മാനന്തവാടി പഞ്ചാരക്കൊല്ലിയില് കടുവ ആക്രമണത്തില് മരിച്ച ആദിവാസി യുവതിയുടെ കുടുംബത്തിന് നഷ്ടപരിഹാരമായി പതിനൊന്ന് ലക്ഷം രൂപനല്കുമെന്ന് മന്ത്രി ഒആര് കേളു. അഞ്ച് ലക്ഷം രൂപ ഇന്ന് തന്നെ നല്കുമെന്നും മന്ത്രി അറിയിച്ചു. നരഭോജി കടുവയെ വെടിവച്ച് കൊല്ലാന് ഉത്തരവിട്ടിട്ടുണ്ട്. പ്രദേശത്തെ ജനങ്ങളുടെ സുരക്ഷ കണക്കിലെടുത്ത് ആര്ആര്ടി സംഘത്തെ വിന്യസിക്കുമെന്ന് മന്ത്രി മാദ്ധ്യമങ്ങളോട് പറഞ്ഞു.
കടുവ ഈ പരിസരത്ത് തന്നെ കാണാന് സാധ്യതയുണ്ട്. ഇതിനെ പിടികൂടാനായി ഇന്നുതന്നെ കൂട് സ്ഥാപിക്കും. ഫെന്സിങ് നടപടികള് വേഗത്തില് പൂര്ത്തിയാക്കും. ടെണ്ടര് നടപടികളില് താമസം വന്നാല് ജനകീയ അടിസ്ഥാനത്തില് പൂര്ത്തിയാക്കുമെന്നും കുടുംബത്തിലെ അംഗത്തിന് ജോലി നല്കുന്ന കാര്യം മന്ത്രിസഭായോഗത്തില് ഉന്നയിക്കുമെന്നും കേളു മാധ്യമങ്ങളോട് പറഞ്ഞു.
മന്ത്രിയുടെ പ്രഖ്യാപനത്തിന് പിന്നാലെ നാട്ടുകാര് പ്രതിഷേധം അവസാനിപ്പിച്ചു. മൃതദേഹം പോസ്റ്റുമോര്ട്ടത്തിനായി മാനന്തവാടി മെഡിക്കല് കോളജിലേക്ക് മാറ്റിയിട്ടുണ്ട്. മാനന്തവാടി നഗരസഭയിലെ പഞ്ചാരക്കൊല്ലിയില് വനമേഖലയോട് ചേര്ന്നാണ് ആദിവാസി യുവതി കൊല്ലപ്പെട്ടത്. പഞ്ചാരക്കൊല്ലി തറാട്ട് ഉന്നതിയിലെ വനംവകുപ്പ് വാച്ചറായ അച്ചപ്പന്റെ ഭാര്യ രാധ (45) ആണ് കൊല്ലപ്പെട്ടത്. ഇന്നു രാവിലെ പതിനൊന്ന് മണിക്കാണ് സംഭവം. പാതി ഭക്ഷിച്ച നിലയിലായിരുന്നു മൃതദേഹം.
