ന്യൂയോര്‍ക്ക്: പിറവം നേറ്റീവ് അസോസിയേഷന്‍റെ വാര്‍ഷിക സംഗമം ന്യൂയോർക്കിലെ കേരള സെന്‍റർ ഓഡിറ്റോറിയത്തിൽ നടന്നു. അമീഷ ജെയ്‌മോന്‍റെ പ്രാർഥനാഗാനത്തോടെ ആരംഭിച്ച പരിപാടിയിൽ പ്രസിഡന്‍റ് ജെസി ജെയിംസ് കോളങ്ങായിൽ സ്വാഗതം പറഞ്ഞു.
എത്തിച്ചേർന്ന എല്ലാവരോടുമുള്ള സ്നേഹം ജെസി ജെയിംസ് അറിയിച്ചു. ഫൊക്കാന മുൻ എക്സി വൈസ് പ്രസിഡന്‍റും സാമൂഹിക ചാരിറ്റി രംഗത്ത് വിവിധ അവാർഡുകൾ നേടിയിട്ടുള്ള ജോയി ഇട്ടനെ ഭാരവാഹികൾ പൊന്നാട അണിയിച്ച് ആദരിച്ചു.
വർണാഭമായ കലാവിരുന്നുകൾ അംഗങ്ങൾ അവതരിപ്പിച്ചു. പിറവം സംഗമത്തിലെ സീനിയർ അംഗങ്ങളായ ജോർജ് പാടിയേടത്തു, ലിസി ഉച്ചിപ്പിള്ളിൽ, അബ്രാഹം പെരുമ്പളത്തു, ജയ്നമ്മ പെരുമ്പളത്തു എന്നിവരെ ഭാരവാഹികൾ ഉപഹാരങ്ങൾ നൽകി ആദരിച്ചു.
റോഷിനി ജോജി, അമീഷ ജെയ്‌മോൻ, ആരൻ ജെയിംസ് എന്നിവർ ഗാനങ്ങൾ അവതരിപ്പിച്ചു. ഷെറി, ലിസി, വീണ, റാണി, ഷെറിൻ എന്നിവരുടെ മനോഹരമായ സിനിമാറ്റിക് ഡാൻസ് പരിപാടികൾക്ക് മിഴിവേകി.
മനോഹർ തോമസ്, ജോൺ ഐസക്, ജോയ് ഇട്ടൻ, ഷെവലിയാർ ജോർജ് പാടിയേടത്തു എന്നിവർ ആശംസകൾ അർപ്പിച്ചു. ഷൈല പോൾ പരിപാടിയുടെ എംസിയായിരുന്നു. മനോഹർ തോമസ് (പ്രസിഡന്‍റ്), ജെനു കെ. പോൾ(സെക്രട്ടറി) എന്നിവരെ പുതിയ ഭാരവാഹികളായി തെരഞ്ഞെടുത്തു.
1995ല്‍ തുടങ്ങിയ പിറവം നിവാസികളുടെ ആദ്യയോഗം മുതല്‍ 30 വര്‍ഷങ്ങള്‍ പിന്നിട്ടപ്പോള്‍ വടക്കേ അമേരിക്കയിലെ പിറവം നിവാസികളുടെ കൂട്ടായ്മ വര്‍ഷത്തില്‍ ഒരിക്കലുള്ള ഒരു സൗഹൃദസംഗമമായിരുന്നു.
പിറവം നിവാസികളുടെ സംഗമത്തിൽ എത്തിയ പുതിയ അംഗങ്ങളെ പരിചയപ്പെടുത്തി സ്‌നേഹവിരുന്നോടെ വർണാഭമായ ഈ വർഷത്തെ പിറവം സംഗമം സമാപിച്ചു.
