വയനാട്: വയനാട് കളക്‌ടര്‍ ഡോക്‌ടര്‍ അദീല അബ്‌ദുളളയുടെ പേരില്‍ സമൂഹ മാദ്ധ്യമങ്ങളിലൂടെ വ്യാജ സന്ദേശം പ്രചരിക്കുന്നു. കൊവിഡ് വന്നുപോയവരില്‍ ശ്വാസകോശരോഗം വരുമെന്നും ആയുസ് കുറയുമെന്നുമാണ് വയനാട് കളക്‌ടറുടെ പേരില്‍ പ്രചരിക്കുന്ന വ്യാജ സന്ദേശം.
കൊവിഡ് മാറിയവരില്‍ പിന്നീട് ശ്വാസകോശത്തിന് വലിയ മാറ്റമുണ്ടാകുമെന്നും ആയുസ് കുറയുമെന്നുമാണ് ശാസ്ത്രീയ അടിത്തറയൊന്നുമില്ലാത്ത വ്യാജ സന്ദേശത്തിന്റെ ഉളളടക്കം.
വയനാട് കളക്‌ടറുടെ സുപ്രധാന സന്ദേശം എന്ന പേരിലാണ് വ്യാജ സന്ദേശം പ്രചരിക്കുന്നത്. തന്റേതല്ലാത്ത സന്ദേശം പ്രചരിപ്പിക്കുന്നവര്‍ക്കെതിെര കര്‍ശന നടപടിയുണ്ടാകുമെന്ന് കളക്‌ടര്‍ ഡോക്‌ടര്‍ അദീല അബ്‌ദുളള മുന്നറിയിപ്പ് നല്‍കി. ജനങ്ങളെ പരിഭ്രാന്തരാക്കുന്ന വസ്തുതാവിരുദ്ധമായ സന്ദേശം പ്രചരിപ്പിച്ചത് ഗുരുതരകുറ്റമാണ്. ശക്തമായ നിയമനടപടി സ്വീകരിക്കാതിരിക്കാനാകില്ലെന്നും അദീല അബ്‌ദുളള പറഞ്ഞു.
