ഇലോൺ മസ്കിന്റെ ഉടമസ്ഥതയിലുള്ള സോഷ്യൽ മീഡിയാ പ്ലാറ്റ്ഫോമായ എക്സ് ഇന്ത്യയിൽ സബ്സ്ക്രിപ്ഷൻ നിരക്കുകൾ കുത്തനെ കുറച്ചു. എക്സിന്റെ എല്ലാ സബ്സ്ക്രിപ്ഷൻ പ്ലാനുകളും 48 ശതമാനമാണ് വെട്ടിക്കുറച്ചത്. എക്സ് വെബ്സൈറ്റിൽ ഈ മാറ്റം നിലവിൽ വന്നു.
വെബ് ഉപഭോക്താക്കൾക്ക്
- ബേസിക് പ്ലാൻ വാർഷിക സബസ്ക്രിപ്ഷൻ എടുക്കാൻ മാസം 141.67 രൂപ വീതം വർഷത്തേക്ക് 1700 രൂപ വരും. പ്രതിമാസ സബ്സ്ക്രിപ്ഷൻ ആണെങ്കിൽ മാസം 170 രൂപയാണ് വരിക.
- പ്രീമിയം പ്ലാനിൽ വാർഷിക സബ്സ്ക്രിപ്ഷൻ എടുക്കാൻ മാസം 356 രൂപ വീതം ഒരു വർഷത്തേക്ക് 4272 രൂപ വരും. ഇതേ പ്ലാൻ പ്രതിമാസ സബ്സ്ക്രിപ്ഷൻ ആണെങ്കിൽ 427 രൂപയാണ്.
- പ്രീമിയം പ്ലസ് സബ്സ്ക്രിപ്ഷന് 2570 രൂപയാണ് പ്രതിമാസ നിരക്ക്. ഇതേ പ്ലാൻ വാർഷിക സബ്സ്ക്രിപ്ഷൻ എടുക്കുമ്പോൾ 26400 രൂപ വരും.
മൊബൈൽ ഫോൺ ഉപഭോക്താക്കൾക്ക്
- ബേസിക് പ്ലാൻ എടുക്കാൻ മാസം 141.67 രൂപ വീതം വാർഷിക നിരക്കായി 1700 രൂപ ചെലവ് വരും. പ്രതിമാസ പ്ലാൻ ആണെങ്കിൽ 170 രൂപയാണ് നിരക്ക്.
- പ്രീമിയം പ്ലാൻ ആണെങ്കിൽ, വാർഷിക പ്ലാനിൽ മാസം 391.67 രൂപ വീതം ഒരു വർഷത്തേക്ക് 4700രൂപ നൽകണം. പ്രതിമാസ പ്ലാനിൽ 470 രൂപയാണ് നിരക്ക്
- പ്രീമിയം പ്ലസ് എടുക്കാൻ, മാസം 4158.33 രൂപ വീതം വാർഷിക നിരക്കായി 49900 രൂപ നൽകണം, പ്രതിമാസ പ്ലാൻ ആണെങ്കിൽ മാസം 4999 രൂപയാണ് നിരക്ക്.
ബേസിക് പ്ലാനിൽ സ്മോൾ റിപ്ലൈ ബൂസ്റ്റ്, ബുക്ക് മാർക്ക് ഫോൾഡറുകൾ, ഹൈലൈറ്റ് ടാബ്, എഡിറ്റ് പോസ്റ്റ് ഫീച്ചർ, ദൈർഘ്യമേറിയ പോസ്റ്റുകൾ എഴുതാനുള്ള സൗകര്യം എന്നിവ ലഭിക്കും.
ബേസിക് പ്ലാനിലെ എല്ലാ സൗകര്യങ്ങൾക്കുമൊപ്പം, ലാർജർ റിപ്ലൈ ബൂസ്റ്റ്, പരസ്യങ്ങളുടെ എണ്ണത്തിൽ നിയന്ത്രണം, പോസ്റ്റുകളിൽ നിന്ന് വരുമാനം നേടാനുള്ള സൗകര്യം, ചെക്ക് മാർക്ക്, ലിമിറ്റ് കൂടുതലുള്ള ഗ്രോക്ക് എന്നിവ ഉപയോഗിക്കാം. ഇതോടൊപ്പം എക്സ് പ്രോ, അനലിറ്റിക്സ്, മീഡിയാ സ്റ്റുഡിയോ, ക്രിയേറ്റർ സബ്സ്ക്രിപ്ഷൻ ഫീച്ചറുകളും ലഭിക്കും.
പ്രീമിയം പ്ലസ് പ്ലാനിൽ പ്രീമിയം പ്ലാനിലെ എല്ലാ സൗകര്യങ്ങൾക്കുമൊപ്പം പരസ്യങ്ങൾ പൂർണമായും ഒഴിവാക്കപ്പെടും എക്സ് പോസ്റ്റുകൾക്ക് നിങ്ങൾ നൽകുന്ന മറുപടികൾക്ക് റീച്ച് വർധിക്കും, ലേഖനങ്ങൾ എഴുതാനാവും. എക്സിലെ തത്സമയ ട്രെൻഡുകൾ അറിയാനുള്ള സൗകര്യമുണ്ടാവും. ഇതോടൊപ്പം ഉയർന്ന പരിധിയിലുള്ള ഗ്രോക്ക് ഫീച്ചറുകളും ഉപയോഗിക്കാം.
