നിധി തേടി കിണറ്റിൽ ഇറങ്ങിയ സംഘം പിടിയിൽ. പുരാവസ്തു വകുപ്പിന്റെ ഉടമസ്ഥതയിലുള്ള കിണറ്റിലിറങ്ങിയവരാണ് പോലീസിൻ്റെ പിടിയിലായത്. ഗ്രാമ പഞ്ചായത്ത് വൈസ് പ്രസിഡന്റ് അടക്കം അഞ്ചുപേരാണ് പിടിയിലായത്. കാസർഗോഡ് കുമ്പള ആരിക്കാടി കോട്ടയിലെ ഉപയോഗ ശൂന്യമായ കിണറ്റിൽ നിധി കുഴിക്കാനെത്തിയവരെ കസ്റ്റഡിയിൽ എടുത്തത്.
മൊഗ്രാൽപുത്തുർ പഞ്ചായത്ത് വൈസ് പ്രസിഡന്റും മുസ്ലിം ലീഗ് നേതാവുമായ മുജീബ് കമ്പാർ ഉൾപ്പെടെ 5 പേരാണ് കുമ്പള പോലീസിന്റെ കസ്റ്റഡിയിലുള്ളത്.
ശബ്ദം കേട്ടു വന്ന പരിസരവാസികളാണ് ആദ്യം സംഭവമറിയുന്നത്. നോക്കിയപ്പോൾ കിണറ്റില് രണ്ടുപേർ മൺവെട്ടി ഉപയോഗിച്ച് കിളയ്ക്കുന്നതാണ് കണ്ടത്. നാട്ടുകാരെ കണ്ടതോടെ കിണറിന്റെ സമീപത്ത് നിന്നവർ ഓടിരക്ഷപ്പെടാൻ ശ്രമിച്ചെങ്കിലും ഇവരെ പിടികൂടി കുമ്പള പൊലീസിനെ ഏൽപ്പിക്കുകയായിരുന്നു. പിടിയിലായവരെ മുൻകരുതൽ അറസ്റ്റ് ചെയ്തു വിട്ടയക്കുമെന്ന് പൊലീസ് പറഞ്ഞു.
