തിരുവനന്തപുരം: തിരുവോണ ദിവസം ബിവറേജസ് ഔട്ട്ലെറ്റുകള് അടച്ചിട്ട് ബാറുകാര്ക്ക് ചാകരയൊരുക്കാന് സര്ക്കാര് നീക്കം. കഴിഞ്ഞ വര്ഷത്തിന് സമാനമായി സര്ക്കാര് ഔട്ട്ലെറ്റുകള്ക്ക് തിരുവോണത്തിന് അവധി പ്രഖ്യാപിച്ച് ഉത്തരവിറങ്ങി.
അതേസമയം ബാറുകളിലെ മദ്യകൗണ്ടറുകള് പ്രവര്ത്തിക്കണോ എന്ന കാര്യം എക്സൈസ് വകുപ്പ് ആലോചിക്കുകയാണ്. ഓണത്തിന് കൗണ്ടറുകള് തുറക്കാന് അനുവദിക്കണമെന്ന സമ്മര്ദ്ദം ബാറുടമകള് ശക്തമാക്കിയിട്ടുണ്ടെന്നും റിപ്പോര്ട്ടുണ്ട്.
വലിയ വില്പന നടക്കുന്ന തിരുവോണ ദിവസം സര്ക്കാര് ഔട്ട്ലെറ്റുകള് അടച്ചിടുന്നത് ബാറുകാര്ക്ക് കൊള്ളലാഭമുണ്ടാക്കാനാണെന്ന ആക്ഷേപം ശക്തമാണ്. ഔട്ട്ലെറ്റ് ജീവനക്കാരുടെ ദീര്ഘനാളായുള്ള ആവശ്യം പരിഗണിച്ചാണ് തിരുവോണ ദിവസം അവധി നല്കുന്നതെന്നാണ് എക്സൈസ് വകുപ്പിന്റെ വിശദീകരണം.
കഴിഞ്ഞ വര്ഷവും സമാനരീതിയാണ് സര്ക്കാര് പിന്തുടര്ന്നത്. തിരുവോണത്തിന് സര്ക്കാര് ഔട്ട് ലെറ്റുകള്ക്ക് അവധി നല്കി ബാറുകള് തുറക്കാന് സര്ക്കാര് അനുവദിക്കുകയായിരുന്നു.
ബെവ്ക്യൂ ആപ്പ് വഴി മദ്യവില്പന തുടങ്ങിയ ശേഷം ബാറുകള്ക്കാണ് കൂടുതല് കച്ചവടം ലഭിക്കുന്നതെന്ന ആരോപണം നിലനില്ക്കുന്നതിനിടെയാണ് സര്ക്കാരിന്റെ പുതിയ നടപടിയും വിവാദത്തിലായിരിക്കുന്നത്. ഓണദിവസം ബാറുകളിലെ കൗണ്ടറുകള് മാത്രം പ്രവര്ത്തിക്കുമോ എന്നകാര്യം വരും ദിവസങ്ങളില് അറിയാം.
