കൊച്ചി: പ്രേഷകരുടെ പ്രിയപ്പെട്ട താരമാണ് അനുമോള്. അഭിനയിച്ചിട്ടുള്ള എല്ലാ ചിത്രങ്ങളിലും മികച്ച കഥാപാത്രങ്ങളെ അവതരിപ്പിച്ചിട്ടുള്ള താരം ചുരുങ്ങിയ കാലം കൊണ്ട് ഒരു വലിയ ആരാധക വൃന്ദത്തെ സൃഷ്ടിച്ചിട്ടുണ്ട്. സോഷ്യല് മീഡിയയിലും അനുമോള് സജീവമാണ്. ഇപ്പോഴിതാ ഒരു ചാനല് അഭിമുഖത്തിലൂടെ സിനിമയില് ചൂഷണം നടക്കുന്നു എന്ന ആരോപണത്തില് പ്രതികരണവുമായി രംഗത്തെത്തിയിരിക്കുകയാണ് അനുമോള്.
അനുമോളുടെ വാക്കുകള് ഇങ്ങനെ.
‘സ്വന്തം നിലപാടില് ഉറച്ച് നിന്നാല് ആരും ആരെയും ചൂഷണം ചെയ്യില്ല. എന്നെ സംബന്ധിച്ച് ഞാന് ബോള്ഡായി സംസാരിക്കും. വീട്ടുകാര് അങ്ങനെയാണെന്നെ വളര്ത്തിയത്. ആരെങ്കിലും അപമാനിക്കാന് ശ്രമിച്ചാല് ഞാന് പ്രതികരിക്കുകയും ചെയ്യും. അതുകൊണ്ട് തന്നെ ഈ പറഞ്ഞ തരത്തിലുള്ള യാതൊരു ലൈംഗിക പീഡനാനുഭവങ്ങളൊന്നും എനിക്കുണ്ടായിട്ടില്ല. വഴങ്ങിക്കൊടുത്ത ശേഷം അതുപറഞ്ഞു നടക്കുന്നത് മര്യാദയല്ല. സാഹചര്യമതായിരുന്നു എന്ന് പറഞ്ഞിട്ടും കാര്യമില്ല. പറയാതിരിക്കുന്നതാണ് മാന്യത. സിനിമയില് ഗ്ലാമറസായി അഭിനയിക്കാന് സമ്മതിച്ചതിനുശേഷം നിര്ബന്ധത്തിനു വഴങ്ങിയാണ്ഭീഷണിപ്പെടുത്തിയതുകൊണ്ടാണ് എന്നൊക്കെ പറയുന്നതില് അര്ത്ഥമില്ല. എനിക്കത് പറ്റില്ല. മറ്റാരെയെങ്കിലും വിളിച്ച് അഭിനയിപ്പിച്ചോളൂ എന്ന് പറയണം’.
