2024 ലെ തിരഞ്ഞെടുപ്പിൽ ഇന്ത്യയിലെ നിലവിലുള്ള സർക്കാരിന് അധികാരം നഷ്ടപ്പെട്ടുവെന്ന മാർക്ക് സക്കർബർഗിന്റെ പരാമർശത്തിൽ മെറ്റാ ഇന്ത്യ ബുധനാഴ്ച ക്ഷമാപണം നടത്തി. ഇത് “അബദ്ധത്തിൽ സംഭവിച്ച പിഴവ്” ആണെന്ന് മെറ്റ അറിയിച്ചു. ഐടി സംബന്ധിച്ച പാർലമെന്ററി പാനലിന്റെ തലവനായ ബിജെപി എംപി നിഷികാന്ത് ദുബെ, ഈ പരാമർശത്തിൽ കമ്പനിയുടെ ഉദ്യോഗസ്ഥരെ വിളിച്ചുവരുത്തുമെന്ന് പറഞ്ഞതിന് ഒരു ദിവസത്തിന് ശേഷമാണ് മെറ്റാ ഇന്ത്യയുടെ വൈസ് പ്രസിഡന്റിന്റെ ക്ഷമാപണം.
“2024 ലെ തിരഞ്ഞെടുപ്പിൽ പല അധികാരത്തിലിരിക്കുന്ന പാർട്ടികളും വീണ്ടും തിരഞ്ഞെടുക്കപ്പെട്ടില്ല എന്ന മാർക്ക് സക്കർബർഗിന്റെ നിരീക്ഷണം നിരവധി രാജ്യങ്ങൾക്ക് ബാധകമാണ്, പക്ഷേ ഇന്ത്യയ്ക്ക് അങ്ങനെയല്ല. ഈ അബദ്ധത്തിൽ സംഭവിച്ച പിഴവിന് ഞങ്ങൾ ക്ഷമ ചോദിക്കുന്നു. മെറ്റയ്ക്ക് ഇന്ത്യ ഇപ്പോഴും പ്രധാനപ്പെട്ട ഒരു രാജ്യമാണ്, അതിന്റെ നൂതന ഭാവിയുടെ ഹൃദയഭാഗത്ത് നിൽക്കാൻ ഞങ്ങൾ ആഗ്രഹിക്കുന്നു,” മെറ്റ ഇന്ത്യയുടെ വൈസ് പ്രസിഡന്റ് ശിവ്നാഥ് തുക്രാൽ കേന്ദ്രമന്ത്രി അശ്വിനി വൈഷ്ണവിന്റെ പോസ്റ്റിന് മറുപടി നൽകി ട്വീറ്റ് ചെയ്തു.
തുക്രലിന്റെ പോസ്റ്റ് റീ-ട്വീറ്റ് ചെയ്തുകൊണ്ട്, ക്ഷമാപണം ഇന്ത്യയിലെ സാധാരണ പൗരന്മാരുടെ വിജയം ആണെന്ന് നിഷികാന്ത് ദുബെ പറഞ്ഞു.
