കൊല്ലം: തെക്കൻ കേരളത്തിലെ തൃശൂർ പൂരം എന്നറിയപ്പെടുന്ന കൊല്ലം പൂരത്തോടനുബന്ധിച്ച് പ്രാദേശിക അവധി പ്രഖ്യാപിച്ച് ജില്ലാ കളക്ടർ. ആശ്രാമം ശ്രീകൃഷ്ണസ്വാമി ക്ഷേത്രത്തിലെ പൂരത്തോടനുബന്ധിച്ച് ഏപ്രിൽ 15 ചൊവ്വാഴ്ചയാണ് കോര്പറേഷന് പരിധിയില് ജില്ലാ കളക്ടര് എന് ദേവിദാസ് അവധി പ്രഖ്യാപിച്ചത്. പ്രദേശത്തെ ജീവനക്കാർക്ക് അടുപ്പിച്ച് നാല് ദിവസത്തെ അവധിയാണ് ഇതോടെ ലഭിക്കാൻ പോകുന്നത്. കളക്ടറുടെ അവധി അറിയിപ്പും അവധി ദിനങ്ങളെക്കുറിച്ചും വിശദമായി അറിയാം
കൊല്ലം പൂരം: പ്രാദേശിക അവധി പ്രഖ്യാപിച്ചു
കൊല്ലം ആശ്രാമം ശ്രീകൃഷ്ണസ്വാമി ക്ഷേത്രത്തിലെ പൂരത്തോടനുബന്ധിച്ച് ഏപ്രില് 15ന് ഉച്ചക്ക് രണ്ട് മുതലാണ് കോര്പറേഷന് പരിധിയില് ജില്ലാ കലക്ടര് എന് ദേവിദാസ് പ്രാദേശിക അവധി പ്രഖ്യാപിച്ചു. നേരത്തെ നിശ്ചയിച്ച പൊതുപരീക്ഷകള്ക്കും സര്ക്കാര് പരിപാടികള്ക്കും അവധി ബാധകമാകില്ലെന്ന് കളക്ടർ വ്യക്തമാക്കിയത്. പൂരത്തോടനുബന്ധിച്ച് ഉച്ചയ്ക്ക് ശേഷമാണ് അവധി നൽകിയത്.
നാല് ദിവസത്തെ അവധി
ഏപ്രിൽ 15 ചൊവ്വാഴ്ച ഉച്ചയ്ക്ക് ശേഷമാണ് കൊല്ലം കോർപറേഷൻ പരിധിയിൽ അവധി നൽകിയതെങ്കിലും അതിന് മുൻപുള്ള മൂന്ന് ദിവസവും പൊതു അവധി ദിനങ്ങളാണ്. ഏപ്രിൽ 12 ശനിയാഴ്ച ഈ മാസത്തെ രണ്ടാം ശനിയാഴ്ചയാണ്. അന്ന് ബാങ്ക് അവധിയാണ്. ഏപ്രിൽ 13 ഞായറാഴ്ച അവധി ദിനവും. ഏപ്രിൽ 14 തിങ്കളാഴ്ചയാണ് വിഷു. സംസ്ഥാനത്ത് വിഷുവിന് പൊതു അവധിയാണ്. ഇത് കഴിഞ്ഞാണ് കൊല്ലം പൂരത്തോടനുബന്ധിച്ചുള്ള അവധി
തെക്കൻ കേരളത്തിലെ തൃശൂർ പൂരം
തെക്കൻ കേരളത്തിലെ ‘തൃശൂർ പൂരം’ എന്നറിയപ്പെടുന്ന പൂരമാണ് കൊല്ലം പൂരം. ആശ്രാമത്ത് സ്ഥിതിചെയ്യുന്ന ശ്രീകൃഷ്ണസ്വാമി ക്ഷേത്രത്തിലെ വിഷു ഉത്സവത്തോടനുബന്ധിച്ചു നടക്കുന്ന ആഘോഷമാണ് ഇത്. ആശ്രാമം മൈതാനമാണ് പൂരത്തിന് വേദിയാകുന്നത്. പുതിയകാവ് ഭഗവതി ക്ഷേത്രവും കൊട്ടാരക്കുളം മഹാഗണപതി ക്ഷേത്രവുമാണ് പൂരത്തിൻ്റെ പങ്കാളികൾ.
ഉത്സവത്തിന് കൊടിയേറി
ആശ്രാമം ശ്രീകൃഷ്ണസ്വാമി മഹാക്ഷേത്രത്തിലെ തിരുവുത്സവത്തിന് ഇന്നലെ രാവിലെ കൊടിയേറി. തന്ത്രിമുഖ്യൻ കുളക്കട നമ്പിമഠത്തിൽ രമേശ് ഭാനുഭാനു പണ്ടാരത്തിലിൻ്റെ കാർമ്മികത്വത്തിലാണ് കൊടിയേറ്റം നടന്നത്. പത്തുദിവസങ്ങളിലായി വിവിധ വിശേഷാൽ പൂജാദികർമ്മങ്ങളോടും കൂടി നടക്കുന്ന ഉത്സവം ഏപ്രിൽ 15ന് കൊല്ലം പൂരത്തോടെയാണ് സമാപിക്കുക.
ആൽത്തറമേളവും എഴുന്നളത്തും കുടമാറ്റവും
ഏപ്രിൽ 15ന് രാവിലെ 9 മുതൽ ചെറുപൂരം എഴുന്നള്ളത്ത് നടക്കും. 11:30 മുതൽ ആന നീരാട്ട്, 12ന് ആന ഊട്ട്, 12:30 മുതൽ പൂര സദ്യ. വൈകിട്ട് മൂന്ന് മുതൽ കല്ലൂർ ഉണ്ണിക്കൃഷ്ണമാരാരുടെയും തുക്കടവൂർ അഖിലിൻ്റെയും നേതൃത്വത്തിൽ ഇരുന്നൂറിൽ പരം കലാകാരന്മാർ നയിക്കുന്ന ആൽത്തറമേളം. വൈകിട്ട് 4 മുതൽ താമരക്കുളം മഹാഗണപതിയുടെയും പുതിയകാവ് ഭഗവതിയുടെയും എഴുന്നെള്ളത്ത് നടക്കും. ഗജവീരൻ തൃക്കടവൂർ ശിവരാജു ആശ്രാമം ശ്രീകൃഷ്ണഭഗവാൻ്റെ തിടമ്പേറ്റും. വൈകിട്ട് 6 മുതൽ ആശ്രാമം മൈതാനത്ത് താമരക്കുളം ശ്രീ മഹാഗണപതിയും പുതിയകാവ് ശ്രീഭഗവതിയും മുഖാമുഖം അണിനിരക്കുന്ന കുടമാറ്റം എന്നിവയും ഉണ്ടാകും.
