തിരുവനന്തപുരം: സംസ്ഥാനത്ത് കൊവിഡ് വ്യാപിപ്പിക്കാനും ഇതിലൂടെ സര്‍ക്കാരിനെ വേട്ടയാടാനും ചിലര്‍ ശ്രമിക്കുന്നതായി സംശയിക്കുന്നുവെന്ന് മന്ത്രി കടകംപള്ളി സുരേന്ദ്രന്‍. ജനങ്ങളുടെ ജീവനാണ് പ്രാധാന്യം നല്‍കേണ്ടത്. സര്‍ക്കാര്‍ അതിനുള്ള നടപടികള്‍ തുടരുമെന്നും അദ്ദേഹം പറഞ്ഞു. അതേ സമയം, തിരുവനന്തപുരത്ത് സമൂഹ വ്യാപനത്തിന് സാധ്യതയില്ലെന്നും പ്രദേശത്ത് ജാഗ്രതയോടെയുള്ള പ്രവര്‍ത്തനങ്ങള്‍ ആവശ്യമാണെന്നും മന്ത്രി പറഞ്ഞു. കൊവിഡ് മാനദണ്ഡങ്ങള്‍ പാലിക്കാതെ കടകള്‍ തുറക്കാന്‍ അനുവദിക്കില്ലെന്നും മന്ത്രി പറഞ്ഞു.
ബസുകളില്‍ യാത്ര ചെയ്യുന്നവര്‍ മുന്‍കരുതലുകള്‍ ഉറപ്പാക്കണമെന്നും സാമൂഹിക അകലം പാലിക്കാതെയുള്ള സമരങ്ങള്‍ തലസ്ഥാനത്ത് അനുവദിക്കില്ലെന്നും കടകംപള്ളി സുരേന്ദ്രന്‍ വ്യക്തമാക്കി. കാര്യങ്ങള്‍ ചര്‍ച്ച ചെയ്യാന്‍ നാളെ കോര്‍പറേഷന്‍ അധികൃതരുടെയും എംഎല്‍എമാരുടെയും യോഗം ചേരും.
