തിരുവനന്തപുരം: വിവിധ രാജ്യങ്ങളിലുള്ള പ്രവാസി സംഘടനകളെ കോർത്തിണക്കി പ്രവർത്തിക്കുന്ന പ്രവാസി മലയാളി ഫോറത്തിന്റെ ആഭിമുഖ്യത്തിൽ വിവിധ സംഘടനാ പ്രതിനിധികളുടെ നേതൃസംഗമവും പുരസ്കാര സമർപ്പണവും നടത്തി.
ട്രിവാൻഡ്രം ക്ലബിൽ നടന്ന സമ്മേളനം മന്ത്രി സജി ചെറിയാൻ ഉദ്ഘാടനം ചെയ്തു. പ്രവാസി മലയാളി ഫോറം ഗ്ലോബൽ മീറ്റ് ചെയർ നസീർ സലാം അധ്യക്ഷത വഹിച്ചു.
അമേരിക്കൻ മലയാളികൾക്കിടയിൽ ചിരപരിചിതനും ഫോമയുടെ നേതൃനിരയിൽ ശക്തനും അമേരിക്കയിലുടനീളം സാമൂഹിക സാംസ്കാരിക കായിക പ്രവർത്തനങ്ങളിൽ സജീവ സാന്നിധ്യം കൊണ്ട് ശ്രദ്ധേയനുമായ സിജി പാലക്കലോടിയും ഫോക്കാനാ നോർത്ത് അമേരിക്കൻ ജനറൽ സെക്രട്ടറിയും കലാ സാംസ്കാരിക ജീവകാരുണ്യ രംഗത്തു നിസ്തുല സംഭാവനകൾ നൽകുകയും ചെയ്തിട്ടുള്ള ഡോ.കലാ ഷാഹിയും പ്രവാസി മലയാളി ഫോറം പ്രവാസി ശ്രേഷ്ഠ പുരസ്കാരം സജി ചെറിയാനിൽ നിന്നും സ്വീകരിച്ചു.
മാധ്യമ പുരസ്കാരങ്ങൾ: മികച്ച വാർത്ത അവതാരകൻ – അഭിലാഷ് മോഹൻ (മാതൃഭൂമി ന്യൂസ്), മികച്ച വാർത്ത അവതാരക – നിമ്മി മരിയ ജോസ് (ഏഷ്യാനെറ്റ് ന്യൂസ്), മികച്ച റിപ്പോർട്ടർ – സനകൻ വേണുഗോപാൽ (മനോരമ ന്യൂസ്), മികച്ച ക്രൈം ഇൻവെസ്റ്റിഗേറ്റീവ് റിപ്പോർട്ടർ – ടോം കുര്യാക്കോസ് (ന്യൂസ് 18), മികച്ച പ്രവാസികാര്യ പരിപാടി – ക്രിസ്റ്റീന ചെറിയാൻ (24 ന്യൂസ് – അമേരിക്കൻ ഡയലോഗ്), മികച്ച പ്രവാസികാര്യ റിപ്പോർട്ടർ- എസ്. ശ്രീകുമാർ (ഏഷ്യാനെറ്റ്, ലണ്ടൻ) എന്നിവരും
പ്രവാസി സാമൂഹിക പ്രതിബദ്ധത പുരസ്കാരങ്ങൾ പോൾ ടി. ജോസഫ് (പ്രസിഡന്റ് എകെസിഎഎഫ് അസോസിയേഷൻ, ദുബായി), പ്രിൻസ് പള്ളിക്കുന്നേൽ (ഓസ്ട്രിയ) തുടങ്ങിയവരും മന്ത്രിയിൽ നിന്നും സ്വീകരിച്ചു.
വിവിധ പ്രവാസി സംഘടന നേതാക്കളായ ജോണി കുരുവിള, ജോൺ മത്തായി, ഡോ. ജേക്കബ് തോമസ്, ഡോ. രത്നാ കുമാർ, ഡോ. ബിജു, ഡോ. രഘുനാഥ് തുടങ്ങിയവരെയും മന്ത്രി ചടങ്ങിൽ ആദരിച്ചു.
ഗ്ലോബൽ മീറ്റ് കൺവീനർ സുനു എബ്രഹാം ഡയറക്ടർ കെ. മധു, പിന്നണി ഗായിക ദിവ്യ നായർ തുടങ്ങിയവർ പ്രസംഗിച്ചു.
