യുഎഇ: വേനലവധിക്ക് യുഎഇയിലേക്ക് യാത്ര പുറപ്പെടാൻ പ്ലാൻ ചെയ്യുന്നുണ്ടോ? എങ്കിൽ യുഎഇ ഉൾപ്പെടെയുള്ള ജിസിസി രാജ്യങ്ങളിൽ താമസിക്കുന്ന പ്രവാസികൾക്ക് ഇനി സൗദി അറേബ്യയിലേക്കുള്ള യാത്ര കൂടുതൽ എളുപ്പമാകും. വിസ നടപടികളിൽ സൗദി കൊണ്ടുവന്ന ഏറ്റവും പുതിയ ഇളവുകൾ പ്രകാരം യോഗ്യരായ താമസക്കാർക്ക് ഒരു വർഷത്തെ മൾട്ടിപ്പിൾ എൻട്രി ഇലക്ട്രോണിക് വിസയ്ക്ക് ഓൺലൈനായി അപേക്ഷിക്കാം.
സൗദി അറേബ്യ ജിസിസി രാജ്യങ്ങളിലെ പ്രവാസികൾക്കായി നടപ്പാക്കിയ ഈ മൾട്ടിപ്പിൾ എൻട്രി വിസ വർഷത്തിനുള്ളിൽ ആവർത്തിച്ചുള്ള സന്ദർശനങ്ങൾ അനുവദിക്കുന്നു. കൂടാതെ ടൂറിസം, ബിസിനസ്സ് ആവശ്യങ്ങൾ, സുഹൃത്തുക്കളെയും കുടുംബാംഗങ്ങളെയും സന്ദർശിക്കൽ, ഹജ്ജ് സീസൺ ഒഴികെയുള്ള ഉംറ നിർവ്വഹണം എന്നിവയുൾപ്പെടെ വിവിധ യാത്രാ ആവശ്യങ്ങൾക്ക് ഈ വിസ പ്രയോജനപ്പെടുത്താം.
സാംസ്കാരിക യാത്രകളോ, പ്രൊഫഷണൽ സന്ദർശനങ്ങളോ, വ്യക്തിപരമായ ആവശ്യങ്ങൾക്കോ ഈ വിസ വളരെ പ്രയോജനകരമാണ്. ഇത് ജിസിസി നിവാസികൾക്കായി സൗദി അറേബ്യ നിലവിൽ രണ്ട് തരം ഇ വിസകളാണ് വാഗ്ദാനം ചെയ്യുന്നത്. സിംഗിൾ എൻട്രി ഇ-വിസ: 90 ദിവസത്തെ സാധുതയുള്ള ഈ വിസ, ഒറ്റത്തവണ പ്രവേശനവും 90 ദിവസം വരെ താമസവും അനുവദിക്കുന്നു.
മൾട്ടിപ്പിൾ എൻട്രി ഇ-വിസ ഒരു വർഷത്തേക്ക് സാധുതയുള്ള ഈ വിസ, വർഷത്തിൽ ഒന്നിലധികം തവണ പ്രവേശനം അനുവദിക്കുമ്പോൾ, ഓരോ തവണയും പരമാവധി 90 ദിവസമാണ് താമസിക്കാൻ സാധിക്കുക. യുഎഇ നിവാസികൾക്ക് സൗദി ഇ വിസയ്ക്ക് അപേക്ഷിക്കാൻ ചില വ്യവസ്ഥകൾ പാലിക്കേണ്ടതുണ്ട്.
കുറഞ്ഞത് മൂന്ന് മാസത്തെ സാധുത ശേഷിക്കുന്ന യുഎഇ റെസിഡൻസി വിസ നിർബന്ധമായും കൈവശം വെക്കണം. കൂടാതെ കുറഞ്ഞത് ആറ് മാസത്തേക്ക് സാധുതയുള്ള പാസ്പോർട്ട് ഉണ്ടായിരിക്കണം. സ്വന്തമായി യാത്ര ചെയ്യുന്നവർക്ക് കുറഞ്ഞത് 18 വയസ്സ് പ്രായമുണ്ടായിരിക്കണം.
18 വയസ്സിന് താഴെയുള്ള പ്രായപൂർത്തിയാകാത്തവർക്കൊപ്പം മാതാപിതാക്കളോ നിയമപരമായ രക്ഷിതാവോ നിർബന്ധമായും ഉണ്ടായിരിക്കണം.
കൂടാതെ പാസ്‌പോർട്ടിന്റെ പ്രധാന ഐഡി പേജിന്റെ സ്കാൻ ചെയ്ത കോപ്പി ചെയ്യണം. യുഎഇ താമസ വിസയുടെ കോപ്പി, വൈറ്റ് ബാക്ക്ഗ്രൗണ്ടുള്ള പാസ്പോർട്ട് സൈസ് ഫോട്ടോ, ksavisa.sa എന്ന വെബ്‌സൈറ്റിലെ സൗദി അറേബ്യയുടെ ഏകീകൃത ദേശീയ വിസ പ്ലാറ്റ്‌ഫോം വഴിയാണ് ഇ വിസകൾക്ക് അപേക്ഷിക്കേണ്ടത്.
ആദ്യം യാത്രാ, വിസ വിശദാംശങ്ങൾ നൽകുക, തുടർന്ന് വ്യക്തിഗത വിവരങ്ങൾ ചേർക്കുക, പാസ്പോർട്ട് വിശദാംശങ്ങളും യുഎഇ റെസിഡൻസി വിസ വിശദാംശങ്ങളും അപ്‌ലോഡ് ചെയ്യുക മെഡിക്കൽ ഇൻഷുറൻസ് തിരഞ്ഞെടുത്ത് പണം അടയ്ക്കുന്നതോടെ അപേക്ഷാ പ്രക്രിയ പൂർത്തിയാകും. കൂടാതെ അപേക്ഷ അംഗീകാരത്തിനായി 3 പ്രവൃത്തി ദിവസങ്ങൾ വരെ എടുത്തേക്കാം. അംഗീകാരം ലഭിച്ചുകഴിഞ്ഞാൽ വിസ നിങ്ങളുടെ രജിസ്റ്റർ ചെയ്ത ഇമെയിൽ ഐഡിയിലേക്ക് അയയ്ക്കുന്നതാണ്.
