തെന്നിന്ത്യന് സിനിമാ ലോകം ഏറെ പ്രതീക്ഷയോടെ കാത്തിരുന്ന രാം ചരണിന്റെ ഏറ്റവും പുതിയ ചിത്രമായ ‘ഗെയിം ചേഞ്ചര്’ ബോക്സ് ഓഫീസില് കാര്യമായ ചലനമുണ്ടാക്കാതെ പ്രതിസന്ധിയിലേക്ക് നീങ്ങുകയാണ്. രാജമൗലിയുടെ ‘ആര്ആര്ആര്’ എന്ന ബ്രഹ്മാണ്ഡ ചിത്രത്തിന് ശേഷം രാം ചരണ് നായകനായി എത്തുന്ന ചിത്രം എന്ന നിലയില് വലിയ ഹൈപ്പോടെ എത്തിയ ‘ഗെയിം ചേഞ്ചര്’ ആരാധകരെയും സിനിമാ പ്രേമികളെയും ഒരുപോലെ നിരാശപ്പെടുത്തി. ജനുവരി 10-ന് റിലീസ് ചെയ്ത ചിത്രം ആദ്യ ദിവസങ്ങളില് നേടിയ കലക്ഷനേക്കാള് വലിയ ഇടിവാണ് പിന്നീട് രേഖപ്പെടുത്തിയത്.
ചിത്രം റിലീസ് ചെയ്ത ഉടന് തന്നെ ബോക്സ് ഓഫീസ് കളക്ഷന് കണക്കുകളില് കൃത്രിമം കാണിക്കുന്നു എന്ന ആരോപണവുമായി നിരവധി പേര് രംഗത്തെത്തിയിരുന്നു. ആദ്യ ദിനം ചിത്രം ലോകമെമ്പാടുമായി 186 കോടി രൂപ നേടിയെന്ന് നിര്മ്മാതാക്കള് അവകാശപ്പെട്ടതാണ് വലിയ വിമര്ശനങ്ങള്ക്കും വിവാദങ്ങള്ക്കും തിരികൊളുത്തിയത്. പല ട്രേഡ് അനലിസ്റ്റുകളും ഈ കണക്കുകള് ചോദ്യം ചെയ്യുകയും യഥാര്ത്ഥ കളക്ഷന് വിവരങ്ങള് പുറത്തുവിടണമെന്ന് ആവശ്യപ്പെടുകയും ചെയ്തു. ഇത് ചിത്രത്തിന്റെ പ്രതിച്ഛായക്ക് വലിയ തോതില് മങ്ങലേല്പ്പിച്ചു.
2025-ല് ഏറ്റവും കൂടുതല് പ്രേക്ഷകര് കാത്തിരുന്ന ചിത്രങ്ങളില് ഒന്നായിരുന്നു ‘ഗെയിം ചേഞ്ചര്’. ‘ആര്ആര്ആര്’ എന്ന ചിത്രത്തിന് ശേഷം രാം ചരണിന്റെ തിരിച്ചുവരവ് എന്നതായിരുന്നു പ്രധാന ആകര്ഷണം. പ്രശസ്ത സംവിധായകന് എസ് ശങ്കര് ഒരുക്കിയ ഈ പൊളിറ്റിക്കല് ത്രില്ലറില് കിയാരാ അദ്വാനി, അഞ്ജലി, എസ്.ജെ. സൂര്യ, ശ്രീകാന്ത്, സുനില്, ജയറാം, സമുദ്രക്കനി തുടങ്ങിയ വലിയ താരനിര തന്നെ അണിനിരന്നിരുന്നു.
‘ഗെയിം ചേഞ്ചറില്’ സത്യസന്ധനായ ഒരു ഐഎഎസ് ഉദ്യോഗസ്ഥനായി രാം ചരണ് ഇരട്ട വേഷത്തില് എത്തുന്നു. രാഷ്ട്രീയത്തിലെ അഴിമതിക്കെതിരെ തിരഞ്ഞെടുപ്പിലൂടെ പോരാടുന്ന കഥയാണ് ചിത്രം പറയുന്നത്. റിപ്പോര്ട്ട് പ്രകാരം, ‘ഗെയിം ചേഞ്ചര്’ 400 കോടി രൂപയുടെ വലിയ ബജറ്റിലാണ് നിര്മ്മിച്ചിരിക്കുന്നത്. ഇത് ഇന്ത്യന് സിനിമയിലെ ഏറ്റവും ചെലവേറിയ ചിത്രങ്ങളില് ഒന്നാണ്. എന്നിരുന്നലും, റിലീസിന് ശേഷം ചിത്രം ബോക്സ് ഓഫീസില് ശരാശരി പ്രതികരണമാണ് നേടിയത്. 150 കോടി രൂപയുടെ കലക്ഷന് പോലും നേടാന് ചിത്രം പാടുപെടുകയാണ്.
