരിപ്പിടം നൽകുന്നതിനായി രാഹുൽ ഗാന്ധിയെ അവസാന നിരയിലേക്ക് മാറ്റിയത് വലിയ വിവാദങ്ങൾക്ക് കാരണമായിരുന്നു. ഈ വിഷയത്തിൽ ഇതുവരെയും രാഹുലോ ഖർഗെയോ പരസ്യമായി പ്രതികരിച്ചിട്ടില്ല.
