യുഎഇ: മധ്യേഷ്യയിലെ സംഘർഷങ്ങൾ വർധിച്ച സാഹചര്യത്തിലും ഇറാൻ, ഇറാഖ്, ഇസ്രായേൽ തുടങ്ങിയ രാജ്യങ്ങളിലെ വ്യോമപാതകൾ അടച്ചതുമൂലം യുഎഇയിലെ എയർലൈനുകൾ നിരവധി വിമാനങ്ങൾ റദ്ദാക്കുകയും പുനഃക്രമീകരിക്കുകയും ചെയ്തു എന്നാണ് റിപ്പോർട്ട്. എമിറേറ്റ്സ്, എത്തിഹാദ്, ഫ്ലൈദുബായ്, എയർ അറേബ്യ, വിസ് എയർ അബുദാബി തുടങ്ങിയ വിമാനക്കമ്പനികൾ യാത്രാ അറിയിപ്പുകൾ പുറത്തിറക്കിയിട്ടുണ്ട്. വിമാനങ്ങൾ റദ്ദാക്കിയാൽ എയർലൈനുകൾ സൗജന്യമായി ടിക്കറ്റ് മാറ്റി നൽകുകയോ പണം തിരികെ നൽകുകയോ ചെയ്യും. അതിനാൽ വിമാനക്കമ്പനിയുടെ അറിയിപ്പ് ലഭിച്ച ശേഷം മാത്രം ടിക്കറ്റ് റദ്ദാക്കുക.
യുഎഇ ആസ്ഥാനമായുള്ള വിമാനക്കമ്പനികൾ യാത്രക്കാർക്ക് ആവശ്യമായ വിവരങ്ങൾ വേഗത്തിൽ നൽകുന്നുണ്ട്. ദുബായ് വിമാനത്താവളങ്ങൾ യാത്രയിലെ തടസ്സങ്ങൾ പരിഹരിക്കാൻ എമർജൻസി ഓപ്പറേഷൻ പ്ലാൻ തയ്യാറാക്കിയിട്ടുണ്ട്. ഇറാൻ-ഇസ്രായേൽ സംഘർഷത്തെ തുടർന്ന് നിരവധി വിമാനങ്ങൾ റദ്ദാക്കിയതിനാൽ ദുബായിലേക്കുള്ള യാത്രകൾ തടസ്സപ്പെട്ടു. പല യൂറോപ്യൻ, യുഎസ് പൗരൻമാരും തങ്ങളുടെ യാത്രകൾ റദ്ദാക്കിയിട്ടുണ്ട്.
വിമാനക്കമ്പനികൾ യാത്ര റദ്ദാക്കിയാൽ യാത്രക്കാർക്ക് സൗജന്യമായി ടിക്കറ്റ് മാറ്റാനോ റീഫണ്ട് ചെയ്യാനോ അർഹതയുണ്ട്. യുഎഇയുടെ കൊമേഴ്സ്യൽ ട്രാൻസാക്ഷൻസ് നിയമം അനുസരിച്ച്, വിമാനക്കമ്പനികൾ റദ്ദാക്കിയാൽ യാത്രക്കാർക്ക് റീബുക്കിംഗോ റീഫണ്ടോ നൽകാൻ ബാധ്യസ്ഥരാണ്.
വിമാനക്കമ്പനികൾ സാധാരണയായി ബുക്കിംഗിൽ നൽകിയിട്ടുള്ള ഇമെയിൽ വിലാസം അല്ലെങ്കിൽ ഫോൺ നമ്പർ വഴിയാണ് യാത്രക്കാരെ അറിയിക്കുന്നത്. യാത്രക്കാർ തങ്ങളുടെ കോൺടാക്റ്റ് വിവരങ്ങൾ എയർലൈനിന്റെ വെബ്സൈറ്റിൽ കൃത്യമായി അപ്ഡേറ്റ് ചെയ്യണം. ട്രാവൽ ഏജന്റ് വഴിയാണ് ബുക്ക് ചെയ്തതെങ്കിൽ വിവരങ്ങൾ അവരെ ഫ്ലെെറ്റ് അധികൃതർ വിവരങ്ങൾ അറിയിക്കും.
എമിറേറ്റ്സ് എയർലൈൻസിൽ ബുക്ക് ചെയ്തവർക്ക് +971 600 555555 എന്ന നമ്പറിൽ ബന്ധപ്പെടാവുന്നതാണ്. എത്തിഹാദ് എയർലൈൻസ് യാത്രക്കാർക്ക് +971 600 555 666 എന്ന നമ്പറിലും ബന്ധപ്പെട്ടാം. ഫ്ലൈദുബായ് യാത്രക്കാർക്ക് വെബ്സൈറ്റ് വഴിയും ബുക്കിംഗ് മാറ്റാവുന്നതാണ്. എയർ അറേബ്യ യാത്രക്കാർക്ക് വെബ്സൈറ്റ് വഴി ബുക്കിംഗ് മാറ്റാനോ ട്രാവൽ ഏജന്റുമായി ബന്ധപ്പെടാനോ സാധിക്കും. വിസ് എയർ അബുദാബി യാത്രക്കാർക്ക് സൗജന്യമായി റീബുക്ക് ചെയ്യാനോ പണം പൂർണ്ണമായി തിരികെ വാങ്ങാനോ സാധിക്കും.
വിമാനം റദ്ദാക്കിയാൽ, ബുക്കിംഗ് റഫറൻസ് നമ്പർ, അവസാന പേര്, ഫ്ലൈറ്റ് നമ്പർ, റദ്ദാക്കിയ തീയതി തുടങ്ങിയ വിവരങ്ങൾ യാത്രക്കാർക്ക് ലഭിക്കും. എയർലൈൻ പോളിസി അനുസരിച്ച്, യാത്രക്കാർക്ക് മുഴുവൻ പണവും റീഫണ്ട് ചെയ്യാനോ, മറ്റ് ഫ്ലൈറ്റുകളിൽ സൗജന്യമായി റീബുക്ക് ചെയ്യാനോ, ഭാവിയിൽ യാത്ര ചെയ്യുന്നതിനുള്ള വൗച്ചറുകൾ നേടാനോ അർഹതയുണ്ട്.
വിമാനം റദ്ദാക്കുന്നതിന് മുമ്പ് നിങ്ങൾ സ്വയം ടിക്കറ്റ് റദ്ദാക്കുകയാണെങ്കിൽ, പണം നഷ്ടപ്പെടാൻ സാധ്യതയുണ്ട്. എയർലൈനിന്റെ ഔദ്യോഗിക അറിയിപ്പ് ലഭിച്ച ശേഷം മാത്രം റദ്ദാക്കുക. യാത്രക്കാർ എപ്പോഴും എയർലൈൻ വെബ്സൈറ്റോ ആപ്പോ ഉപയോഗിച്ച് ഫ്ലൈറ്റ് സ്റ്റാറ്റസ് പരിശോധിക്കുന്നത് നല്ലതാണ്. ചിലപ്പോൾ റീഫണ്ട് പ്രോസസ്സ് ചെയ്യാൻ കൂടുതൽ സമയമെടുത്തേക്കാം.