തിയേറ്ററുകളില് സിനിമയുടെ പ്രദര്ശനം അവസാനിക്കുമ്പോള്, വാലന്റൈന്സ് ദിനത്തില് അതായത് ഫെബ്രുവരി 14ന് ഒടിടി-യില് എത്തുമെന്ന് പ്രതീക്ഷിക്കുന്നു. സാധാരണയായി ഒരു സിനിമ തിയേറ്റര് റിലീസ് കഴിഞ്ഞ് 6-8 ആഴ്ചകള്ക്കുള്ളിലാണ് ഒടിടി-യില് റിലീസ് ചെയ്യാറുള്ളത്. എന്നാല് ‘ഗെയിം ചേഞ്ചറി’ന്റെ മോശം ബോക്സ് ഓഫീസ് കളക്ഷന് നേരത്തെയുള്ള റിലീസിന് കാരണമായേക്കാം. ആമസോണ് പ്രൈം വീഡിയോ ‘ഗെയിം ചേഞ്ചറി’ന്റെ ഡിജിറ്റല് അവകാശം സ്വന്തമാക്കിയിട്ടുണ്ടെന്നാണ് റിപ്പോര്ട്ട്. 105 കോടി രൂപയ്ക്കാണ് ഡീല് ഉറപ്പിച്ചത് എന്നാണ് വിവരം. എന്നിരുന്നാലും, ‘ഗെയിം ചേഞ്ചറി’ന്റെ ഹിന്ദി പതിപ്പ് ആമസോണ് പ്രൈം വീഡിയോയില് സ്ട്രീം ചെയ്തേക്കില്ല. റിപ്പോര്ട്ടുകള് പ്രകാരം, ഹിന്ദി പതിപ്പ് സീ5-ല് കാണാന് സാധിക്കും.
അതേസമയം, വലിയ സിനിമകള് ചെയ്യുന്നതിന് പേരുകേട്ട സംവിധായകന് എസ്. ശങ്കര്, ഒരു അഭിമുഖത്തില് ‘ഗെയിം ചേഞ്ചറി’ന്റെ കാര്യത്തില് താന് പൂര്ണ തൃപ്തനല്ലെന്ന് തുറന്നുപറഞ്ഞു. ‘ഗെയിം ചേഞ്ചറിന്റെ ഔട്ട്പുട്ടില് ഞാന് പൂര്ണ തൃപ്തനല്ല. ഞാന് കൂടുതല് മികച്ചതാക്കേണ്ടതായിരുന്നു. സമയപരിമിതികള് കാരണം പല നല്ല രംഗങ്ങളും വെട്ടിച്ചുരുക്കിയിട്ടുണ്ട്. മൊത്തം ദൈര്ഘ്യം അഞ്ചു മണിക്കൂറില് കൂടുതലായിരുന്നു’, അദ്ദേഹം കൂട്ടിച്ചേര്ത്തു.
അല്ലു അര്ജുന്റെ ‘പുഷ്പ 2: ദി റൂള്’ ബോക്സ് ഓഫീസില് 53-ാം ദിവസവും മികച്ച പ്രകടനം തുടര്ന്നു. റിപ്പബ്ലിക് ദിന അവധിക്കാലത്ത് എട്ടാമത്തെ ആഴ്ചയിലേക്ക് കടന്ന ചിത്രം, രാം ചരണിന്റെ ‘ഗെയിം ചേഞ്ചറി’നെതിരെ ശക്തമായ മത്സരം കാഴ്ചവെച്ചു. സാക്നില്ക്കിന്റെ കണക്കുകള് പ്രകാരം, ‘പുഷ്പ 2’ ഒരു കോടി രൂപ കടന്നപ്പോള്, ‘ഗെയിം ചേഞ്ചര്’ക്ക് ആ നേട്ടം കൈവരിക്കാന് കഴിഞ്ഞില്ല. ‘പുഷ്പ 2’ എട്ടാമത്തെ വാരാന്ത്യത്തില് ഏകദേശം 1.75 കോടി രൂപ നേടിയപ്പോള്, ‘ഗെയിം ചേഞ്ചര്’ മൂന്നാമത്തെ വാരാന്ത്യത്തില് ഏകദേശം 87 ലക്ഷം രൂപയാണ് നേടിയത്.
ജനുവരി 27 വരെ, ‘പുഷ്പ 2’ ഇന്ത്യയില് 1232.30 കോടി രൂപ നേടി, ഇത് ഏറ്റവും കൂടുതല് കളക്ഷന് നേടിയ ഇന്ത്യന് സിനിമകളില് ഒന്നായി മാറി. കിയാരാ അദ്വാനി, എസ്. ജെ. സൂര്യ, നാസര്, ബ്രഹ്മാനന്ദം, വെണ്ണല കിഷോര്, മുരളി ശര്മ്മ എന്നിവരടങ്ങുന്ന വലിയ താരനിര തന്നെയുള്ള ‘ഗെയിം ചേഞ്ചര്’ക്ക് മറ്റ് സിനിമകളില് നിന്നും കടുത്ത മത്സരം നേരിടേണ്ടി വന്നു. പ്രത്യേകിച്ച് അക്ഷയ് കുമാറിന്റെ ‘സ്കൈ ഫോഴ്സും’ കങ്കണ റണാവത്തിന്റെ ‘എമര്ജന്സിയും’ പ്രേക്ഷക ശ്രദ്ധ നേടിയത് ‘ഗെയിം ചേഞ്ചറി’ന്റെ ബോക്സ് ഓഫീസ് പ്രകടനത്തെ പ്രതികൂലമായി ബാധിച്ചു.
