തിരുവനന്തപുരം: കോവിഡ് നിയന്ത്രണങ്ങളില് ഇളവ് അനുവദിച്ച സാഹചര്യത്തില് യാത്രക്കാരുടെ ആവശ്യാനുസരണം സംസ്ഥാനത്ത് ഉടനീളം കെഎസ്ആര്ടിസി പരിമിതമായ സര്വീസുകളും ജല ഗതാഗത വകുപ്പിന്റെ ബോട്ടുകള് 50 ശതമാനവും സര്വീസ് നടത്തുമെന്ന് ഗതാഗത മന്ത്രി ആന്റണി രാജു അറിയിച്ചു.
കോവിഡ് പ്രോട്ടോക്കോള് പാലിച്ചാകും കെഎസ്ആര്ടിസി സര്വീസ് നടത്തുക. തദ്ദേശ സ്വയംഭരണ സ്ഥാപനങ്ങള് സി, ഡി കാറ്റഗറിയില് ഉള്പ്പെടുത്തിയ (ടെസ്റ്റ് പോസിറ്റിവിറ്റി നിരക്ക് 20 ശതമാനം കൂടിയ) പ്രദേശങ്ങളില് സ്റ്റോപ്പ് അനുവദിക്കില്ല. യാത്രക്കാര് കൂടുതല് ഉള്ള സ്ഥലങ്ങളിലേക്കാണ് സര്വീസുകള് നടത്തുന്നത്. ഓര്ഡിനറി ബസുകളില് 12 മണിക്കൂര് എന്ന നിലയില് യാത്രാക്കാരുടെ ആവശ്യാനുസരണമാകും സര്വീസ് നടത്തുക. യാത്രാക്കാര് കൂടുതലുള്ള തിങ്കള്, വെള്ളി ദിവസങ്ങളില് കൂടുതല് സര്വീസുകള് നടത്തും.
ശനി , ഞായര് ദിവസങ്ങളില് അവശ്യ സര്വീസുകള് ഒഴികെ സര്വീസ് നടത്തുകയില്ല. ഞാറാഴ്ച ഉച്ചയ്ക്ക് ശേഷം ദീര്ഘദൂര സര്വീസുകള് പുനഃരാരംഭിക്കും. ഇതോടൊപ്പം സംസ്ഥാനജല ഗതാഗതവകുപ്പിന്റെ ബോട്ടുകള് ഓരോ സ്റ്റേഷനുകളിലും 50 ശതമാനം ഷെഡ്യൂളുകള് വീതം രാവിലെ ഏഴു മുതല് വൈകുന്നേരം ഏഴു വരെ സര്വീസ് നടത്തുമെന്നും മന്ത്രി അറിയിച്ചു.
