തിരുവനന്തപുരം: കെഎസ്ആര്ടിസിക്ക് ശമ്പളവും പെന്ഷനും വിതരണം ചെയ്യാനുള്ള 103 കോടി രൂപ അടിയന്തരമായി അനുവദിക്കാന് സര്ക്കാരിനു ഹൈക്കോടതി നിര്ദേശം. അടുത്ത മാസം ഒന്നിനു മുമ്പ് തുക നല്കണമെന്നും കോടതി പറഞ്ഞു.
ജൂലൈ, ഓഗസ്റ്റ് മാസങ്ങളിലെ ശമ്പളവും ഫെസ്റ്റിവല് അലവന്സും നല്കാനുള്ള തുക കൈമാറാനാണ് നിര്ദേശം. ശമ്പളം ഉറപ്പാക്കണമെന്നാവശ്യപ്പെട്ടുള്ള ജീവനക്കാരുടെ ഹര്ജി പരിഗണിക്കുകയായിരുന്നു കോടതി.
സര്ക്കാര് സഹായമില്ലാതെ ശമ്പളം നല്കാനാവില്ലെന്നു കെഎസ്ആര്ടിസി മാനേജ്മെന്റ് കോടതിയില് അറിയിച്ചിരുന്നു. ഡ്യൂട്ടി പരിഷ്കരണം നടപ്പാക്കാത്ത സാഹചര്യത്തിലാണ് സര്ക്കാര് ധനസഹായം നല്കാത്തതെന്നും കെഎസ്ആര്ടിസി കോടതിയില് പറഞ്ഞിരുന്നു.
ശമ്പളം നല്കാന് കെഎസ്ആര്ടിസി പത്തു ദിവസത്തെ സാവകാശം തേടിയെങ്കിലും കോടതി അനുവദിച്ചില്ല. തൊഴിലാളികളെ പട്ടിണിക്കിടരുതെന്നായിരുന്നു കോടതിയുടെ പ്രതികരണം.
