കാലിഫോര്‍ണിയ: ആഴ്ചകളായി അണയാതെ കത്തുകയാണ് കാലിഫോര്‍ണിയ. കനത്ത പുകയില്‍ പലയിടത്തും ജനങ്ങള്‍ പരിഭ്രാന്തിയിലാണ്. ഇതുവരെ 7 പേര്‍ കാട്ടുതീയില്‍ മരണപ്പെട്ടു. 2100 കെട്ടിടങ്ങളാണ് കത്തി നശിച്ചത്. രക്ഷാപ്രവര്‍ത്തനത്തിനും തീയണയ്ക്കാനുമായി മുപ്പതോളം ഫയര്‍ യൂണിറ്റുകള്‍ രംഗത്തുണ്ട്.
ആഴ്ചകള്‍ക്കു മുന്‍പുണ്ടായ ശക്തമായ ഇടിമിന്നലുകളാണ് പുല്‍മേടുകളില്‍ തീപടരാന്‍ കാരണമായത്. മൂന്ന് ദിവസം കൊണ്ട് 11000 ഇടിമിന്നലുകള്‍ പ്രദേശത്തുണ്ടായി എന്നാണ് കാലാവസ്ഥാ നിരീക്ഷകര്‍ കണക്കാക്കിയിരിക്കുന്നത്. നാനൂറിനടുത്ത് സ്ഥലങ്ങളില്‍ മണിക്കൂറുകളുടെ വ്യത്യാസത്തില്‍ തീ പടര്‍ന്നു. തുടര്‍ച്ചയായി മൂന്നാമത്തെ വര്‍ഷമാണ് കാലിഫോര്‍ണിയയെ കാട്ടു തീ വലയ്ക്കുന്നത്. കാലാവസ്ഥാ വ്യതിയാനവും ഇടിമിന്നലുകളുടെ തീവ്രത വര്‍ദ്ധിക്കുന്നതും തമ്മില്‍ ബന്ധമുണ്ടെന്നാണ് ഗവേഷകര്‍ പറയുന്നത്.
