ബാങ്കോക്ക്: മ്യാന്മറില് സൈനിക വിമാനം തകര്ന്നുവീണു പ്രശസ്ത ബുദ്ധമത സന്യാസി ഉള്പ്പെടെ 12 പേര് മരിച്ചു. വ്യാഴാഴ്ച സെന്ട്രല് മാന്ഡലെ പ്രവിശ്യയിലായിരുന്നു അപകടമുണ്ടായത്.
രാജ്യ തലസ്ഥാനമായ നയ്പിഡോയില് നിന്നു പ്യിന് ഓ ല്വിന് എന്നറിയപ്പെടുന്ന മെയ്മ്യോയിലേക്കു പോയ വിമാനമാണ് അപകടത്തില്പ്പെട്ടത്. വിമാനം പ്യിന് ഓ ല്വിനിലെ അനിശാഖന് വിമാനത്താവളത്തില് ഇറങ്ങവെയായിരുന്നു അപകടം. മോശം കാലാവസ്ഥയാണ് അപകടകാരണമെന്നാണു പ്രാഥമിക സൂചന.
പ്യിന് ഓ ല്വിനില് പുതുതായി നിര്മിക്കുന്ന ബുദ്ധമതകേന്ദ്രത്തിന്റെ തറക്കല്ലിടല് ചടങ്ങിനായാണ് ആറു സൈനികരും രണ്ടു സന്യാസികളും ആറു വിശ്വാസികളും ഉള്പ്പെടുന്ന സംഘം നയ്പിഡോയില്നിന്നു പുറപ്പെട്ടത്. സെ കോണ് മൊസ്ട്രിയിലെ പ്രധാന സന്യാസിയാണ് മരിച്ചവരില് ഒരാളെന്നാണ് റിപ്പോര്ട്ട്.
